VOV4.K’ho- Tàm tŭ tơngai kòp bơtờp gơlik geh kal ke mờ khà cau bơtờp kòp Kovid-19 ngai sơlơ gơguh uă, tàm ngai 05/01, Củ tịc Ủy ƀan Ñân zân ƀòn dờng Dà Làc, càr Lâm Đồng neh geh kơrnuat crơng gơs 16 hìu sơnơm làm bă tiah tàm jơh ală xã, sơnah ƀòn bơh ƀòn dờng dê. Mò Trần Thị Vũ Loan, Phó Củ tịc Ủy ƀân Ñân zân ƀòn dờng Dà Làc pà git, broă crơng gơs ală hìu sơnơm làm bă tiah là kuơmàng ngan nàng gròi sền ală cau kòp Kovid-19 sơm kòp tàm hìu in, mờ kung rơcang lài sơndră mờ tơl broă gơlik geh tàm kấp hơ đơm tơn tàm tŭ tơngai kòp Kovid-19 gơlik geh kal ke.

Kờp tus tŭ do, ƀòn dờng Dà Làc neh git gŏ rlau 2 rbô 200 nă cau bơtờp kòp Kovid-19, tàm hơ̆ uă ngan neh sơm bời mờ rê bơh hìu sơnơm. Tŭ do gam 784 nă cau kòp gam geh sơm, tàm khà do geh rlau 400 nă cau sơm tàm hìu; 8 tàm 16 xã, sơnah ƀòn bơh ƀòn dờng dê geh kòp khà 3, là khà geh jơnau pơhìn uă bơtờp kòp Kovid-19.

Cau mblàng K’Duẩn