VOV4.K’ho - Mờ bơta kuơ lơh sơnơm kuơ màng geh is, sơnơm kơnuh Ngọc Linh gam geh càr Kontum dan mờ Bộ Khoa học mờ Công nghệ tong Thủ tướng Chính phủ in kơlôi sơnơng, bơtơl tàm broă lơh bơtàu tơnguh phan bơna dà lơgar tus nam 2020. UBND càr Kontum đơs là, sơnơm kơnuh Ngọc Linh là tờm chi bơh jo\ lơgar Việt Nam dê mờ là tờm chi kuơ màng ngan bơh bơnơm Ngọc Linh dê di 9 xã bơh 2 càr Kontum mờ Quảng Nam. Bè bơta kuơ lơh sơnơm, ală cau khoa học neh ai go\, sơnơm kơnuh Ngọc Linh là sơnơm kơnuh kuơ màng mờ niam ngan rlau jơh dunia tu\ do.

Tờm sơnơm kơnuh Ngọc Linh hòn is

Geh đal git là 1 tàm ală phan tờm ngan bơh càr dê, tus tu\ do Kontum neh sền gàr, bơtàu tơnguh geh rlau 300 lồ sơnơm kơnuh Ngọc Linh mờ bă ù digơlan gơtùi tam sơnơm kơnuh là mờr 17 rbô lồ. Càr tơlik jơnau kờ` tus nam 2020 tam geh 1 rbô lồ mờ lơh gơs li la uă phan bơna bơh sơnơm kơnuh Ngọc Linh nàng drơng jơnau kờ` tàm lơgar mờ tac hờ lơgar ndai.