VOV4.K’ho- Tềng đăp bơta kòp Covid-19 gơbàn kal ke tàm uă lơgar tàm dunia, kung bè tàm dơlam lơgar sơl, tơngai lài, ală càr geh bal gùng nhàr lơgar mờ lơgar rềp bal Campuchia neh geh uă broă lơh geh kuơ ngan cồng nha ngan, pơgồp bơnah lơh tơrmù kòp bơtờp mờ ătbồ niam tiah nhàr lơgar.

Jăt ồng Trần Hòa Hợp, Chủ tịch Ủy ƀan Nhân dân kơnhoàl An Phú, càr An Giang dê yal, ù tiah kơnhoàl dê geh gùng nhàr lơgar jòng rlau 40 kơi sồ, rềp nhàr bal mờ ală kơnhoàl: Angkor Bourei, Bourei Cholsar, Koh Thum gơwèt càr Kandal mờ Takeo, lơgar Campuchia dê. Tềng đăp bơta kòp Covid-19 kung gam gơbàn kal ke sơl, An Phú geh sền là tiah geh uă ngan bè jơnau lơh tìs kơrnoăt tiah nhàr lơgar. Mìng kờp bơh bồ sơnam tus tŭ do, ală mpồl lơh broă geh gơnoar neh gŏ mờ kơryan rlau 700 nă cau mŭt tàm lơgar tìs mờ kơrnoăt boh lam.

Lơh jăt jơnau kờñ ờ gŏ di lời cau mŭt tàm lơgar tìs mờ kơrnoăt boh lam, ờ geh kòp bơtờp tàm mpồl bơtiàn, jăt tiah nhàr lơgar mpồl lơh broă geh gơnoar kung gam lơh sùm broă gròi sền kràñ ngan gùng ù gờl mờ gùng dà. Ồng Trần Hoà Hợp, Chủ tịch Ủy ƀan Nhân dân kơnhoàl An Phú, pà gĭt tai: Bol añ neh lam lơh srơh jơh gùt làng bol tam dră mờ kòp. Bơh lam lơh srơh den làng bol gŏ geh bơta gĭt wă, kơnòl bơh he dê tàm broă rơcăng, sơndră kòp bơtờp; di tŭ gŏ mờ kơryan, yal yă ală cau muh mat krơi, ngan là ală cau mŭt tàm lơgar tìs mờ kơrnoăt boh lam bơh lơgar Campuchia mŭt tàm kơnhoàl.      

Nàng kơryan jơnau geh ngan cau mŭt tàm lơgar tìs mờ kơrnoăt boh lam mơkung lơh niam broă lơh rơcăng, sơndră kòp, bơdìh mờ broă lơh kràn tiah nhàr lơgar, tơngai rềp ndo, kơnhoàl An Phú neh lam lơh srơh jơh gùt làng bol tus bal rơcăng sơndră kòp Covid-19, “tơl nă làng bol là dùl nă cau ling”; dong gơnoar ătbồ kơnhoàl gŏ ală cau lòt rê gan tiah nhàr lơgar tìs mờ kơrnoăt boh lam, kơryan lài kòp Covid-19 lơh gơrềng tus mpồl bơtiàn. Bi Nguyễn Minh Trí là dùl nă làng bol ơm tàm xã Vĩnh Hội Đông, kơnhoàl An Phú, pà gĭt: He là làng bol den pal geh kơnòl...Añ mŭt bal tàm mpồl lòt sền bơh ƀòn lơgar dê neh rlau dùl nhai do rao...nàng sền gàr pràn kơldang să jan mpồl bơtiàn, làng bol mờ să tờm he dê.

Broă ală cau mŭt tàm lơgar tìs mờ kơrnoăt boh lam bơh Campuchia mŭt tàm Việt Nam lòt gan càr An Giang geh pơhìn lơh kòp lơh bơtờp tàm càr khăt tàm tŭ lơi. Mờ jơnau kờñ “ờ lời cau mŭt tàm lơgar tìs mờ kơrnoăt boh lam, geh ờ geh kòp lơh bơtờp tàm mpồl bơtiàn”, kuang bàng cau ling tàm ală mpồl gròi sền, mpồl lòt sền, lòt gròi sền sùm ngai kung bè mang, ătbồ kràñ mpồng nhàr lơgar, ală gùng kòn, gùng dềt, rbòng dà lòt gan tiah nhàr lơgar...kơryan jơh ală cau lik mờ mŭt tàm lơgar tìs mờ kơrnoăt boh lam gan tiah nhàr lơgar. Bi Trần Minh Chiến- Phó Kuang ătbồ Mpồl đơng lam ling klàng xã Vĩnh Hội Đông, kơnhoàl An Phú, pà gĭt tai: Mờ nùs nhơm jơh nùs mờ geh kơnòl ngan. Mpồl tam pà gơs 2 mpồl, dùl mpồl lòt tus hờ ù tiah ƀòn Vĩnh Hoà, dùl mpồl lòt tus ù tiah rềp mờ sơnah ƀòn Vĩnh Ngươn dê nàng gàr niam ai broă rơcăng sơndră kòp in.

Tam pà bal bè ală kal ke bơh mpồl cau tus bal lòt sền dê, Đại úy Chau Ône, Phó Kuang đơng lam bồ Pôs đồng ling sền gàr tiah nhàr lơgar Vĩnh Hội Đông, Mpồl ling sền gàr tiah nhàr lơgar càr An Giang dê, pà gĭt: Trồ mang gơrềng tus măt sền gơwèt mờ ală mpồl cau tus bal lòt sền dê...dơ̆ bàr tai là tìp trồ mìu dờng, càl mờ kơnàs còng dờng ngan den tàng là kal ke ngan. Mơya mờ bơta jơh nùs ngan rlau jơh bơh mpồl dê, bol añ di tŭ tàm pơndờm pơnđiang bal, lam lòt sền lơh niam kơnòl broă ală kơnhoàl ù tiah.

Càr Đồng Tháp geh rlau 50 kơi sồ gùng nhàr lơgar rềp bal mờ càr Pray-veng, lơgar Campuchia dê, geh 2 mpồng nhàr lơgar dunia là Thường Phước mờ Dinh Bà. Ù tiah kal ke ngan bal mờ ală rbòng dà uă ngan, uă gơl gùng dềt hat hal ngan den tàng ƀươn ngan ai ală cau in dòp mpồn, lơh pơrlồm nàng pleh gơtìp mpồl lơh broă geh gơnoar dê gŏ. Bi Nguyễn Quốc Triệu là ling griăp ƀòn xã Thông Ƀình, kơnhoàl Tân Hồng yal: mpồl ling griăp ƀòn lơh jăt niam kơnòl broă dong kờl ală mpồl ndai tàm ală anih gròi sền gĭt broă gơlik geh, di tŭ gŏ mờ lơh glài kràñ ală cau dùl nă să is, mpồl cau să tờm tơn lơh halà geh broă lơh tàm dong, rò jun cau lik mŭt tàm lơgar tìs mờ kơrnoăt boh lam. Bi Nguyễn Quốc Triệu đơs: Gròi sền ală rơndeh rơndồ lòt rê, tơngkah làng bol pơn chèu glòm muh măt, ràu tê lơh kloh khuẩn...dilah cau krơi lòt rê den sền tàm kốp rơndeh, sră pơ àr nàng rơcăng sơndră kòp Covid-19 mờ lik mŭt tàm lơgar tìs mờ kơrnoăt boh lam.   

Ồng Nguyễn Văn Cọp, Chủ tịch Ủy ƀan Nhân dân xã Thông Ƀình, kơnhoàl Tân Hồng pà gĭt, tơngai rềp ndo, gơnoar ătbồ xã neh bal mờ ală mpồl lơh kơnòl broă rơcăng sơndră kòp tàm gơl gùng tiah nhàr lơgar, lơh pràn broă lơh mblàng yal, hòi jà làng bol lơh jăt ală broă lơh rơcăng sơndră kòp Covid-19, ờ gŏ di dong kờl lam cau mŭt tàm lơgar tìs mờ kơrnoăt boh lam, khin cha yal yă tŭ gŏ ală cau lơh tìs tiah nhàr lơgar geh gơnoar ătbồ xã mờ ală mpồl lơh broă geh gơnoar lơh sùm. Ồng Nguyễn Văn Cọp, Chủ tịch Ủy ƀan Nhân dân xã Thông Ƀình, yal: Tus tơngai do bè broă lơh mblàng yal den pal đơs là làng bol bơh xã dê geh bơta gĭt wă, wă wờng uă ngan bè broă lơh rơcăng sơndră kòp. Kuơmàng gơwèt mờ ală cau muh măt krơi tus tàm xã den bơdìh mờ xã sền gŏ den làng bol kung gŏ sơl mờ yal di tŭ.         

Ală càr ndai, bè Kiên Giang mờ Cà Mau kung neh lam lơh mờ lơh jăt niam broă lơh pơgồp bal lòt sền gròi sền cau lòt rê; nàng gờñ gŏ mờ lơh glài di tŭ ală cau lik mŭt tàm lơgar tìs mờ kơrnoăt boh lam gơlik geh tàm tơngai do. Bulah kòp bơtờp tŭ do kung gam gơbàn kal ke, ờ gơtùi gĭt lài mơya ling klàng mờ làng bol tơrgùm bal pràn dùl nùs dùl tồr bal den kal ke lơi kung sơrlèt gan jơh lơm. Tàm dơ̆ tam dră mờ kòp dờng bềng bơta bòl glar kal ke do, nùs nhơm tam klăc hơ̆ dùl dơ̆ tai geh lơh niam. Tàm gùl trồ mang klam jơngo cik tàm tiah nhàr lơgar ngài ngan, ling klàng mờ làng bol kung gam bal sơl dùl bơta kơ̆p kờñ tàm dùl gùng lòt tam dră mờ kòp. Jơh ală tài bơh ngai hìng àng sơrdah rlau, ring lơngai mờ ờdo ờdă rlau.

Cau cih VOV4- Cau mblàng Lơ Mu K’Yến