VOV4.K’ho - Bơh tơnơ̆ pơrjum dơ̆ 10 Quốc hội khoă 14 tus tŭ do, Mpồl Chủ tịch Ủy ban Mặt trận dà lơgar Việt Nam pơgồp bal mờ Ủy ban Thường vụ Quốc hội neh tơrgùm geh 2 rơbô 278 jơnau đơs, jơnau dan bơh cau tĕ khà bal mờ làng bol gùt lơgar pơyoa tus pơrjum dơ̆ 11 Quốc hội khoă 14.

Jăt Chủ tịch Ủy ban Mặt trận dà lơgar Việt Nam ồng Trần Thanh Mẫn đơs, cau tĕ khà mờ làng bol pơn jăt tai tơlĭk nùs nhơm ờ sŭk tềng đăp mờ bơta kal ke bơh kòp Covid-19, ală bơta gơrềng ờ niam bơh kòp do dê tus mờ broă lơh sa, kă bro mờ rài kis làng bol, tàm hơ̆ uă ngan là ală tiah gơtìp kòp; ờ sŭk tềng đăp mờ bơta cau lơgar bơdìh mŭt mờ di mờ adăt boh lam tàm lơgar Việt Nam mờ yal broă lơh sơnơm ờ jơh nùs.

Dan Quốc hội, Chính phủ, ală bộ, gah lơh broă, ală càr, ƀòn dờng pơn jăt tai lơh jăt ală broă brồ guh mờ chồl pràn broă tơnguh bơtàu lơh sa, gàr niam rài kis broă lơh sa mpồl bơtiàn tàm bơta kòp Covid-19 gam gơtìp kal ke; tơmù ờ uă bơta gam ờ niam tàm broă bơto bơtê mờ bơsram, broă lơh sơnơm, bơta chài rơgơi mpồl bơtiàn; atbồ ù tiah mờ sền gàr tiah kis mờ lơh geh cồng nha rơlao tai broă rơcang sơndră mờ sa kuề sa koà, hoàc huơr...

Cau mblàng Ndong Brawl