VOV4.K’ho - Geh bal tàm mpồl broă chờ gờm 90 nam ngai crơng gơs càr Gia Lai, Drà ràng tơlik phan kă bro mờ yal phan OCOP tiah Tây Nguyên-Gia Lai mờ cri bơyai broă kă bro mpồl lơh sa kă bro lơgar Nhờk là broă lơh kwơ màng nàng tơnguh broă tơrbŏ bal broă lơh, tơnguh bơtàu drà kă bro phan mờ yal ală phan OCOP, phan geh lơh bơh broă lơh sa mờ măi mŏk ƀòn lơgar geh pơnrơ ngan, phan bơkah krơi is tus mờ cau ngui sa.

                                      Ală bơta phan OCOP càr Gia Lai dê tàm dơ̆ ràng tơlik

Tus bal ràng tơlik phan tàm dơ̆ ràng tơlik drà kă bro, hìu kă bro Phạm Thị Bình (kis tàm ƀòn Ó, xã Ia Vê, kơnhoàl Chư Prông, càr Gia Lai yal phan “Ce plang cañ Nam Phúc”. Mò Phạm Thị Bình pà git, phan do neh ai geh sră dờp OCOP 3 sơrmañ kấp càr nam 2021. Mờ khà priă tăc di pal mờ phan geh kwơ tus mờ bơta pràn kơl dang să jan, den tàng phan geh uă cau năc tus sền mờ blơi. “Drà ràng tơlik nam do bơyai lơh di pal ngan, broă rơndăp phan kă bro, ală bơta gŏ niam măt ngan, ƀuơn ngan ai ală cau in sền, ală kông ty. Tus bal drà ràng tơlik dơ̆ do añ gơlơh geh bơta niam nàng yal phan geh lơh tus mờ ală bơyô tàm càr mờ càr ndai in git tus mờ phan geh lơh añ dê. Kung geh ờ uă cau sền gròi den tàng tàm ală ngai do ală cau kung blơi sùm, geh ală cau tus dùl dơ̆ blơi phan geh lơh rê cèng ngui, den tus ngai tơnơ̆ tus tai blơi tai 2, 3 bơta phan”.

Drà ràng tơlik neh ai tơl bơta niam nàng ală mpồl lơh sa kă bro, hợp ták xã mờ ală tiah yal khà măt kă bro, jòi geh anih lơh broă bal, pờ ơnàng drà kă bro, dong kờl cau ngui in geh tìp mờ ală bơta phan bal mờ broă lơh drơng ala geh bơta niam uă. Geh gal mpồl lơh sa kă bro tàm càr mờ bơdìh càr Gia Lai tus bal ràng tơlik, yal măi mŏk, phan lơh sa mờ măi mok, lơh sa suơn sre, ală phan lơh broă drơng ala geh bơta niam uă. Ồng Dương Minh Tú, kwang bàng lơh broă tàm anih bơto pơlam broă lơh sa mờ măi mŏk bal mờ hòi jà kă bro càr Quảng Ngãi pà git: “Tus mờ drà ràng tơlik dơ̆ do, mpồl bơh Sở Kông thương càr Quảng Ngãi cèng tus tàm do 20 bơta phan OCOP mờ phan geh lơh bơh broă lơh sa suơn sre ƀòn lơgar geh pơnrơ kấp dà lơgar dê. Geh pơnrơ ngan bè poăc kơnrồ ro, sơdàng trŭp, tỏi Lý Sơn, ka bò dềt, mạc ña... bơh ală ngai pa do, añ gŏ là làng bol kờñ ngan mờ ală phan bè OCOP, tàm hơ̆ uă ngan là ală phan geh is bơh ù tiah dê, geh ală cau tus blơi dùl dơ̆, hơ̆ sồng gam tus tai blơi dơ̆ 2, dơ̆ 3”.

                                                        Yal phan OCOP cau năc tus sền in

Drà ràng tơlik phan kă bro mờ yal phan OCOP tiah Tây Nguyên-Gia Lai geh broă lơh 250 hìu ràng tơlik mờ ală phan OCOP, phan geh is, phan geh lơh bơh broă lơh sa mờ măi mŏk ƀòn lơgar geh pơnrơ càr Gia Lai dê mờ ală càr, ƀòn dờng tàm gùt lơgar bè kơphe, tiêu, măk ka, dà lơwe, tỏi, trầm hương, dà màn... Bi Trần Hoài Nam, cau nă tus sền drà ràng tơlik đơs: “Dơ̆ do gŏ càr Gia Lai geh lơh niam ngan, drà ràng tơlik uă bơta, tơl ală bơta phan. Làng bol tus tàm do geh sền ƀlàng dờng, mờ geh sền phan kă bro, blơi phan, phan geh uă bơta ƀuơn ngan, khà priă di pal. Bơh ală kông ty, phan tàm do geh lơh niam măt ngan, di nùs ngan. Kơ̆p kờñ càr Gia Lai bơyai lơh uă rơlao ală dơ̆ bè do nàng hòi jà geh cau năc nhơl chờ tàm càr mờ càr ndai kung bè tàm lơgar bal mờ lơgar bơdìh”.

Ồng Phạm Văn Binh, Kwang atbồ Sở Kông thương càr Gia Lai pà git: Geh uă bơta, phan geh is bơh ală bơta phan là bơta tờm ngan mờ kwơ màng tàm broă hòi jà kă bro dơ̆ do pơgồp bal mờ broă kă bro, tơrgùm bal lơh sa mờ dunia. Bơh tŭ hơ̆, ai geh bơta niam ală mpồl lơh sa kă bro, hợp ták xã, hìu lơh sa kă bro càr Gia Lai, ală càr, ƀòn dờng mờ mpồl lơh sa kă bro lơgar Nhờk geh dơ̆ niam nàng tìp bal, cri bơyai, jòi geh mpồl lơh broă bal, tơnguh bơtàu drà kă bro. Mờ bơh dơ̆ do, yal geh bơta geh, bơta pràn , yal khà măt phan kă bro bơh ală càr, ƀòn dờng, ală mpồl lơh sa kă bro mờ ală cau bơcri priă-hòi jà kă bro mờ cau năc. “Ală mpồl lơh sa kă bro bơh lơgar Nhờk geh sền gròi ngan tus mờ ală bơta phan geh lơh bơh broă lơh sa suơn sre càr Gia Lai dê bè dà lơwe, poăc kơnrồ 1 tơngai, măk ka mờ uă bơta phan ndai, tàm hơ̆ uă ngan là kơphe. Ală mpồl lơh sa kă bro lơgar Nhờk kung gam gŏ bơta geh càr Gia Lai dê bè broă hòi jà bơcri priă. Tơnơ̆ mờ dơ̆ ràng tơlik do den bol añ kơ̆p kờñ mpồl lơh sa kă bro lơgar Nhờk geh tus bơcri priă tàm càr Gia Lai. Mìng is gah Kông thương geh ai tơl ală bơta niam, dan mờ UɃÑZ càr lam sồr tus tàm ală tiah lơh sa, mpồl lơh sa mờ măi mok nàng chồl pràn broă tơnguh bơtàu lơh sa”.

Broă lơh phan OCOP là broă tơnguh bơtàu lơh sa tiah ƀòn lơgar jăt broă tơnguh bơtàu tàm dơlam is mờ lơh gơguh bơta kwơ. Broă tơrgùm bal bơh phan OCOP tiah tàm gùl lơgar mờ Tây Nguyên tàm càr Gia Lai dơ̆ do neh geh dùl bơnah lơi ai gŏ geh bơnàng kơl jăp tàm broă bơ̆t bơtàu ƀòn lơgar tiah do dê.

Cau mblàng Ndong Brawl