VOV4.K’ho - Kuang gơs gơnăp gơnuar atbồ hờ đang rơlao jơh dà lơgar pa k^ khà măt rơndăp broă “Pơgồp bal prăp gàr geh uă sinh học, gơkờ` mờ tam gơl trồ tiah mờ sền gàr brê kơl jăp tiah kis tàm gùl Trường Sơn lơgar Việt Nam”. Rơndăp broă do geh kes priă tiah kis gùt dunia (GEF) dong kờl bơh anih priă jền tơnguh bơtàu châu Á (ADB). Rơndăp broă do kờ` tơnguh broă sền gàr mờ geh sùm bơta geh uă phan tàm tiah prăp gàr mờ tiah gùt dar tàm tiah tàm gùl Trường Sơn lơgar Việt Nam; gàr niam broă lơh geh uă phan tàm brê kơl jăp mờ gơkờ` bal mờ tam gơl trồ tiah tàm tiah Trường Sơn dê, cèng wơl bơta kuơ rài kis mpồl bơtiàn tàm do in, kờ` pơgồp bal mờ broă tơnguh lơh sa tàm tiah do. Ală càr tus bal lơh jăt rơndăp broă do geh càr Quảng Trị, Thừa Thiên Huế, Quảng Nam. Tơngai lơh jăt rơndăp broă di gơlan bơh nam 2015 tus 2018.