VOV4.K’ho- Tu\ do tàm càr Kontum geh 234 hìu tru\ gơm biăp piang sa bal, tàm hơ\ uă ngan hìu tru\ gơm biăp piang sa bal geh lơh tàm ală hìu bơsram. Nàng lơh geh dơ\ sa lơh geh tơl bàr bơta là bơkah mờ ờdo ờdă kloh niam phan sa ai kơnòm bơsram in, Mpồl cau atbồ ală hìu bơsram gam lơh ngan pah ngai tàm nùs nhơm sùm rơngòt gơtìp khih phan sa.

Nam bơsram do, Hìu bơsram mầm non xã Đak Mar, kơnhoàl Đak Hà geh 587 nă kơnòm bơsram, tàm hơ\ 280 nă oh ơm sa ngai tơn tàm hìu bơsram. Pah ngai, nàng rơcang ai ală oh in geh dùl dơ\ sa piang ngan ngồn tàm ngai mờ dơ\ sa gùl mho, 3 nă cau tru\ gơm biăp piang sùm bal mờ ală cau pơgru tàm hìu bơsram ờ ru tu\ ngan mờ ală broă. Ùr pơgru Phạm Thị Phương, Kuang atbồ Hìu bơsram mầm non xã Đak Mar, pà gi\t: nàng tru\ gơm geh phan sa bơkah tơl pràn mờ bơta ờdo ờdă kloh niam phan sa, hìu bơsram sùm sền gròi uă ngan bơh broă blơi phan nàng tru\ gơm, mờ ơn prăp wơl dùl e\t…tus tu\ geh biăp piang sa ai ală oh in. Mơya, mờ tu\ neh jơh lơh jat niam ală jơnau sồr tơn, jơnau kơlôi rơcang ngòt gơtìp khih phan sa kung gam geh sùm tàm nùs nhơm bồ tơngoh sơl. Ùr pơgru Phạm Thị Phương, đơs:

“Kơlôi rơcang uă ngan. Rlau 24 jiơ mờ ờ sền go\ mè bèp kơnòm bơsram lơi yal là kơnòm gơtìp khih phan sa halà tàm ală tu\ he sền gàr kòn dềt tàm hìu bơsram ờ gơlik geh broă lơi tu\ hơ\ den bơh kuang bàng atbồ tus dì cau pơgru, cau lơh broă hơ\ sồng iang nùs”.

Nàng tơrmù [à jơnau digơlan gơtìp khih phan sa tàm hìu tru\ gơm biăp piang sa bal, uă hìu bơsram tàm kơnhoàl Đak Hà hòi jà cau tàm mpồl cau ala mat, đoàn viên, ơruh pơnu lơh sươn tam biăp sa tàm hìu bơsram, halà jòi is ală broă lơh “tam is, lơh geh is” biăp sa ndai. Ùr pơgru Dương Thị Tuyết, Kuang atbồ Hìu bơsram mầm non Sơn Ca, thị trấn Đak Hà pà gi\t: Mpồl cau atbồ hìu bơsram sồr kuang bàng mờ cau pơgru tàm hìu bơsram dê rê tàm hìu jà hìu bơnhă tam is biăp sa mờ bàr pe bơta khuah tăc mờ hìu bơsram. Mờ broă lơh do, hìu tru\ gơm biăp piang sa bal ai 256 nă kơnòm bơsram ơm sa ngai tơn bơh Hìu bơsram mầm non Sơn Ca tơn jơh geh jơnau kơlôi rơcang ngòt gơtìp khih phan sa bơh biăp sa pah ngai. Bulah bè hơ\, jơnau do kung ờ go\ di là neh jơh bơta kơlôi rơcang ờ. Ùr pơgru Dương Thị Tuyết, pà gi\t:

“Bè phan sa mờ hìu bơsram gơtùi lơh geh nàng ai ală oh in sàu sa den hìu bơsram iang nùs ngan. Ai bàr pe bơta phan mờ he pal blơi tàm drà den là pal sùm sền gròi ngan. Ai bè bơta niam, bè sền sơ wì nàng jat mờ khà kờp geh tàm phan sa, pơnyơu bè khà kờp hoocmon puăc, ka dê đơs pơnyơu là bè hơ\ den hìu bơsram gơlơh kal ke ngan bè bơta hơ\ tài bơh he mìng gi\t sền mờ mat lơm, mờ bơta mờng chài lơm gời nàng sac rwah phan sa”.

Jơnau kơlôi rơcang ngòt digơlan gơtìp khih phan sa tàm hìu tru\ gơm biăp piang sa bal tàm ală hìu bơsram tàm ù tiah càr Kontum là geh cơng tàng ngan. Jơnau là tài bơh tu\ do broă gròi sền tiah lơh gơlik phan sa tàm ală hìu tru\ gơm phan sa bal là bơta kal ke ngan, glar ngan mờ kal ke ngan lơh geh. Bulah mpồl cau atbồ ală hìu bơsram geh kơnòm bơsram ơm sa ngai tàm hìu bơsram kung neh lơh ngan sac rwah, ki\ pơrgon mờ ală anih gơ sơ\t lơh puăc phan ròng, anih ròng uă phan ròng, tiah lơh biăp sa nàng tăc phan sa mờ hìu bơsram in mơya kung ờ go\ cau lơi khin đơs ngan sơl là bơta sac rwah bơh hìu bơsram dê là dipal ngan ờ. Mò Nguyễn Thị Thanh Thuý, Pho\ Kuang atbồ Phòng bơto bơtê mờ bơsram kơnhoàl Đak Tô, pà gi\t:

“Dilah đơs ngan den să tờm a` là gơlơh kơlôi rơcang ngan. Tài bơh ală hìu bơsram bol a` dê ờ geh tơl ală phan ngui nàng sền sơ wì bè bơta biăp bùm plai chi halà ală phan sa tu\ ngui nàng tru\ gơm tàm anih tru\ gơm phan sa là phan sa kloh halà ờ sơl? Mờ phan sa uă den bol a` ờ jai gi\t geh bè anih lơh gơlik ală bơta phan sa hơ\ là geh lơh kloh niam ờdo ờdă halà ờ?”.

Bơta geh ngan tàm càr Kontum ală nam lài neh gơlik geh uă dơ\ khih phan sa tàm ală hìu bơsram. Bè sùm gơlik geh 2 dơ\ khih phan sa tàm nam 2012 tàm Hìu bơsram kai I Võ Thị Sáu, xã Hơ Moong, kơnhoàl Sa Thầy mờ tàm Hìu bơsram Trung cấp broă lơh Kontum, lơh 267 nă kơ nòm bơsram gơtìp khih. Nam 2014 tàm Hìu bơsram kai III kòn cau ơm sa ngai Phan Đình Phùng, xã Hơ Moong, kơnhoàl Sa Thầy gơlik geh dơ\ khih phan sa lơh 48 nă kơnòm bơsram pal jun tus hờ hìu sơnơm nàng geh cau lơh sơnơm dong kờl. Do là ală jơnau đơs lài pal kơrhia mờ pal kah ngan.

Tềng đap bơta geh ngan do, ồng Hoàng Chí Trung, Kuang atbồ Chi cục ờdo ờdă kloh niam phan sa càr Kontum pà gi\t:

“Tu\ do, broă gròi sền phan sa ngui nàng tru\ gơm tàm ală hìu tru\ gơm biăp piang sa bal den gam kal ke ngan lơh geh. Bè bơta [ươn mìng geh bàr pe hìu bơsram geh anih lơh broă tàm ù tiah [òn dờng Kontum, ală thị trấn mờ bàr pe hìu tru\ gơm biăp piang sa bal bơh Hìu bơsram kòn cau ơm sa tơn tàm hìu bơsram lơm. Jơnau lài tài tàm ală hìu tru\ gơm biăp piang do den cau gơtùi sac rwah phan sa uă rlau, phan sa ris mờ tàm ală hìu bơsram gơtùi lơh gơlik is, ròng siam tai nàng geh biăp puac ka sa ngui sa tơn tàm hìu bơsram. Ai gam wơl den tu\ do, broă sac rwah phan sa bè anih lơh gơ là ờ go\ gi\t loh làng ờ, ngan là ală bơta biăp, bùm, plai chi kung bè puăc ka mờ ală phan sa lơh bơh puăc. Anih gơ sơ\t lơh puăc phan sa bal tu\ do ờ hềt geh ngan ngồn. Mờ broă gròi sền bè dà sơnơm sền gàr phan tam kung bè jơngkah sơnơm sền gàr phan tam tàm ală anih ròng tam phan tàm làng bol ờ hềt geh gròi sền kràn. Gam wơl tàm ală hìu bơsram tàm tiah sar lơgar ngài tài bơh priă jền ờ geh den tàng ờ gơtùi ki\ pơrgon mờ ală cau lơh broă bal nàng blơi phan sa kloh ai ală hìu tru\ gơm biăp piang sa bal in. Den tàng bè hơ\, khi mìng blơi wơl bơh ală cau pơndiang mờ rơndeh măy mờ gơl gùng dilah pơndiang bơh [òn dờng Kontum tus tàm ală hìu bơsram tiah sar lơgar ngài den dilah gờn ngan rlau jơh kung pal jơh tus 4 jiơ den hơ\ sồng pơndiang tus tàm anih. Den tàng bè hơ\, mờ jơnau digơlan gơtìp  bơtờp khih phan kis dềt mờ khih phan sa là uă ngan”.

Bè bàr pe broă lơh tềng đap mat kờn sền gàr kloh niam ờdo ờdă phan sa tàm ală hìu bơsram tàm Kontum, ồng Hoàng Chí Trung, pà gi\t:

“Bol a` neh rơcang lài bơh bồ nam tơn geh broă rơndăp lơh, pơgồp bal mờ Sở Bơto bơtê mờ bơsram càr Kontum kung bè là ală Phòng bơto bơtê mờ bơsram mờ Ủy ban Nhân dân ală kơnhoàl, bơyai lơh mblàng yal mờ bơto pơlam bè jơnau gi\t wa\ ờdo ờdă phan sa ai mpồl cau lơh broă atbồ, cau lơh sơnơm mờ cau lơh broă tàm ală hìu bơsram in kung bè ală pơgru mờ cau lơh broă tàm ală hìu tru\ gơm biăp piang sa bal do in. Dơ\ bàr tai là bol a` pơgồp bal mờ kuang bàng đơng lam mpồl lơh sa kă bro mờ Sở Bơto bơtê mờ bơsram càr dê sùm lòt sền, sồr ală hìu tru\ gơm biăp piang sa bal pal hơ lơh geh ală bơta bè tru\ gơm ngui sa ờdo ờdă kloh niam phan sa”.

Cau cih mờ yal tơngi\t- Lơ Mu K’ Yến