VOV4.K’ho - Neh geh tŭ là tiah pôs đồng kăc màng tàm gùl tiah ling sò tơm dê, sùm gơtìp jòi kŭp, rồn bơklơn tàm rài tam lơh, tŭ do, muh măt ƀòn 1, xã Hoà Thuận, ƀòn dờng Buôn Ma Thuột, càr Dăk Lăk neh tam gơl niam, pas gơs, niam bơnĕ, kloh niam. Bŭ lah tàm rài lơngăp lơngai ha là tàm rài tam lơh den nùs nhơm tam klăc bal sơrlèt mờ kal ke bal mờ bơhiàn kăc màng gam sùm geh làng bol prăp gàr, tơnguh uă tàm tiah neh geh tŭ “ù tiah ồs do”.

Ngài mờ tiah tàm gùl ƀòn dờng Buôn Ma Thuột-do là tiah gam geh sền là “tiah pơrhê” bơh kòp Covid-19 dê, rơlao 13 kơi sồ, mơya tus tŭ do, ƀòn 1 (hơ̆ là ƀòn Kiên Cường lài do), xã Hoà Thuận, ƀòn dờng Buôn Ma Thuột, càr Dăk Lăk kung gam là “tiah tơlir”, ờ hềt geh gŏ cau gơtìp kòp Covid-19 lơi.

               100% gùng lòt tàm dơlam, bơdìh ƀòn Kiên Cường tŭ do ndrờm geh dă mờ bê tông mờ cài jơh

Ồng Bồ Xuân Thanh, Phó Bí thư Chi bộ ƀòn 1 yal, kơnờm mờ broă ring nùs bal, tam klăc bal mờ jơnau git wă bơh tơl nă làng bol, ală broă rơcang sơndră mờ kòp ndrờm geh lơh jăt nền nòn ngan. “Ƀòn là tiah krơi is, den tàng broă lam sồr làng bol lơh jăt niam ală chỉ thị, gùng dà broă lơh bơh gơnoar atbồ den niam ngan. Ală làng bol lơh jăt Chỉ thị 15 ha là 16 bơh Chính phủ den ndrờm nền nòn ngan. Oh kòn kis bơh tiah ndai tus, bè Sài Gòn, Đà Nẵng den kung di tŭ yal mờ hìu sơnơm xã nàng cih jơnau tam cah is tàm hìu”.

Nùs nhơm tam klăc bal, dong kờl bal bơh làng bol kis tàm ƀòn Kiên Cường neh gơs bơhiàn, geh lơh jăt sùm bơh ală nam, nhai tàm rài tam lơh cui rơcai. Mò Võ Thị Hường, cau lơh broă yal tơngit jơnau ndơ̆p ndơr lài do, cau đềt mềr mờ ù tiah do kah wơl, bơh nam 1961, hìu nhă mò là dùl tàm khà 105 hìu làng bol gơwèt mpồl hìu geh pin gơrềng tus mờ kăc màng, gơtìp ling sò tơm cèng bơh càr Quảng Nam tus tàm do ơm kis nàng ƀuơn tàm broă pù pờng, lùp khào. Tus nam 1975, tŭ tơnklàs Buôn Ma Thuột, tàm ƀòn mìng gam 38 hìu ơm kis. Do là ală hìu pràn kơl dang, dùl nùs jăt kăc màng. Hìu lơi kung geh cau lòt lơh broă lam gùng cau ling in, jun phan sa ha là lòt yal jơnau tơngit ai anih lơh broă kăc màng in. Uă cau neh phi să, tàm hơ̆ geh bal bơklao mò Hường-là cau ling chơ̆t màng ồng Trần Lang, kuang bàng Kinh tài H6. Mò Võ Thị Hường yal, tàm rài tam lơh, bŭ lah gơtìp chơ̆t jê, jơh ală ndrờm dùl nùs lơh ngan gàr “bồng bi”, gàr nđàm ù tiah pôs đồng. “Jơh ală gàr bồng bi, ling sò tơm tus là he tam lơh, ling sò tơm cuh sèt jơh bồng bi den he yồng tai bồng bi ndai. Ling sò tơm pù pờng bơta lơi den he kung gam lik lòt hơ̆ sồng lòt bè lơi nàng tus yal cau ling he in git là ling sò tơm neh lòt bơh gùng lơi, git lài ală bơta là yal mpồl ling he in nàng rơcang tam lơh. Đah mpồl ling he dê tam lơh mờ ling sò tơm nàng gàr nđàm ù tiah he dê, den tàng ling sò tơm ờ jai sơgràm. Làng bol he ờ bài lơh dĭ gơna, ờ dờp mờ bơta roh dà lơgar, geh phi să bơh ală cau ling hơ̆ sồng geh rài kis tŭ do ring lơngai, hờm ram gơboh gơbài”.

Anih duh khoai cau ling chơ̆t màng - do là anih cih măt 39 nă ling ƀòn Kiên Cường dê chơ̆t phi să tàm rài tam lơh

Ală chơ̆t jê, roh rui geh làng bol lơh gơs bơta pràn, pràn kơl dang ơm kis mờ dong kờl kăc màng, ròng, pồn cau ling. Den tàng, bŭ lah mìng gam 38 hìu ơm kis tus ngai dà lơgar geh tơnklàs, mơya ƀòn geh tus 39 nă cau ling chơ̆t màng, 6 nă cau mè Việt Nam khin cha jăk chài, 10 nă cau ling sồt să. Geh bèp mờ bi klao là cau ling chơ̆t màng, den tàng ồng Võ Tấn An git uă ngan bè bơta moăt mờ bơta roh rui bơh tam lơh lời wơl. Ồng kah wơl rài gam dềt ồng dê. “Lài do tam lơh tơl hìu geh tờ tơl bơtô, tŭ kơno săp gar phào bơrtoh là mù jơh tàm bơtô, lòt bơsram den kung ngòt rơngơ̆t ngan sơl bè hơ̆, ờ gŏ do bè tŭ do. Dà lơgar he geh tơnklàs, làng bol he geh kis gơboh gơbài den he gơlơh pơnyờ să ngan. Gùng lòt tŭ do kung neh geh lơh niam, ală bơta phan ngui neh tơl lơm, rơndeh lòt tàm gùng geh tơl jơh”.

Tam lơh neh jơh rơlao 46 nam, ƀòn Kiên Cường tŭ do neh cèng geh muh măt pa. Bơh 38 hìu ơm kis, tŭ do neh geh tus 365 hìu mờ 1 rơbô 653 nă làng bol. Tơnguh nùs nhơm tam klăc bal, làng bol tàm ƀòn dong kờl bal tơnguh bơtàu broă lơh sa, tơnguh broă lơh sa. Mờr 1 bơnah 3 khà hìu tàm ƀòn gơwèt hìu pas gơs, mờ mìng gam 1 hìu rơƀah. Muh măt ƀòn lơgar kung niam tŭ 100% gùng lòt tàm ƀòn mờ lòt tus ală ƀòn ndai ndrờm geh dă mờ bê tồng mờ dă mờ cài. Jăt mò Nguyễn Thị Hương, Phó Chủ tịch UBND xã Hoà Thuận yal, ƀòn Kiên Cường neh geh uă broă pơgồp bal geh pơnrơ ngan bal mờ gơnoar atbồ xã bơ̆t bơtàu ƀòn lơgar pa mờ ƀòn lơgar pa tơnguh uă. Do là dùl tàm ală ƀòn sơnrờp ngan càr Dăk Lăk dê geh 15 tàm 15 khà broă tàm broă bơ̆t bơtàu ƀòn lơgar pa. “Tơnguh nùs nhơm bơh làng bol tus bal mờ gơnoar atbồ xã tàm broă lơh jăt jơnau kờñ bè bơ̆t bơtàu ƀòn lơgar pa xã dê. 15 khà broă bơh ƀòn ndrờm geh lơh tơl, tus nam 2014 den xã Hoà Thuận neh geh dờp bè ƀòn lơgar pa sơnrờp ngan càr dê, tus nam 2020 geh dờp xã ƀòn lơgar pa tơnguh uă den tàm hơ̆ geh broă pơgồp bal bơh ƀòn 1 dê. Bơh cấp ủy, chi bộ, mpồl atbồ ƀòn tus mờ ală mpồl lơh broă kung bè làng bol pơn jăt tai bal mờ gơnoar atbồ bơ̆t bơtàu xã Hoà Thuận ngai sơlơ tơnguh bơtàu rơlao, lơh ngan tus nam 2022 gam bơ̆t bơtàu ƀòn lơgar pa lam lài”.

Tơn jơh ală chơ̆t jê roh rùi tài tam lơh, làng bol kis tàm ƀòn Kiên Cường, xã Hoà Thuận gam pơn jăt tai brồ guh, tus bal ñhăp ñhar lơh broă sa, tơnguh bơtàu rài kis, gàr niam bơta lơngăp lơngai chính trị, lơh ngan bơ̆t bơtàu ƀòn lơgar pa, xã ƀòn lơgar pa lam lài.

Cau cih H’ Xíu-Cau mblàng Ndong Brawl