VOV4.K’ho- Ờ hoan geh bơta pràn priă jền, ờ hoan pràn tàm broă atbồ mờ ờ sền gròi bè atbồ brê… rơndap broă lơh bơt bơtàu anih dờng ròng phan, tam brê mờ ròng siam kơnòm dềt kue\t kơlte bơh Anih ròng siam mờ sền gàr dong kờl kơnòm dềt kue\t kơlte Thiên Phước tàm kơnhoàl Đức Trọng, càr Lâm Đồng neh lời gơlik geh bơta koh kơl brê, sơ gràm ù brê tàm tơngai jo\ jòng. Jơnau gơ lời wơl là geh rlau 23 rơbô lồ brê neh gơbàn koh kơl, hoàc huơr dùl khà dờng dơm chi brê lơh gơ rềng tus mpồl bơtìan mờ gơ jat bal uă bơta lơh tìs tàm tu\ lam lơh rơndap broă lơh.

Tus anih lơh broă bơh Anih lơh broă ròng siam, sền gàr mờ dong kờl kơnòm dềt kue\t kơlte Thiên Phước tàm tiểu khu 301, xã Tân Thành, kơnhoàl  Đức Trọng (càr Lâm Đồng) tàm ală ngai do, sền go\ tềng đap mat bol a` là bơta rơ`ah rơ`ang, ngềt ngơt, ală sèng anih prap phan mờ tiah ơm ai công nhân in ndrờm neh gơtìp nhơ\t lềng wờr bềng jơh lơm. Jơh dùl tiah dờng ơnàng mơya mìng geh dùl nă cau klau drơng broă sền gàr phan bơna lơm, ờ geh khat dùl broă lơh lơi ndai tai. Cau klau do pà g^t, să tờm he geh sồr tus atbồ tiah do 2,3 ngai lơm.

A` mut tàm do mìng là sền gàr 2,3 ngai lơm gời, broă kung mìng bè hơ\\ lơm. Broă do ală bi lơh broă te\ mờ ală anih lơh broă geh gơnoar, gah sơnah lơh broă, să tờm a` mìng lơh broă sền gàr hìu đam den ờ go\ gơ rềng lơi mờ ờ g^t bơta lơi ờ.

Hìu lơh broă bơh Anih lơh broă Thiên Phước tàm kơnhoàl Đức Trọng

Rơndap broă lơh do geh UBND càr Lâm Đồng ai sră dờp gơnoar bơcri priă lơh tàm bồ nam 2008 mờ ai ơpah mờ bă ù rlau 107 lồ, tàm hơ\ geh mờr 99 lồ là bă ù brê. Do là bă brê tam phan lơh pơ àr geh dờp blơi bơh Công ty Cổ phần tập đoàn Tân Mai dê. Bơh ală ngai geh dờp sră ai gơnoar bơcri priă lơh tus tu\ do, Anih lơh broă Thiên Phước mìng rơ\p pa lam lơh bơt bơtàu tiah văn phòng lơh broă, hìu ơm công nhân in mờ anih prap phan, mờ kờp jơh bă ù jat ơnàng pơgap 400 thơk vuông mờ ală broă lơh do ndrờm geh bơt bơtàu tìs mờ kơrnoat boh lam tài bơh ờ hềt lơh sră pơ àr tam gơl jơnau kờ` ngui ù jơnau sồr dê. Kuơ màng là, broă atbồ, sền gàr brê bơh Anih lơh broă Thiên Phước dê gơ lơh bè sang te\, lời gơlik geh jơnau mus kơl brê, koh kơl dơm chi, sơ gràm ù brê mờ cò pơn ring ù brê tìs mờ kơrnoat boh lam tàm tơngai jo\ jòng. Jơnau gơ lời wơl là neh geh rlau 34 lồ brê neh gơbàn koh kơl mờ sơgràm ù brê.

Jat ồng Lương Ngọc Phương, Phó  Kuang atbồ Hạt kiểm lâm kơnhoàl Đức Trọng yal, bulah mpồl sùm mờ pơn jat sùm ai uă mpồl nàng tus dong kờl, bơsong mờ kơryan  mơya tài bơh bơta ờ sền gròi, lời te\ bơh cau tờm rơndap broă lơh dê den bơta mus  kơl brê, sơ gràm ù brê tàm tiah do kung gam gơlik geh sơl. Tàm ală dơ\ lơh tìs, 2,3  dơ\ lơh tìs geh tềl tơngo\ bè cau lơh tìs den neh geh jun tus anih lơh broă lùp khàu, sồr yă ku\p jàm mơya tơnơ\ hơ\ ndrờm gơ ơm tàm bơta ngềt ngơ\t. Den tàng bè hơ\, broă atbồ sền gàr brê tàm tiah do sơ lơ kal ke rlau tai.

Kal ke bơh mpồl lơh broă dê là bă brê kơnhoàl dê jòng mờ uă mpồl lơh sa kă bro tàm tu\ mpồl Kiểm lâm ờ hoan geh cau. Gơ wèt mờ xã Tân Thành den ờ geh Mpồl sền gàr brê xã, tài bơh at bal tơn gơnoar broă den kiểm lâm tàm ù tiah do dê lơh jat broă lơh lòt sền, sền gròi tàm 3 ù tiah den kal ke ngan. Ngan là brê do là phan bơna bơh Công ty Thiên Phước dê, phan bơna khi blơi, tu\ gơlik geh broă mus kơl brê gơ ơm tàm khà lơh hoàc huơr phan bơna, jơ tài cau dùl nă să is ờ go\ di là phan bơna dà lơgar dê den broă lơh glài là kal ke ngan.

Koh kơl brê, sơ gràm ù brê tàm dùl rơndap broă lơh tàm kơnhoàl Đức Trọng

Mpồl lơh sa kă bro ờ sền gròi broă atbồ, anih lơh broă geh gơnoar den đơs là bòl glar tài bơh ờ hoan geh cau lơh broă là jơnau tờm gơlam tus broă brê gơtìp mus kơl mờ sơgràm ù brê. Jat jơnau đơs pơn du\t bơh kuang bàng lùp sền sồ 2094, ngai 13/04/2020 bơh UBND càr Lâm Đồng dê, ờ mìng is tàm Anih Thiên Phước lơm gời mờ rlau 20 mpồl lơh sa kă bro ndai geh jàu brê nàng lơh ală rơndap broă lơh bơcri priă tàm kơnhoàl Đức Trọng ndrờm lời gơlik geh bơta ndrờm bè do sơl, mờ kờp jơh bă brê gơtìp mus kơl gơguh tus 677 lồ mờ 296 lồ ù brê gơtìp sơgràm. Đơs bè broă do, ồng Lê Nguyên Hoàng, Phó chủ tịch UBND kơnhoàl Đức Trọng dờp là broă atbồ, sền gàr brê bơh tiah do dê gam ờ pràn mờ kal ke ngan.

Broă atbồ, sền gàr brê den geh UBND kơnhoàl sền gròi uă ngan, mơya, bol a` sền go\ là kung gam geh bơta ờ niam mờ ờ pràn. Tàm tơngai tus, bol a` geh lơh jat dơ\ le\ bal ală gùng dà broă lơh, tơnguh broă lòt sền, sền gròi, nàng di tu\ sền go\  ală cau lơh tìs geh bơta đơng lam krà` cê lơh glài gơ wèt mờ ală cau do. Gơ wèt mờ anih lơh broă Thiên Phước dê, tềng đap mat là tơr gùm atbồ bă brê 23 lồ neh ai wơl, 11 lồ gam wơl den geh tơr gùm mpồl tus lòt sền, lơh glài mờ tam wơl brê jat di mờ jơnau sồr.

Tềng đap mat jơnau uă mpồl lơh să kă bro geh Dà lơgar ai ơpah brê mờ ù brê lơh ală rơndap broă lơh bơcri priă mơya lời gơbàn broă mus kơl brê, sơ gràm ù brê tàm kơnhoàl Đức Trọng, UBND càr Lâm Đồng neh ai ngui uă sră nggal đơng lam ală mpồl lơh broă geh gơnoar mut lơh broă lùp khàu, lơh glài kràn jat di mờ jơnau sồr bơh atdat boh lam dê. Mơya, bơta mus kơl brê, sơ gràm ù brê tàm tiah do tu\ do kung gam ờ hềt geh bơsong jơh.

Cau cih Quang Sáng – Cau mblàng K’ Hạnh