VOV4.K’ho – Ngai òr 21/04, 3 nă kuang bàng mờng chài tus bơh lơgar Thái Lan pơgồp bal mờ Anih tờm sền gàr rwas ]àr Dak Lak reh mpàng jơng đah kiau ai rwas brê gơtìp yar dă in, geh dong kờl pơgăp mờ do 2 nhai. Ngai 19/02 lài do, tàm tiah brê r]ang gàr bồ tô dà Buôn Đôn, kuang bàng Anih tờm sền gàr rwas ]àr Dak Lak sền go\ dùl nơm rwas dam di 5 sơnam gơtìp sồt să tàm mpàng jơng bơh đăp đah kiau, muh rwas gơtìp tăc ơra\; digơlan tài bơh yar dă ]au dê sơn. Tơnơ\ hơ\ tơn, rwas geh jun rê hờ Brê dà lơgar Yok Đôn nàng sơm sồt mờ sơnđan măt là Y Jun jăt bơhiàn tiah do dê. Tơnơ\ 2 nhai sơm sồt, muh rwas neh bời sồt, mơya tềl sồt tềng jơng kung gam gơbàn gơlik dà ndơng sồt mồr sơl, lòt rê wơl kal ke ngan. Mờ bơta dong kờl bơh 3 nă kuang bàng mờng chài tus bơh lơgar Thái Lan bal mờ ờ uă bơta sơnơm [ă tàm, drim òr 21/04, ală bác sĩ neh reh, lơh goh jơh sồt mồr mờ bong sơnơm nàng pơn jăt tai sơm sồt tềng jơng rwas in. Ồng Khajohnpat Boonpraset là kuang bàng mờng chài tus bơh Anih tờm sền gàr rwas lơgar Thái Lan dê, pà gi\t: Tàm bàr pe nhai tus, jơng rwas pơn jăt tai geh ala sơnơm pah ngai tus di tu\ sồt gơ bời jơh. Sồt mồr tềng jơng ờ ngòt rơngơ\t tus màng kis rwas dê, mơya dilah ờ geh sơm sồt di tu\, den rwas digơlan gơtìp chơ\t tài ờ pràn tài bơh lòt rê kal ke mờ ờ jòi geh phan sa. Tu\ rwas neh bời jơh sồt mồr, gơ kung kal ke gơtùi kis gơrờm bal wơl mờ mpồl rwas brê.

Ală kuang bàng mờng chài lơgar Thái Lan gam lơh ngan dong kờl sơm sồt jơng rwas in