VOV4.K’ho – Tàm ròt ală broă lơh bơh pơr lòng chài rơgơi đơs crih tamya bơhìan yau Tây Nguyên mờ Poh chài rơgơi nhơl chờ càr Kontum dơ\ 3 nam 2016, drim òr 18/3, tàm hìu chài rơgơi [òn Kon Klor mờ anih prap ơn phan kuơ kah yau càr Kontum geh bơyai lơh pơr lòng trah mòn dơm chi bơhìan yau, lơh phan nhơl gùng đơs crih mờ ràng tơlik phan lời wơl kah yau chài rơgơi Tây Nguyên.

Tus bal pơr lòng trah mòn dơm chi bơhiàn yau, lơh phan nhơl gùng đơs crih kòn cau, geh 57 nă cau chài tus bơh ală càr Tây Nguyên là Lâm Đồng, Daknông, Daklak, Gialai mờ Kontum. Tàm tơngume trah mòn dơm chi bơhìan yau, tàm tơngai 3 ngai, 35 nă cau chài ngui bơta chài git wă bè trah mòn dơm chi bơhìan yau nàng lơh gơs ală rùp dơm chi jòng 1 thơk 6, ơnàng 50 phơng. Tơngume bơh rùp dê là bơh ală cau chài bơceh is. Bè lơh phan nhơl gùng đơs crih kòn cau, 22 nă cau chài neh ràng tơlik bơta chài lơh mòn ală phan nhơl gùng đơs crih pơn rơ ngan kòn cau he dê bè T’rưng, Tinh Ning, Kơ ní, Đinh Klớk… mờ phan mòn uă ngan là gle, đơr, dơm chi.

                                           Cau cih mờ yal tơngit K’ Duẩn.