VOV4.K’ho - Di satềp Tân Sửu 2021, ngai òr (29/01), Phó kuang lam bồ mpồl kuang bàng Quốc hội càr Dak Lak geh ồng Y Khút Niê bal mờ mpồl kuang bàng neh tus còp, chờ gờm satềp pôs ling sền gàr tiah nhàr dà lơgar tàm gùng nhàr dà lơgar càr dê geh: Ea Hleo, Ia R’vê, mpồng nhàr dà lơgar Dak Ruê, Yok M’Bre, Serepok, Bo Heng mờ Yok Đôn.

               Mpồl kuang bàng Quốc hội càr Dak Lak còp mờ chờ gờm satềp ală pôs ling sền gàr tiah nhàr dà lơgar

Tàm ală anih tus còp, mpồl kuang bàng lơh broă neh geh iăt kuang bàng, kuang đơng lam pôs ling yal broă lơh jăt kơnòl geh jào tàm nam 2020 mờ gùng dà, broă lơh tàm tơngai tus, kơnòl drơng gàr rơcang tam lơh mờ broă lơh ai kuang bàng, cau ling tàm pôs ling in di tàm satềp nam pa Tân Sửu tus do.

Ala măt mpồl kuang bàng Quốc hội càr, ồng Y Khút Niê neh dờp mờ đơs niam ală broă lơh bơh kuang bàng, cau ling ală pôs ling sền gàr tiah nhàr dà lơgar neh ờ ngòt kal ke nàng lơh gơs niam ală kơnòl geh jào, pơgồp bal tàm broă gàr niam bơta lơngăp lơngai tiah nhàr dà lơgar, sền gàr gơnoar tờm ù tiah dà lơgar.

Cau mblàng Ndong Brawl