VOV4.K’ho - Dơ\ bơyai lơh tơnjơh mờ jàu khà jờng sra\ bao\ dà lơgar dơ\ 10 nam 2015 geh bơyai lơh di   tơng kah 91 nam ngai sra\ bao\ kac màng Việt Nam, mang 21/6, tàm cung Văn Hoá Hữu Nghị Hà Nội.

             Khà jờng sra\ bao\ dà lơgar dơ\ 10 nam 2015, geh 1.660 jơnau cih bơh 169 mpồl mờ cau dùl na\ sa\ is tus bal. Mờ broa\ lơh ngan, jơh nùs mờ kràn ngan, tàm  142 jơnau geh  rwah mut tàm dar lồi dut, mpồl  ai khà pơr lòng neh rwah geh 92 jơnau nàng jàu khà jờng, tàm hơ\ geh 8 khà A, 25 khà B, 40 khà C mờ 19 khà pơnjờng . Nam 2015 la nam geh bal  ua\ ngan mờ ala\ ngai chờ dờng mờ ala\ broa\ lơh dờng kuơ màng bơh dà lơgar. Sền bal tàm ala\  jơnau cih bơh  gah lơh bao\  lơh geh jàu khà jờng tàm khà jờng sra\ bao\ dà lơgar dơ\ 10,  gơtùi sền go\ ala\  broa\ dờng bơh dà lơgar mờ ala\ bơta go\ ngan jơnau yal tơnggit neh geh ala\ cau lơh bao\ lơh go\ sền ngềr ngan mờ niam ngan. Mờ tus mờ tơl na\ cau lơh bao\,  geh jờng tàm khà jờng sra\ bao\ dà lơgar ờ mìng tàm  bơta pơnyờ sa\ mờ gam la bơta pràn ngan nàng pơnjat tai tàp sa\, lơh ngan nàng lơh bao\ niam rlau bal mờ cau lơh bao\ gùt lơgar lơh   gơs broa\ jàu bơh la “ala\ cau ling tàm gah chài  rgơi, nùs nhơm”.

                   Cau cih mờ yal tơnggit K’ Brọp