VOV4.K’ho- Mho òr (15/03), tàm thị trấn Lộc Thắng, kơnhoàl Bảo Lâm, càr Lâm Đồng, Ủy ban Khoa học, Công nghệ mờ Môi trường Quốc hội neh geh dơ̆ lơh broă mờ mpồl lơh Bauxit-trà Tân Rai (Lâm Đồng) mờ Nhân Cơ (Dak Nông) bè broă lơh jăt ală jơnau sồr bơh mpồl sền gròi mờ cồng nha tơmù ală bơta gam gơlĭk ờ niam jăt jơnau sồr.

Dơ̆ lơh broă bơh mpồl kuang bàng sền gròi dê

Mpồl kuang bàng sền gròi tus tàm tiah mùl màl broă lơh bơsong gơthul, nhơm tơlik tàm hìu măy Alumin Tân Rai 

Jăt jơnau bơh Tập đoàn Công nghiệp Than-Khoáng sản Việt Nam yal, tàm nam 2020, bŭ lah gơtìp mờ uă kal ke tài gơrềng bơh kòp Covid-19, mơya jơh 2 hìu măi bauxit Tan Rai mờ Nhân Cơ ndrờm lơh broă di mờ rơndăp broă neh geh ai. Tàm hơ̆, hìu măi Tân Rai lơh geh rơlao 707 rơbô tấn alumin, priă geh 2 rơbô 700 tơmàn đong; ai priă geh kờp jơh bơta kuơ bơh ală broă lơh sa kă bro là 62 tơmàn 200 tơlăk đong; hìu măi Nhân Cơ lơh geh 715 rơbô tấn, priă geh 2 rơbô 900 tơmàn đong mờ priă cồng geh mờr 29 tơmàn đong. Bè broă sền gàr tiah kis, ală hìu măi ndrờm geh lơh ngan tàm broă lơh jăt ndrờm bal ală broă kơrian ƀơ̆ gơlĭk geh bơh broă lơh sa, bơta niam tiah kis, bơta niam ù tiah tàm ală tiah lơh broă geh gơguh niam.

Đơs pơn dŭt dơ̆ lơh broă, mpồl kuang bàng do sồr pal pơn jăt tai lơh jăt ală jơnau sồr bơh mpồl sền gròi bè broă sền gàr tiah kis, tàm hơ̆ uă ngan là 3 broă bè tơnao ơn ù bŏ, gơthul ù tàm tiah ơn chah mờ tam tờm chi nàng tiah kis tàm tiah lơh broă hìu măi Alumin Nhân Cơ geh niam.

Cau mblàng Ndong Brawl