VOV4.K’ho – Ờ ngòt ngai mang, mpồl atbồ gùng lòt sồ 3, di Gah gùng lòt ù gờl Việt Nam neh ai mai\ mok, cau lơh broă ală mpồl dê, gam lơh broă tàm gơl gùng, ờ ngòt bòl glar, bơsogn kal ke nàng pờ wơl gùng. Tàm ală bă tiah tơrlah tàm gùng Trường Sơn Đông, bulah trồ mìu bal mờ mhual bơryuh, mơya cau lơh broă gam ngui mai\ mok jal mhar cho\ ù lu\ dùh tàm gùng nàng mhar pờ wơl gùng ai rơndeh lòt rê. Kờ` bơsong ală bă tiah tơrlah, đah do neh pơgồp bal mờ gơnoar atbồ tàm [òn lơgar ai 6 nơm rơndeh cho\ ù lơh ngan cho\ ù ngai mang, tus gùl ngai òr neh gơtùi ai rơndeh rơndồ lòt rê. Mpồl atbồ gùng lòt sồ 3 kung sồr cau lơh broă, mai\ mok ơm tàm gơl gùng do, ngan là ală bă tiah pơhìn gơtìp tơrlah uă nàng pờ wơl gùng tu\ gơlik geh tơrlah.

              Cau cih mờ yal tơnggit K’Duẩn