VOV4.K’ho - Kòp prơm gơl^k mhàm tàm càr Dak Lak gam ờ hềt tơngo\ gơmù tu\ khà cau gơbàn kòp do tơnguh jăt mờ tơl poh. Tus tu\ do, gùt càr Dak Lak neh geh dờp rơlao 7 rơbô 300 nă cau gơbàn kòp prơm gơl^k mhàm, tơnguh mờr 750 nă jăt mờ poh lài. Kờ` pơn jăt tai bơto sồr ală kơnhoàl lơh jăt broă sơndră mờ kòp prơm gơl^k mhàm, Gah lơh sơnơm càr Dak Lak neh crơng gơs 3 mpồl kuang bàng sền gròi broă do. Ală mpồl kuang bàng neh sền gròi jơh tàm 15 kơnhoàl, [òn drà, [òn dờng tàm càr mờ bơta kòp tê jê să; broă đơng lam mờ ală broă lơh gam geh lơh tàm broă sơndră mờ kòp. Mờ bơyai sền gròi tàm ală tiah geh kòp, hìu geh kòp mờ broă kờ` lam sồr, tơnguh jơnau g^t wă làng bol in bè bơta kuơ tàm broă sơndră mờ kòp prơm gơl^k mhàm; gàr niam ală hìu nhă tàm tiah geh kòp mờ tiah di gơlan geh kòp ndrờm geh ngui ală broă lơh niam ală phan kờn dà, kờ` sơmăc ờ geh tiah deh tăp; tơmù broă gơtòp kòp.

      Cau cih mờ yal tơng^t Ndong Brawl