VOV4.K’ho - Drim òr (18/03), tàm kơnhoàl Tây Giang, càr Quảng Nam, Anih jơnau đơs Việt Nam neh sơn đờm mờ ai ngui lơh broă anih pờ tơlĭk jơnau đơs FM lơh is tềng bồ bơnơm Quế, xã Tr’hy, kơnhoàl Tây Giang, càr Quảng Nam.

Rơndăp broă lơh anih pờ tơlĭk jơnau đơs FM lơh is tềng bồ bơnơm Quế-Tây Giang, càr Quảng Nam là rơndăp broă lơh sơnrờp ngan bơh Anih jơnau đơs Việt Nam ngui ală công nghệ pa ngan tàm broă atbồ lơh anih pờ jơnau đơs, hơ̆ là công nghệ pờ tơlĭk bơh vệ tinh, sền gròi mờ lơh broă bơh ngài bơh mạng viễn thông.

Broă mùl màl ai anih pờ tơlĭk jơnau đơs FM lơh is tềng bồ bơnơm Quế mŭt lơh broă, dong kờl Anih jơnau đơs Việt Nam tơnguh bơta niam, pờ ơnàng tiah geh jơnau đơs tàm tŭ tơmù uă ngan khà priă atbồ mờ lơh broă ală bơta phan tàm anih lơh broă, cèng jơnau đơs bơh Đảng mờ Dà lơgar bơh cấp ủy, gơnoar atbồ càr Quảng Nam tus mờ gal làng bol kòn cau ală kơnhoàl hờ đah măt tơngai mŭt càr Quảng nam mờ ală càr rềp bal.

Cau mblàng Ndong Brawl