VOV4.K’ho- Xã Đăk Sơ Mei (kơnhoàl Đak Đoa, càr Gia Lai) là tiah pôs đờng kăc màng tàm 2 dơ̆ tam lơh mờ ling lơgar Tây mờ ling lơgar Mỹ sò tơm, là ƀòn lơgar bơh cau khin cha jăk chài Wừu. Tơnơ̆ mờ 47 nam bơ̆t bơtàu, xã Đak Sơ Mei dùl rài gơtìp ƀồm mền, tŭ do neh cèng geh muh măt pa mờ ală gơl gùng geh dă mờ bêtông lòt gan tàm ală suơn kơphe, tờm chi sa plai bal mờ ală bă brê tam gam hòn gơs niam, ală ƀòn bal mờ hìu geh lơh dờng niam.

              Ồng Đinh Nhếp (nggui tàm gùl) là cau neh geh tŭ tus tam lơh mờ ling lơgar Mỹ sò tơm

Ồng Đinh Nhếp, kis tàm ƀòn Tul Doa neh geh tŭ là dùl nă cau ling tàm rài tam lơh mờ ling lơgar Mỹ sò tơm. Tàm hìu hờ đang wèt măt tus mờ suơn kơphe gam tàm tơngai lì bơkào, ồng yal bè ală ngai ling sò tơm Mỹ tus lơh aniai, ală cau tàm ƀòn pal lik mờ guh dô tus tàm bơnơm; yal bè cau khin cha jăk chài Wừu, là cau kòn xã Đăk Sơ Mei dê neh uă dơ̆ gơtìp ling sò tơm kŭp, pù pờng sồt jơh să bồ, mơya ồng dùl nùs đềt mềr mờ kăc màng; lam ling sò tơm tus tàm tiah geh ling lơgar he krăo lài nàng gơsơ̆t, mờ ồng gơtìp chơ̆t tài bơh phào crong ling sò tơm dê. Ồng kung yal bè ală nam nhai làng bol ƀòn lơgar sa bùm tung bùm lô, prăp phe sa nàng ròng cau ling, tus tàm tŭ ngai dà lơgar tơnklàs. Ồng Đinh Nhếp đơs tai: “Ngai lài hìu lơi geh 50 sơ̆ phe den ai kăc màng in 25 sơ̆, he lời 25 sơ̆, lơh geh ờ uă den he pà ờ uă, lơh geh uă den he pà uă. Làng bol sào sa glar bòl tài boh sa kung ờ geh, ƀòk ngòt mờ dà màn kung ờ geh, mìng sa nha chi brê, tơngai hơ̆ glar bòl ngan mơya he kung gam jăt Đảng, jăt Bác Hồ, jăt Đảng mờ kăc màng mơ, kal ke kàr lơi kung pal jăt”.

Săp đơs bơh ồng Đinh Nhếp chờ hờp ngan tŭ đơs tus bè ƀòn Tul Doa bal mờ gùt xã Đak Sơ Mei tŭ do tŭ gùng lòt neh lơh gơs, broă lòt rê geh niam. Cau kơnòm să geh bơsram jơh kấp 3, geh oh kòn gam mŭt bơsram đại học tai. Làng bol kis tàm ƀòn geh uă ngan cau neh git tam kơphe jăt mờ khà niam bơh dunia dê. Ù kơh den làng bol tam chi brê, ù niam den làng bol tam tai tờm pơnat, côm côm, sầu riêng... geh khà priă tàm broă lơh sa uă.

Làng bol kòn cau Bơnhàr kis tàm xã Đak Sơ Mei neh rơhời sơrlèt mờ kal ke brồ guh tơl ngui tơl sa mờ lơh gơs hìu dờng niam

Ồng Chrêng, Ƀí thư Đảng ủy xã Đak Sơ Mei pà git: tơnguh bơhiàn ờs mờng jăk chài bơh xã khin cha jăk chài dê, jơh ală mpồl lơh broă cíñ trị lam sồr làng bol tơrgùm tàm broă tơnguh bơtàu lơh sa, tơn jơh jơgloh tơmù rơƀah. Broă tam gơl phan tam bơh broă lơh mìr tus mờ broă tam phan jŏ tơngai, tờm chi sa plai... neh dong kờl rài kis làng bol tam gơl mhar ngan: “Là dùl xã kal ke kơnhoàl dê, xã tiah ngài, di gơlan gơtùi đơs là, khà tơnguh bơtàu di pal, rài kis lơh sa làng bol dê rơhời geh gơguh, khà hìu rơƀah ngai sơlơ gơmù, khà rài kis làng bol rơhời geh tơnguh. Lài ngan là kơnờm mờ broă sền gròi bơh Đảng mờ Dà lơgar, bơh kấp ủy mờ bơh ală mpồl lơh broă cíñ trị tàm xã dê mờ broă lơh ngan bơh làng bol dê nàng tơnguh bơtàu lơh sa, tơn jơh jơgloh tơmù rơƀah”.

Tàm ală tam gơl tơl ală bơta gam geh tàm xã Đak Sơ Mei, tam gơl bồ tơngoh kơlôi sơnơng, broă lơh, broă kis bơh làng bol, geh kwơ màng ngan. Jăt bi A Lanh Đinh Yôn, 37 sơnam kis tàm ƀòn Tul Doa yal, làng bol kòn cau Bơnhàr tŭ do ờ mìng git khoa họk kỹ thuật mờ gam git tàm broă kơlôi sơnơng bơcri priă tàm broă lơh sa, git tềm pềr bè lơi nàng geh kwơ. Bè hìu nhă bi, bơh tàm broă geh kàr lơi sa jơh kàr hơ̆, tŭ do neh prăp geh di pal mờ priă geh rơlao 200 tơlăk đong pah nam. Bi A Lanh Đinh Yôn yal tai: “Lài mờ tŭ sơn đờm lơh den he kung ờ git tàm broă mờng chài, mơya tơnơ̆ do geh ơdŭ bơto, xã lơh jăt broă bơto khoa họk kỹ thuật den he tus bal bơsram. Tơnơ̆ mờ hơ̆, he kung bơsram bal mờ ală cau gùt dar tai, ală suơn rềp bal geh mờng chài tàm broă lơh bè lơi den he bơsram bal tai. Đơs ngan là he ờ hềt jăk, mơya kung neh geh broă mờng chài, cau lơi kờñ bơsram den añ bơto mơ”.

Tàm ƀòn lơgar cau khin cha jăk chài Wừu, làng bol kis tàm do kung gam đơs bal là, ală broă mờng chài, bơta roh rui chơ̆t jê phi să bơh ồng pàng lài do dê là lời wơl nàng rài kis hờm ram he in tŭ do. Kòn cau Bơnhàr kis tàm ù tiah do gam lơh jăt ală broă lơh niam bơnĕ ngan, tam klăc bal, dùl nùs bơ̆t bơtàu ƀòn lơgar ngai sơlơ tơnguh bơtàu.

Cau cih Hoàng Qui-Cau mblàng Ndong Brawl