VOV4.K’ho- Drim do, ngai 24/3, mut pơrjum dơ̆ 11, Quốc hội khóa 14. Tổng Thư ký Quốc hội, ồng Nguyễn Hạnh Phúc pà git, nàng gàr ring bal tàm broă lơh kuang bàng bơh Đảng, dà lơgar, Quốc hội geh lời 7 ngai nàng sền sơ wì, pồ tơl 2, 3 gơnoar broă đơng lam bồ tờm ngan bơh Đảng, dà lơgar dê. Quốc hội dơ̆ do mìng pồ tơl 2, 3 gơnoar broă đơng lam bồ dà lơgar, ờ di pồ tơl jơh mờ do là broă pồ tơl ai khóa 14 in. Tơnơ̆ dơ̆ tĕ khà geh lơh, tus nhai 7 nam do, Quốc hội geh pơn jat tai pồ tơl kuang bàng ai khóa 15 in mờ broă yal bơr at gơnoar broă geh lơh bè ờs jat jơnau sồr.

Kờp dŭ tàm dơ̆ pơrjum do, Quốc hội geh bơyai lơh tơn jơh at gơnoar broă 2, 3 gơnoar broă đơng lam bồ tờm ngan bơh Đảng, dà lơgar dê mơkung pồ tơl kuang bàng ala nàng at ală gơnoar broă do mờ broă lơh đùh sră ndơp. Bal mờ hơ̆, Quốc hội kung pồ tơl, tơn jơh at ală gơnoar broă đơng lam bồ ală anih lơhbroă dà lơgar, geh: Phó Chủ tịch lơgar, 2, 3 nă Phó Chủ tịch Quốc hội mờ Chủ nhiệm Ủy ban bơh Quốc hội dê, Tổng Kiểm toán dà lơgar, Tổng Thư ký Quốc hội, 2, 3 nă Phó Thủ tướng, Bộ trưởng mờ kuang bàng ndai bơh Chính phủ dê. Bơdìh hơ̆ tai, Quốc hội geh tơn jơh at gơnoar broă, pồ tơl Chủ tịch Mpồl duh broă tĕ khà dà lơgar.

Cau mblàng K’Duẩn