Tàm xã Ia Broăi, kơnhoàl Ia Pa, bi Kpă H'Bluyn, 34 sơnam, ƀòn Ia RNiu là dùl tàm ală cau bơsram làng bol jơi bơtiàn dồ ết nă cau tus bal mờ ơdŭ bơsram tam biăp sàng goh nam 2024. Bi pà gĭt, tàm mờr 2 nhai, bi neh lơh tờm geh broă lơh ndơ̆p bơh bơta chài lơh ù, sih phơng, lơh tờm tu kòp lơh aniai tus tăc bro phan bơna ai ală mpồl biăp sa nha, sa plai, sa kơnuh in. Bi Kpă H'Bluyn đơs:“Añ kung tus bal ơdŭ bơsram tam biăp, bơh tàm tŭ bơsram cau pơgru neh bơto ală bơta chài nàng ală oh mi in bơsram nàng tam ai hìu bơnhă he in sa. Tơnơ̆ do geh ù tiah den pờ ơnàng nàng tam phan kă bro mờ geh tai priă lơh geh nàng hìu bơnhă in geh priă jền kơ̆ kơl jăp”.

Tàm anih bơh he dê, bi Ksor Dêl 37 sơnam, ơm tàm ƀòn Blôm, xã Kim Tân, kơnhoàl Ia Pa gam mhar ngan yô tê nàng lơh niam wơl rơndeh òr ù ai làng bol tàm ƀòn in nàng di tŭ lòt tơnhào bùm ƀlàng tŭ mut tàm kàl tơnhào. Bi Ksor Dêl pà gĭt, lài do, bulah hìu bơnhă geh rơdeh  lơ òr mờ bồ rơndeh lơ òr drơng broă lơh broă sa mơya pah tŭ rơndeh gơtìp ờ niam, bi pal roh uă ngan tŭ tơngai mờ priă jền nàng jun tus ală xã rềp bal nàng lơh niam wơl. Sền gŏ jơnau kờñ geh ngan do, nam 2021, tŭ kơnhoàl pờ ơdŭ bơto broă lơh niam rơndeh lơ òr dềt, bi neh mhar ngan cih mat dan tus bal. Kơnờm geh bơta gĭt wă mờ bơta chài geh bơto, tŭ do bi Dêl neh pờ is anih lơh niam rơndeh drơng broă lơh sa tàm ƀòn tơn, drơng làng bol mờ priă lơh geh kơ̆ kơl jăp, is ồn uă rlau tàm kàl tơnhào phan tam. Bi Ksor Dêl đơs:“Pah tŭ mut tàm tơngai tơnhào phan tam, tŭ làng bol lòt tơnhào bùm blàng den rơndeh lòt gan tiah do kung uă mờ sùm gơtìp ờ diơng uă, tŭ hơ̆ làng bol cèng tus ai añ lơh niam wơl rơndeh. Ai bè ờs ờ mut tàm kàl tơnhào phan tam den ết ngan geh rơndeh  nàng lơh niam. Să tờm añ kung tài bơh kờñ ngan den hơ̆ sồng jat broă lơh niam rơndeh do den rơ̆p rềp mềr mờ gơ jŏ jòng”.

Tơngai bơh nam 2022 -2024, kơnhoàl Ia Pa neh pờ 15 ơdŭ bơto broă ai cau lơh broă gơwèt ală broă lơh jơnau kờñ Dà lơgar mờ mờr 350 nă cau bơsram là làng bol jơi bơtiàn dồ ết nă cau tus bal, mờ priă jền rlau 1 tơmàn đong, khà cau lơh broă geh bơto nam tơnơ̆ uă rlau mờ nam lài.

Jat ồng Lê Hữu Hưng, Củ tịc Anih duh broă làng bol xã Kim Tân, kơnhoàl Ia Pa, càr Gia Lai, 9 nhai nam 2024, xã neh pờ geh 3 ơdŭ bơto mờ 84 nă cau bơsram, tàm hơ̆ geh 2 ơdŭ bè broă lơh sa mờ 1 ơdŭ ờ di broă lơh sa. Ală ơdŭ bơsram geh làng bol lơh jat jơh nùs tài bơh bơta geh ngan mờ jat ngui uă tàm rài kis pah ngai dê. Ồng Lê Hữu Hưng, đơs: “Làng bol lơh jat mờ bơto broă, mờ hơ̆ là ơdŭ lơyah ngai mơya geh gơrềng tơn tus rài kis pah ngai bơh làng bol dê. Pơn yơu bè ơdŭ broă lơh sa bè tam phan den tŭ jơh bơsram làng bol neh ngui geh tơn. Ơdŭ ờ di broă lơh sa lơh niam măi mok, ală phan bơna broă lơh sa den làng bol neh lơh drơng ai hìu bơnhă in, bàr pe nă ơruh pơnu geh ală bơta den pờ anih lơh niam rơndeh măi mok nàng drơng broă làng bol tàm thôn, ƀòn in”.

Lơh jat Broă lơh jơnau kờñ Dà lơgar bè bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, bơh nam 2021 tus tŭ do, càr Gia lai neh pờ geh mờr 200 ơdŭ bơto broă ai cau lơh broă tiah làng bol jơi bơtiàn dồ ết nă cau in. Mìng is nam 2024, khà cau bơsram là làng bol jơi bơtiàn dồ ết nă cau geh bơto broă neh gơguh tus mờr 5 rơbô nă cau. Uă cau bơsram tơnơ̆ tŭ jơh khoă bơsram neh ngui geh cồng nha jơnau bơsram tàm bơta geh ngan tam phan, lơh ală broă lơh lơh sa cèng wơl priă lơh geh uă. Ồng Dương Mah Tiệp, Phó Củ tịc Anih duh broă làng bol càr Gia Lai, pà gĭt:“Lơh jat broă lơh jơnau kờñ Dà lơgar bè bơtàu tơnguh lơh sa mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, pah nam càr Gia Lai pờ ơdŭ bơto broă geh 1 rơbô 500 broă lơh. Is ồn là ală ù tiah tiah sar lơgar ngài den bol añ bơto bơtê jat mpồl. Jat tàm jơnau kờñ ală gah broă bơh làng bol dê den bơh dơ̆ bơto bơtê làng bol gơtùi lơh geh priă jền. Bol añ jat tàm ală bơta bè hơ̆ nàng pờ ală ơdŭ bơto bơtê mờ pah nam kung gam pờ ală ơdŭ bơto broă nàng di pal mờ bơta geh ngan”.

Digơlan gŏ, broă tơnguh uă bơta niam lơh broă ƀòn lơgar bơh bơto bơtê broă neh pơgồp pơnah sơlơ tơnguh tai lơh sa, tơnguh cồng nha lơh broă, tàm ntrờn rơndăp tăp sèng broă lơh mờ lơh jat geh cồng nha jơnau kờñ tơrmù rƀah kơ̆ kơl jăp, bơt bơtàu ƀòn lơgar pa bơh càr Gia Lai dê.