VOV4.K’ho – Drim ngai 16/7, tàm Hà Nội, Ủy ban Thường vụ Quốc hội pơ gồp bal mờ Văn phòng Chính phủ bơyai lơh Pơrjum lam lơh broă lơh bơt bơtàu adat boh lam, kơrnuat boh lam ală nhai lồi nam do mờ nam tơ nơ\. Jat broă lơh neh geh Quốc hội lơh nền, tàm pơrjum dơ\ 10 geh lơh tàm lồi nam do, Quốc hội geh sền sơ wì ring bal 6 rơndap lơh adat, 1 jơnau rơcang cih nghị quyết mờ ai jơnau đơs bè 4 rơndap lơh adat ndai. Ủy ban Thường vụ Quốc hội sền sơ wì 1 rơndap lơh Kơrnuat boh lam dong kờl cau geh màng mờ dà lơgar.

Ală kuang bàng đơs là, ală anih đơng lam cih gơs adat boh lam, kơrnuat boh lam pal lơh sir ală rơndap lơh adat boh lam, kơrnuat boh lam jat di mờ tu\ tơngai neh kờp du\.

Bè broă lơh bơt bơtàu adat boh lam, kơrnuat boh lam nam tus, ală kuang bàng  đơs là, do là nam tàm jàu tơngai lơh broă mờ 3 dơ\ pơrjum Quốc hội. Nàng lơh jat di tu\ tơngai yal Quốc hội in jat broă lơh, sồr ală anih lơh broă tơr gùm cau lơh broă, geh broă rơndap lơh nền nòn nàng gàr niam broă kơ lôi sơ nơng, rơcang lài, lơh sir rơndap lơh adat boh lam, kơrnuat boh lam.