VOV4.K’ho - Krông Păc là kơnhoàl geh khà cau rê bơh ƀòn dờng Hồ Chí Minh mờ ală càr hờ đah jum dà lơgar gal ngan càr Dăk Lăk dê mờ rơlao 2 rơbô 700 nă. Nàng làng bol rê geh anih tam cah is ờ do ờ dă, gàr niam geh cồng nha broă rơcang sơndră mờ kòp Covid-19, kơnhoàl Krông Păc neh geh uă broă lơh niam, bơceh lơh nàng dong kờl ală làng bol mờ hìu nhă ală làng bol do iang nùs rơlao. Mờ broă lơh do, di pal ngan mờ tiah ƀòn lơgar, gơtùi ngui mờ ală tiah ndai tàm Tây Nguyên dê.

Rê bal bơh càr Bình Dương, bi Đồng Thanh Hiếu mờ dùl nă cau bơyô gam lơh jăt broă tam cah is tàm sàl tàm gùl suơn kơphe ƀòn Cao Bằng, xã Ea Knuếc, kơnhoàl Krông Păc. Bi pà git, rơlao 3 nhai ờ geh broă lơh tàm tiah kòp gơtờp, khà priă prăp gàr neh sa mờr jơh. Tơnơ̆ mờ tŭ càr Bình Dương lơh thoàr broă tam cah is, bi neh ntoăt mờ rơndeh Honda nàng rê hờ ƀòn lơgar tờm.

                                                   Tam cah is tàm sàl geh lơh tàm suơn kơphe

Tài hìu nhă ờ tơl nàng geh anih tam cah is, den tàng bi geh gơnoar atbồ tàm do ai ơm bal mờ dùl nă cau ndai tai tàm sàl lơh tàm suơn kơphe: “Rê den mè bèp bal mờ ală cau tàm ƀòn rơndăp ai sàl bơh dùl nă cau oh rê bal hơ̆ sồng bàr nă oh mờ mi tus tàm do nàng tam cah is. Pah ngai den mè bèp jun piang sào, mè bèp ơn tềng tiah, tŭ lơi mè bèp neh rê den hơ̆ sồng bol añ mù ai. Rê là git là pal tam cah is nền nòn ngan”.

Ồng Triệu Văn Đường, Phó kuang atbồ ƀòn Cao Bằng, xã Ea Knuếc pà git, tàm ală ngai do, ƀòn neh rò uă cau rê bơh ală càr hờ đah jum. Nàng rơndăp anih ơm di pal, tơl niam ờ do ờ dă tàm broă rơcang sơndră mờ kòp di mờ kơrnoăt neh geh ai, Mpồl atbồ ƀòn neh sền wơl khà hìu geh sàl tàm suơn kơphe, geh hìu sơbì gơì, hơ̆ sồng cri bơyai nàng ring bal mờ ală hìu làng bol pà ing ală hìu hơ̆ nàng lơh anih tam cah is. Broă sền gròi cau tam cah is geh Mpồl atbồ ƀòn mờ Mpồl Covid mpồl bơtiàn ƀòn lơh jăt nền nòn: “Tŭ rê tam cah is pal lam sồr làng bol pal lơh jăt di 5k nàng niam ờ do ờ dă ai làng bol in kung bè cau tàm ƀòn bal làng bol kis tàm ƀòn dê. Pah ngai kung lòt sền gròi geh broă tam cah is lah ờ, tài geh uă cau geh nùs nhơm tam cah is ờ lơh jăt, den tàng he kung pal bơto bơtê sùm”.

                                     Cau tàm hìu nhă jun phan cau tam cah is tàm sàl suơn kơphe in

Gam tàm xã Ea Yiêng, do là xã tiah ngài kơnhoàl Krông Păc dê, tài khà hìu geh lơh tàm suơn ờ uă, gơnoar atbồ tàm xã do neh ai ngui ală hìu pơrjum ƀòn bơh tơl ƀòn mờ ờ uă broă lơh tàm ƀòn nàng lơh tiah tam cah is mờ sơnđan do là ală “hìu làng bol ròng”. Tàm tơl nơm broă lơh geh lơh ală kơlik kơrian mờ kơl dung nilon, di pal mờ khà cau tam cah is. Mpồl atbồ ală ƀòn pơgồp bal mờ mpồl Covid mpồl bơtiàn mờ mpồl ơruh pơnu lòt lam sồr tă phan sa, ai cau trŭ sa, tam pà ai làng bol ơm tàm “hìu làng bol ròng” in. Mpồl ơruh pơnu xã neh lam sồr ală broă dong kờl phan sa, phan ngui nàng gàr niam ai làng bol in iang nùs lơh jăt broă tam cah is. Bi Trần Đức Hậu, Phó Chủ tịch Mpồl tam klăc ơruh pơnu Việt Nam kơnhoàl Krông Păc pà git: “Mpồl tam klăc ơruh pơnu Việt Nam kơnhoàl bơyai lơh broă lơh tơlăk dơ̆ sa nàng tam pà mờ ală dơ̆ saò sa ai Mpồl atbồ ƀòn in, nàng dong kờl piang tàm trồ mho, bol añ kung dong kờl tai phan ngui phan sa nàng Mpồl atbồ ƀòn trŭ sa mờ ai phan sa mpồl cau tam cah is tàm kơnhoàl in”.

                                  Ală kơlik cang jơdŭ mờ nilong ndrờm mờ khà cau tam cah is

Tàm kơnhoàl Krông Păc, càr Dăk Lăk, mờ khà rơlao 2 rơbô 700 nă làng bol rê tus ƀòn lơgar tờm bơh ƀòn dờng Hồ Chí Minh mờ ală càr hờ đah jum dà lơgar den geh 11 nă cau tam tam cah is tơrgùm bal tàm kơnhoàl, 54 nă cau tam cah is tơrgùm bal tàm ală xã mờ 2 rơbô 670 nă cau tam cah is tàm hìu. Gàr niam broă tam cah is nền nòn nàng rơcang sơndră mờ kòp gơtờp, UBND kơnhoàl neh tam pà mùl màl kơnòl bơh tơl mpồl lơh broă geh gơnoar. Jăt mờ hơ̆, gah lơh sơnơm lơh jăt broă xét nghiệm mhar làng bol in 3 ngai 1 dơ̆, pah ngai hòi điện thoại sồr làng bol was is bơta duh să jan, sền gròi bơta pràn kơl dang să jan; gah kuang àng gàr niam bơta lơngăp lơngai ờ do ờ dă tàm ală tiah geh cau tam cah is; ală mpồl lơh broă lam sồr tă priă, phan ngui sa nàng dong kờl làng bol bơdìh mờ khà priă geh bơh dà lơgar. Mò Nguyễn Thị Kim Oanh, Phó Chủ tịch UBND kơnhoàl Krông Păc yal: “Kơnhoàl kung neh tơlik uă sră nggal nàng đơng lam lơh jăt broă chồl pràn broă lơh bơh mpồl Covid tàm ală xã, thị trấn in sền gròi ală hìu nhă geh cau gơtìp tam cah is mờ yal sùm tus mờ Mpồl đơng lam rơcang sơndră mờ kòp gơtờp tàm xã 1 ngai 2 dơ̆. Kơnhoàl kung neh crơng gơs mpồl rài kis mpồl bơtiàn, mpồl do kung gàr niam bơta pràn bơh kơnhoàl dê kung bè bơta pràn tàm boă lam sồr bơh ală cau geh nùs nhơm niam nàng dong kờl di tŭ ai ală làng bol tam cah is tàm tơngai gơtìp kal ke tài bơh kòp Covid-19”.

Kơnờm mờ broă lơh di pal, broă tam cah is làng bol rê bơh ƀòn dờng Hồ Chí Minh bal mờ ală càr hờ đah jum dà lơgar tàm kơnhoàl Krông Păc gam dờp geh broă ring bal bơh làng bol. Bŭ lah git gam uă kal ke mờ di gơlan gơtờp kòp, mơya mờ broă rơcang lài nền nòn bơh ală cấp, ală gah lơh broă bal mờ broă tus bal bơh làng bol, pin dờn kơnhoàl Krông Păc geh sền gròi geh cồng nha kòp Covid-19 tàm kơnhoàl do.

Cau mblàng Ndong Brawl