VOV4.K’ho – Dơ\ lam sồr brồ guh bơhìan yau, tă pơgồp pràn jak, di mờ mat sơnđan cau ling wa Hồ, gam gơ rề pràn ngan tàm kuang bàng, cau ling càr Daklak. Tàm hơ\, mpồl lòt jòi, tờ tơrgùm bồc ntìng cau ling chơt màng (hòi lơyah là mpồl K51), di phòng Chính trị, gah đơng lam ling klàng càr Daklak, là mpồl geh pơn rơ ngan mờ ală broă lơh ngan ngồn. Mờ ală broă lơh ngan ờ git glar bòl, sơr lèt gan git nđờ kal ke, kuang bàng, cau ling mpồl K51 neh lơh jơh niam ngan kơnòl lòt jòi, tờ tơr gùm, cèng bồc ntìng bơh git nđờ rbô nă cau ling chơt màng lơh broă dong kờl is lơgar Việt Nam dê chơt phi să tàm ù tiah lơgar Campuchia rê wơl hờ lơgar tờm.

Nàng mut lơh dơ\ lam sồr brồ guh bơhiàn yau, tă pơgồp pràn jak, di mờ mat sơnđan cau ling wa Hồ, ală nam do, Phòng Chính trị, gah đơng lam ling klàng càr Daklak sùm sền gròi tus broă lơh lam sồr, mblàng yal, bơto bơtê nùs nhơm mờ pơn jờng di tu\ mờ ală broă lơh ngan ngồn tus tơl nă kuang bàng, cau ling mpồl K51. Den tàng, tơl nă kuang bàng, cau ling mpồl dê ndrờm tơnguh jơnhua nùs git git kơnòl tàm broă mut lơh, jơh nùs tus bal ală srơh pơr lòng lơh ngan ai geh jai pha, lơh jơh jak ngan kơnòl geh jàu.

Bè Trung uý Văn Công Nhân, là dùl nă cau ling geh rài kis uă ngan kal ke. Ală nam do, bi sùm pal ơm ngài hìu nhă, bal mờ cau ling mpồl bal lòt làm gùt ù tiah kơh bơnơm ngài ngan tàm lơgar Campuchia nàng lơh kơnòl broă. Tàm [òn tờm xã Ea Bhôk, kơnhoàl Cư Kuin, pơ ùr mờ kòn dềt bi dê pal ơm tàm hìu ơm ơpah tài ờ hềt geh hìu is. Pa do, gah đơng lam ling klàng càr Daklak mờ Kong ti Viễn thông ling klàng Viettel sơne\ lơh broă tàm càr Daklak bơh broă lơh “Hìu ơm 100 đông” (geh dong kờl bơh tin nhắn điện thoại), neh lơh pà dùl nơm hìu ai cau ling Văn Công Nhân in. Broă lam sồr dong kờl di tu\ do neh dong bi iang nùs lơh broă, lơh jơh jak ngan kơ nòl broă geh jàu. Bi là cau ling jak ngan geh jờng rơ gùt mpồl ling tàm broă mut lơh dơ\ lam sồr brồ guh bơhìan yau, tă pơgồp pràn jak, di mờ mat sơnđan cau ling wa Hồ. Trung uý Văn Công Nhân, mpồl lòt jòi bồc ntìng cau ling chơt màng K51 yal: “A` pal sùm lòt lơh broă ngài hìu nhă, hìu ơm ờ hềt geh den kung kal ke ngan pơ ùr mờ kòn a` in. Tus ngai do, ưn ngài ngan kơnă hơđang mờ ală mpồl dong kờl neh dong hìu nhă a` lơh geh hìu ơm. Là bơta pơn jờng nàng să tờm in iang nùs, să tờm kung bè pơ ùr mờ kòn a` dê iang nùs lơh broă.”

Brồ guh bơhìan niam bơne\ bơh cau ling wa Hồ dê, mờ ơnà “Hùc dà kah tô dà”, “sa plai kah cau tam chi”, mpồl K51 neh chồl pràn broă lòt jòi, cèng rê hờ [òn tờm bồc ntìng cau ling chơt màng tàm lơgar mờ lơgar ndai, nàng jun ală cau ling chơt màng rê mờ cau tờm, mờ ù tiah Việt Nam pròc mhàm dê. Jơng cau ling mpồl K51 dê neh tềl làm gùt tiah sar lơgar ngài, làm gùt ală [òn, ală tiah lơgar Campuchia dê.

Nàng lơh jơh kơnòl broă, ală cau ling mpồl K51 pal tàm pơr lòng mờ tu\ tơngai, tài nam nhai lòt gan, ală jơnau yal tơnggit bè bơtô bồc cau ling chơt màng ngai sơlơ ờ huan geh, ală bơtô bồc cau ling chơt màng tàm uă tiah sar lơgar ngài, tiah brê bơnơm halà ù tiah tam gơl kal ke… sơlơ kal ke tàm broă jòi tơrgùm. Kuang bàng, cau ling mpồl K51 sùm ơm tàm [òn lơgar, tus tơl [òn tàm lơgar Campuchia, jòi tơl jơnau yal tơnggit, đal git mờ tờ. Thiếu tá Phan Tấn Đại, atbồ mpồl K51 càr Daklak đơs tờm: “Mpồl đơng lam ling klàng, cấp uỷ, bơt bơtàu nùs nhơm lơh ngan ai kuang bàng, cau ling in, bơt bơtàu bơta pràn tam klac tàm ling klàng. Nàng tơl nă cau, tơl mpồl bal, tơl mpồl lơh broă đal git nùs nhơm lơh ngan tàm broă jòi tơr gùm.”

Đòm jat ơnà jak Bác Hồ dê sơr lèt gan kal ke, sơr lèt gan bòl glar, kơ\ nùs, lơh jat kơrnuat lơh broă, tàm ală nam do, mpồl K51 sùm lơh jơh jak ngan kơnòl broă, jòi mờ cèng git nđờ rbô bồc ntìng cau ling chơt làng lơh broă dong kờl is lơgar Việt Nam rê wơl hờ lơgar dùl bă ờ do ờ dă. Bơh nam 2014 tus tu\ do, mpồl K51 sùm geh khà jờng sàng kloh, pràn kơldang, kơ\ kơljap mpồl 3 nam sùm geh khà jờng mpồl geh cồng nha jak ngan tàm pơr lòng lơh ngan geh jai pha. Pa do, mpồl K51, gah đơng lam ling klàng càr Daklak geh Thủ tướng Chính phủ pà sră jờng rơ bè pơn rơ jak bơsram mờ lơh jat ơnà jak Bác Hồ. Mpồl kuang bàng, cau ling mpồl K51 Daklak neh brồ guh bơhiàn yau, tă pơgồp pràn jak, di mờ mat sơnđan cau ling wa Hồ.

                                                                Cau cih mờ yal tơnggit K’Duẩn