Ƀòn Krông Hra, xã Yang Bắc neh geh tŭ là dùl tàm ală ƀòn rƀah lơ ời ngan bơh kơnhoàl Đăk Pơ, càr Gia Lai dê. Làng bol kòn cau Bahnar tàm tiah do mìng tam tờm chi lơyah ngai lơm, priă lơh geh ờ uă. Bulah bè hơ̆, bơh nam 2018, geh bơta bơto pơlam bơh gơnoar ătbồ mờ ală đảng viên tàm ƀòn dê, uă hìu làng bol neh tam gơl tus tam tàu bal mờ bă ù dờng. Mìng tơnơ̆ 6 nam, rài kis làng bol dê neh tam gơl loh làng. Bi Đinh Phới, dồ nă cau lơh broă sa tàm ƀòn Krông Hra, yal: Ù ngai sơlơ klàr den tàng làng bol geh gơnoar ătbồ bơto pơlam tam tàu nàng tơngguh cồng nha mờ priă lơh geh. Làng bol kòn cau Bahnar tàm do tŭ do cau lơi kung lơh sươn tàu, tơnhàu bàr pe nam pal tam pa wơl, priă lơh geh sùm. Nàng ai ù in niam rlau làng bol kung pal lùp bơsram mờng chài sền gàr, bơcri priă blơi phơng sih, bàr pe lồ tàu kung lơh geh priă jền bàr pe rơhiang tơlak đong. Hìu bơnhă añ kung neh tam tàu mờ tŭ do geh priă jền bàr pe rơhiang tơlak đong.

Ală ngai sơnrờp tus bal tam tàu, bi Phới bal mờ làng bol Krông Hra ờ pleh klàs jơnau gơlơh krơi ngan, ờ tơl bơta gĭt wă broă lơh sa sươn sre. Bulah bè hơ̆, geh bơta dong kờl, bơto pơlam bơh ală đảng viên tàm ƀòn dê, làng bol rơhời gĭt, sền gàr tàu ngai sơlơ niam rlau. Bi Đinh Thị Mại, Cau ătbồ Mpồl Cau ùr ƀòn Krông Hra, pà gĭt: Añ geh jàu drơng kơnòl broă hìu rƀah nàng dong kờl làng bol klàs rƀah, jàu lơh jăt ală broă jàu nàng tus bal bơ̆t bơtàu ƀòn lơgar pa. Añ hòi jà làng bol sền gàr chi tam phan ròng dipal, hòi jà oh mi cau ùr sền gàr tiah ơm kis, pơs wàs sàng goh pah ngai nàng ƀòn in geh sàng goh niam bơnĕ.

Bal mờ hơ̆, mờ jơnau đơs “kwang bàng đảng viên lòt lài, làng bol ƀòn lơgar jăt tơnơ̆”, Ci ƀộ ƀòn Krông Hra kung là krơh lam lài bè cồng nha pơrjum niam tàm ƀòn lơgar. Ồng Đinh Văn Việt, Phó Ƀí thư Ci ƀộ ƀòn Krông Hra, pà gĭt: Ci ƀộ lơh gơs niam kơnòl broă cíñ trị, geh cồng nha pơrjum niam; lơh jăt tam klăc, duh rơngòt adăt boh lam niam, mờ geh mpồl kwang bàng, đảng viên niam. Pơn jăt lơh jăt niam gơnoar broă hòi jà làng bol lơh jăt niam ală Jơnau lơh nền bơh Cíñ phủ dê, Jơnau sồr, Jơnau lơh nền tàm pơrjum Đảng dê ai ngui tàm rài kis nàng bơtàu tơngguh lơh sa kung bè bơ̆t bơtàu ƀòn lơgar pa.

Tŭ do, Đảng ƀộ xã Yang Bắc geh 13 Ci ƀộ, 205 nă đảng viên, tàm hơ̆ geh 8 ci ƀộ thôn, ƀòn. Kơnờm lơh niam broă lơh hòi jà, bơto pơlam mờ “ià tê sơñio broă” bơh mpồl kwang bàng, đảng viên, cau geh bơngă pin dờn dê, ală nam rềp ndo, làng bol ală thôn ƀòn neh gĭt ngui bơta jak chài tàm broă lơh sa, tam gơl rơndăp tăp sèng chi tam dipal gơ ai cồng nha lơh sa uă rlau. Lồi nam 2023, khà hìu rƀah xã Yang Bắc gơmù gam 14,4%, priă lơh geh kờp bal dồ nă cau geh rlau 35 tơlak 500 rbô đong dồ nam. Mò Phạm Thị Thúy, Ƀí thư Đảng ủy xã Yang Bắc đơs sùm: Broă lơh jăt Ci ƀộ 4 niam den Đảng ủy neh lơh tơn bơh bồ nam. Tŭ lam lơh jăt ală kơnòl broă bơ̆t bơtàu lơh sa- mpồl bơtiàn, sền gàr dà lơgar lơngăp lơngai, bơ̆t bơtàu ală anih lơh broă cíñ trị, bơ̆t bơtàu Đảng den Đảng ƀộ yal ai ală ci ƀộ in, jà ală kâp ủy tus nàng bơto pơlam bè pơrjum mìng dồ tơngume, broă rơndăp lơh lòt sền jăt sền, bơto pơlam loh làng ngan. Tus tơngai do, ală ci ƀộ neh cih măt dan lơh mờ Đảng ủy xã, jơh nùs lơh ngan lơh jăt ci ƀộ 4 niam tàm nam do.