VOV4.K’ho- Drim ngai 17/12, tàm Hà Nội, Tổng cục khà kờp làng bol deh dùh di kơrhia tàm hìu bơnhă, Bộ Y tế neh pơgồp bal mờ Mpồl ntrờ` tiah ơm kis dunia Việt Nam bơyai lơh mít tinh ngai dunia cau ntrờ` tiah ơm kis. Do là broă geh lơh pah nam, bơh nam 2000, nàng kờ` chul chồl bơta ki ngàm, sền gàr, dong kờl ală gơ noar kuơmàng bơh cau ntrờ` tiah kis dê.

Wèt tus tơngume “Jơnau đơs bơh cau ntrờ` tiah kis dê tàm kòp dờng Covid-19”, mít tinh Ngai dunia cau ntrờ` tiah kis nam do là tu\ nàng iat jơnau đơs, ală jơnau yal geh kuơ, tam pà ală mờng chài mờ bơta kơp kờ` bơh cau ntrờ` tiah kis dê bè gùng lòt khi dê tàm kòp dờng Covid-19 gam gơlik geh tàm gùt plai ù.

Jat jơnau yal bơh Bộ Ngoại giao dê, nam 2016 ai go\ khà cau Việt Nam ntrờ` tiah kis tus ală lơgar ndai pơgap 10 tơlak nă. Ngai dunia cau ntrờ` tiah kis  geh sền là tu\ niam nàng cih dờp ală tă pơgồp bơh git nđờ tơlak nă cau ntrờ` tiah kis gơ wèt tus mờ rài lơh sa bơh lơgar mờ khi ơm kis mờ ai [òn tờm khi in.

Cau mblàng K’Duẩn