VOV4.K’ho – Mpồl kuang bàng sền gròi bơh Mpồl bơyai broă dà lơgar bơh ồng Nguyễn Thanh Bình - Ủy viên Đảng dà lơgar, Phó Kuang atbồ Ban Thường trực – Mpồl bơyai broă dà lơgar lơh kuang atbồ mpồl neh geh dơ\ lơh broă mờ càr Lâm Đồng bè tơngume gơ rềng tus broă lơh jat 2, 3 jơnau cih, jơnau đơs pơn dut bơh Ban Chấp hành Đảng dà lơgar, Bộ Chính trị mờ Ban Bí thư dê bè broă lơh kuang bàng bơh nam 2018 tus tu\ do.

Tơngai tus, ồng Nguyễn Thanh Bình tơngkah Mpồl kuang bàng duh broă Đảng UBND càr Lâm Đồng pơn jat tai lơh niam broă kờp sền, sền sơ wì nền nòn broă rơndap lài, tơn pồ mờ rơwah kuang bàng; broă lam lơh pal lơh jat bơta geh ngan mờ lơh jat di jơnau sồr bơh Ban Chấp hành Đảng dà lơgar, Bộ Chính trị mờ Ban Bí thư dê, ờ go\ di lời gơlik geh broă lơh tìs, tài dilah lời gơlik geh broă lơh tìs den geh lơh aniai ua\ ngan mờ broă tam gơl tìs là kal ke ngan. Mơkung sồr Lâm Đồng pơn jat tai lơh jat geh cồng nha Nghị quyết sồ 18 bơh dà lơgar dê bè tơmut bal, lơh bal hia\, pal geh jơnau sền sơ wì nền nòn, dipal nàng tơnguh cồng nha lơh broă.

Cau mblàng K’Duẩn