VOV4.K’ho – Jat Gah bơto bơtê mờ bơsram càr Lâm Đồng, dơ\ pơr lòng jơh bơsram kai 3 dà lơgar nam 2016 kờp du\ lài geh rlau 12.300 nă cau cih mat tus bal pơr lòng jơh bơsram kai 3 dà lơgar nam 2016, tàm hơ\ gah bơsram kai 3 bè ờs là rlau 11.900 nă, gah bơto bơsram bơtơl là 386 nă, ờ hềt kờp cau pơr lòng ndai. Bè hơ\, pơn drờm mờ nam 2015, khà cau kờp du\ tus bal pơr lòng jơh bơsram kai 3 dà lơgar nam do ờ gơguh. Geh git, dơ\ pơr lòng jơh bơsram kai 3 bơh Gah bơto bơtê mờ bơsram dà lơgar bơyai lơh pơr lòng 8 môn là Toán, Ngữ văn, Lịch sử, Địa lí, Vật lí, Hoá học, Sinh học mờ dà đơs lơgar ndai. Ală môn Hoá học, Vật lí, Sinh học geh pơr lòng jat broă lơh trắc nghiệm, tơngai lơh jơnau pơr lòng tơl môn là 90 phút. Ală môn Toán, Ngữ văn, Lịch sử, Địa lí geh pơr lòng jat broă lơh cih jơnau, tơngai pơr lòng tơl môn là 180 phút.

                                                        Cau cih mờ yal tơngit K’ Duẩn.