VOV4.K’ho - Tơnơ̆ mờ 5 nam lơh gơs broă bơ̆t bơtàu ƀòn lơgar pa, xã Dà Kho, kơnhoàl Dà Teh, càr Lâm Đồng neh mùl màl “Tam gơl”. Broă lơh sa pơn jăt tai gơguh niam, ờ uă broă lơh geh lơh gơs mờ cèng geh cồng nha uă... ală gùng dă mờ cài ndrờm kloh niam mờ geh bơta niam bơnĕ bơh bơkào geh tam bàr gah gùng lòt. Hìu pơrjum ƀòn, hìu bơsram, ƀlàng nhơl niam neh mờ gam geh lơh... ală “phan” hơ̆ neh lơh gơs muh măt ƀòn lơgar niam bơnĕ ngan bơh ù tiah rềp mŭt tàm kơnhoàl Dà Teh, càr Lâm Đồng dê.

Bol añ tus tàm xã Dà Kho tŭ măt tơngai neh mờr tam toh tềng bồ, làng bol kis tàm ală ƀòn 5, 6 gam lơh broă. Cau gam mờ broă pơs wàs kloh niam, dùl mpồl cau chài “ƀòn lơgar” dê gam ờ ru mờ broă bơrlŭ sơmang, dă găc... nàng lơh ƀlàng nhơl dềt tềng hìu chài rơgơi ƀòn. Nggùl ngai trồ tơngai duh, broă lơh geh tŭ gơtìp glar bòl mơya mờ nùs nhơm chờ hờp, dùl nùs bal tŭ làng bol tàm ƀòn mờr geh tai dùl tiah ƀòn lơgar kloh niam nàng nhơl chờ, den tàng làng bol gam lơh ngan lơh gơs broă bơh să tờm dê.

Kah wơl ală ngai sơnrờp ngan mŭt lơh tàm broă bơ̆t bơtàu ƀòn lơgar pa, mò Nguyễn Thị Hiền, Bí thư Chi bộ ƀòn 6, xã Dà Kho pơn yờ să ngan mờ đơs: “Tàm tŭ lam sồr lơh jăt broă bơ̆t bơtàu ƀòn lơgar pa, xã Dà Kho neh tìp uă ngan kal ke, mìng is ƀòn 6 den geh broă sơn đờm lơh ờ uă ngan tàm xã. Mơya, tŭ do bàr gah gùng tàm xã, tàm ƀòn, ală hìu tìm mờ sơlo neh gơtìp sek, ờ kơl jăp lài do tŭ do neh geh tam gơl mờ ală hìu cờn niam bơnĕ. Ală gơl gùng trồ tơngai gơtìp gơthul kơmbuh, trồ mìu gơtìp mbè neh ờ geh tai, ala tàm hơ̆ tŭ do geh 100% geh dă mờ bê tông bal mờ cài jơh, gùng lòt geh lơh kloh niam, bơkào lì sùm gùt nam".

Bơh tŭ lơh jăt broă bơ̆t bơtàu ƀòn lơgar pa, gơnoar atbồ xã neh đơng lam, lam sồr, lơh jăt ndrờm bal ală broă lơh tus tơl ƀòn bè broă sền gàr tiah kis... Gŏ loh kơnòl tàm broă sền gàr tiah kis đơs is mờ broă bơ̆t bơtàu ƀòn lơgar pa đơs bal, làng bol neh tus bal uă broă lơh mùl màl nàng tơnguh bơtàu tiah kis tơlir, kloh, niam. Uă hìu làng bol tàm ƀòn neh lơh niam wơl suơn, tam phan geh kuơ tàm broă lơh sa, geh tòm chi mƀur lơh geh bơta niam tơlir sền gàr tiah kis. Ală mpồl lơh broă tàm ƀòn gam pơgồp bal bơyai lơh uă ơdŭ bơto bè bơta ngăc ngar kloh niam tiah kis, jòi nàng gĭt bè bơta aniai bơh siồ siă gơlĭk.

Ồng Nguyễn Trọng Hiệp, Phó Bí thư Đảng ủy xã Dà Kho pà gĭt: “Tơnơ̆ mờ 5 nam lơh jăt, broă bơ̆t bơtàu ƀòn lơgar pa tơnguh uă neh gơs broă lơh geh jơh ală mpồl lơh broă chính trị mờ gùt mpồl bơtiàn tus bal, tàm hơ̆ uă ngan là làng bol kis tàm gùt xã dùl nùs bal kờñ. Làng bol neh tơnguh geh gơnoar lơh tờm tàm broă bơ̆t bơtàu ƀòn lơgar pa bè: Tus bal lơh ală broă lơh jăt gùng dà broă lơh “Làng bol lơh, Dà lơgar dong kờl phan”; tus bal tàm broă lơh gơs ală tơngu me broă bơh xã ƀòn lơgar pa tơnguh uă dê, tàm hơ̆ uă ngan là tơngu me broă ù tiah niam, tiah kis”.

Nàng lơh geh tơngu me bè ù tiah niam, tiah kis gơguh uă, Đảng ủy xã Dà Kho neh đơng lam ai tơl anih lơh broă, mpồl lơh broă chính trị mpồl bơtiàn lơh ờ uă ngan dùl broă lơh niam ù tiah, tiah kis. UBND xã gam bơ̆t bơtàu rơndăp broă lam sồr làng bol là cau lơh broă bal bè tiah kis bơh ală broă lơh geh xã, ƀòn lam sồr. Bơh tŭ hơ̆, rơhời tơl nă kuang bàng, làng bol neh gơs bơta mờng tàm broă gàr bơta kloh niam bal tàm hìu, tàm gùng ƀòn.

Geh pơnrơ ngan, Hội Nông dân xã Dà Kho gam geh 2 broă lơh sền gàr tiah kis, tàm hơ̆ geh broă lơh tơrgùm kơl dung, sơnơm sền gàr phan tam mờ broă lơh siồ siă gơs priă; broă lơh gờl gùng bơkào geh Mpồl tam klăc cau ùr xã lơh; broă lơh gơl gùng sền gàr is bơh Đoàn ơruh pơnu xã jòng 7 kơi sồ gơwèt gơl gùng lòt tus tàm ală ƀòn. Ală broă lơh do neh hòi jà geh 4 rơbô 500 nă cau tus bal. Bơdìh hơ̆ tai, Đah Mặt trận Dà lơgar bal mờ ală mpồl lơh broă tàm xã Dà Kho gam sùm lam sồr ală cau tàm mpồl bal mờ làng bol tus bal ală broă lơh kloh niam tiah kis bơh ală broă lơh lam sồr làng bol chài bè: Hìu nhă 5 ờ, 3 kloh; Bơ̆t bơtàu gơl gùng ờ geh siồ siă; Gơl gùng bơkào tơlir-kloh-niam...

Kơnờm mờ hơ̆, tus tŭ do, gùt xã neh geh rơlao 50% khà gùng lòt tàm xã, tàm ƀòn neh geh brong tơlĭk dà mờ geh tam tòm chi mƀur ha là tam bơkào, tòm chi niam jơh ală gùng lòt. Rơlao 85% khà hìu ròng phan tàm xã geh wàng ròng kloh niam tiah kis; 100% hìu lơh sa kă bro tàm xã lơh jăt broă lơh kloh niam siồ siă, dà ƀơ̆ geh bơta niam mờ gàr kơl jăp. Siồ siă bơh tàm rài kis, siồ siă kră bơh broă lơh sa suơn sre gơlĭk tàm xã neh geh tơrgùm tàm tiah lơh sa mờ geh lơh niam di mờ kơrnoăt geh ai.

Ồng Nguyễn Trọng Hiệp, Phó Bí thư Đảng ủy xã Dà Kho đơs: “Kờñ broă sền gàr tiah kis geh lơh niam rơlao tai, tàm tơngai tus, xã Dà Kho pơn jăt tai lơh jăt broă lơh kloh niam tiah kis tàm xã mờ geh lơh sùm. Mờ chồl pràn broă lam sồr nàng làng bol wă loh làng mờ lơh jăt nền nòn broă kloh niam tiah kis tàm rài kis lơh broă sa, ròng phan, tàm tiah mpồl bơtiàn. Geh sùm niam broă lơh kloh niam tàm ngai rơlô pah poh tàm ală ƀòn, hìu bơsram, drà...”.

Cau mblàng Ndong Brawl