Tàm hìu pa niam bơnĕ ngan, bi Hiao, ơm tàm ƀòn Bông Phul, xã Chư Á, ƀòn dờng Pleiku ờ gơtùi mpồn geh bơta ngoh rơngăc. Bi yal, lài do hìu bơnhă pal kis tàm hìu lơh ing, kàl mìu càl rbŭt dờng ndrờm kơlôi rơcăng ờ suk ờ iang. Kơnờm bơta sền gròi bơh gơnoar ătbồ dê mờ priă bơcri bơh broă lơh tơrmù rƀah kơ̆ kơl jăp dê, bi neh geh đau dồ nơm hìu pa nàng kơ̆ kơl jăp rài kis mờ pin dờn brồ guh lik klàs bơh rƀah. Bi Hiao, đơs: Hìu añ rƀah, kal ke ngan. Hìu yau lơh neh jŏ rao, mìu ñhăt dà mìu sùh jơh, bĭc ờ gơtùi. Tŭ do geh dong kờl lơh hìu pa, añ iang nùs rlau, geh hìu pa rao.

Bal mờ hìu bơnhă bi Hiao, bơh nam 2021 tus tŭ do, Đảng ủy xã Chư Á neh đơng lam gơnoar ătbồ mờ mặt trận mpồl cau ngui jơh ală priă jền bơh broă lơh, rơndăp broă lơh dê. Ală priă jền dong kờl bơh priă tơrmù rƀah, kes priă “Tài cau rƀah” neh dong lơh hìu ơm ai 33 hìu bơnhă rƀah in mờ pà 64 nơm kơnrồ me dong ală hìu pa jơh rƀah bơtàu tơngguh lơh sa. Kờp tus tŭ do, xã Chư Á neh geh 16 hìu klàs bơh rƀah mờ 12 hìu klàs bơh pa jơh rƀah, gơmù khà hìu rƀah xã dê gơmù gam 39 hìu (geh tus 1,58%). Ồng Trương Văn Minh, Phó Ƀí thư Đảng ủy, Củ tịc Anih duh broă Làng bol xã Chư Á, yal: Tơngai tus, Đảng ƀộ mờ gơnoar ătbồ xã tơrgùm đơng lam làng bol ngui niam ală priă jền nàng lơh jăt jơnau kờñ gơmù rƀah bơh tŭ do tus nam 2025. Is ồn, broă lơh bơto broă ai cau lơh broă ƀòn lơgar in, ngan là tiah jơi bơtiàn dồ êt nă cau, dong làng bol geh broă lơh sùm, lik klàs rƀah kơ̆ kơl jăp. Pơnđơl tus nam 2025, xã rơ̆p ờ gam hìu rƀah tai.

Bơh nam 2021 tus tŭ do, ƀòn dờng Pleiku neh dong kờl lơh pa mờ lơh niam wơl 64 nơm hìu ai hìu rƀah in, mờ kờp jơh priă tă lơh rlau 3 tơmàn đong. Mờr 100 hìu rƀah mờ pa jơh rƀah neh geh càn priă dong kờl nàng bơtàu tơngguh lơh sa, mờ khà priă rlau 4 tơmàn 600 tơlak đong. Tŭ do, ƀòn dờng mìng gam 149 hìu rƀah, ndrờm mờ 0,24%. Khà hìu rƀah tàm làng bol jơi bơtiàn dồ êt nă cau kung gơmù pràn bơh 2,94% nam 2021 gơmù gam 1,29%. Đòm jăt ală cồng nha neh lơh geh, Thàñ ủy ƀòn dờng Pleiku rơ̆p pơn jăt tai sồr ală tiah pơgồp bal ală priă jền, săc rwah ală broă lơh dong kờl geh cồng nha, dipal mờ tơl mpồl cau. Mò Nguyễn Thị Thúy Diễm, Phó Ƀí thư Đảng ủy, Củ tịc Anih duh broă Làng bol xã Diên Phú, ƀòn dờng Pleiku, pà gĭt: Bol hi pơn jăt tai geh broă rơndăp lơh dong kờl hìu rƀah tơngai pa nam 2025; tơngguh uă priă lơh geh ai làng bol in, gàr niam ală cồng nha lơh geh tàm broă lơh tơn jơh jơgloh tơrmù rƀah tàm tơngai do mờ lơh niam rlau tai tàm tơngai tus.

Ồng Nguyễn Thanh Bình, Phó Củ tịc Anih duh broă Mặt trận Dà lơgar Việt Nam ƀòn dờng Pleiku pà gĭt, tơngai tus mặt trận lòt bal mờ Đảng ƀộ, gơnoar ătbồ ƀòn dờng Pleiku tàm broă lơh jăt broă lơh jơi bơtiàn mờ tơrmù rƀah kơ̆ kơl jăp. Ồng Nguyễn Thanh Bình, đơs: Tơngai tus, Anih duh broă Mặt trận Dà lơgar Việt Nam ƀòn dờng mờ ală mpồl cau, ală gah rơ̆p pơn jăt tai pơgồp bal, lơh pràn broă lơh mblàng yal, hòi jà làng bol lơh jăt niam ală dơ̆ hòi jà mờ srơh tàm pơrlòng kờñ gơboh dà lơgar gơ jăt bal mờ ală broă lơh jơnau kờñ tơrmù rƀah kơ̆ kơl jăp, tơngguh uă bơta niam rài kis làng bol dê tàm ală ƀòn làng bol jơi bơtiàn dồ êt nă cau.

Ală cồng nha pơnrơ ngan tàm broă lơh tơrmù rƀah kơ̆ kơl jăp tàm Pleiku, càr Gia Lai pà gŏ gơnoar broă đơng lam tơl làm, jơh nùs jơh tồr bơh mpồl đảng dê neh lơh geh bơta gơn kơnờm dong làng bol, is ồn là làng bol jơi bơtiàn dồ êt nă cau brồ guh klàs rƀah, wèt tus rài kis tơl ngui tơl sa mờ bơtàu tơngguh kơ̆ kơl jăp.