VOV4.K’ho - Uă nam do, làng bol kis tàm ală xã Ea Mnang, Quảng Tiến mờ thị trấn Quảng Phú, kơnhoàl Cư̆ Mgar, càr Dăk Lăk pal gơtìp mờ bơta ƀơ̆ ƀô bơh ƀlàng tuh siồ siă Dăk Ánh, xã Quảng Tiến. Bŭ lah kơnhoàl Cư̆ Mgar neh ai ù nàng ntrờn, mơya tài ờ geh priă lơh, den tàng rơndăp broă lơh ƀlàng tuh siồ siă pa kung gam “ờ hềt geh lơh”. Ờ ntrờm gơtùi ƀlàng tuh siồ siă, làng bol gam pal kis tàm bơta ƀơ̆, ală xã den gơtìp kal ke kờñ geh khà broă bè tiah kis tàm broă bơ̆t bơtàu ƀòn lơgar pa.

                       Pah ngai geh bơh 40 tus 45 tấn siồ siă tàm ƀlàng tơrgùm siồ siă Đăk Ánh

Gùng Phan Bội Châu tơrbŏ bal tiah tàm gùl thị trấn Quảng Phú mờ ală xã Ea Mnang mờ Quảng Tiến jòng mờr 2 kơi sồ. Tàm tiah ngài mờ thị trấn Quảng Phú 800 thơ̆k, geh ƀlàng tuh siồ siă Dăk Ánh, rềp tơn tềng gah gùng mờ neh geh tàm uă nam do. Lŏ Nguyễn Thị Hà, kis tàm xã Ea Mnang yal, pah ngai geh mờr jơ̆t nơm rơndeh pơn diang siờ siă bơh thị trấn Quảng Phú, thị trấn Ea Pốk mờ ală xã Quảng Tiến, Ea Mnang, Ea Mdroh... tus tuh siồ siă. Siồ siă geh tuh uă hơ̆ sồng chu, tơnơ̆ mờ hơ̆ bồr tơ̆p. ală ƀòn kis gùt dar gơtìp ƀô ƀơ̆ bal mờ ñhŭ lơh aniai uă ngan tus mờ bơta pràn kơl dang să jan. Lŏ Nguyễn Thị Hà ờ sŭk ơm đơs: “Añ mờng lòt gan tềng gùng do, cau chu siồ siă, sơbì siồ siă uă ngan, lơh ñhŭ ƀơ̆ lơh aniai uă ngan. Ƀô ƀơ̆ uă, mờ ñhŭ lơh aniai tus mờ bơta pràn kơl dang să jan làng bol. Uă tŭ geh càl khồm, geh bal siồ siă par tus tàm suơn bal mờ tàm hìu làng bol. Đơs ngan là ƀơ̆ ngan”.

                     Siồ siă tàm ƀlàng tơrgùm siồ siă Đăk Ánh, xã Quảng Tiến, kơnhoàl Cư̆ Mgar

Ƀlàng siồ siă Dăk Ánh geh lơh tàm xã Quảng Tiến, ơnàng di pơgăp 1 lồ, geh lơh bơh nam 1997. Tŭ do tài Kông ty ù tiah niam tiah kis ƀòn drà Cư̆ Mgar atbồ, lơh broă. Pah ngai geh bơh 40 tus 45 tấn siồ siă bơh tàm rài kis cèng tuh tàm do. Siồ siă mìng geh lơh mờ broă chu, tơnơ̆ mờ hơ̆ bồr tơ̆p, ờ tơl kloh niam tàm tiah kis. Bă ù bồr tơ̆p neh jơh, siồ siă pơn diang tus ờ geh tiah nàng tuh tai, geh tŭ gơlik tus tàm gùng lòt, lơh ờ niam tus mờ tiah kis làng bol dê.

Mò Nguyễn Thị Thanh Vân, Phó Củ tịc UɃÑZ xã Quảng Tiến pà git, ƀlàng tuh siồ siă do ờ gam di pal mờ rơndăp broă geh ai bal bơh xã dê tai, dùl bơnah geh ai rơndăp broă lơh gơs ù lơh hìu ơm. Di lah ờ ntrờn gờñ, làng bol kung gam pal gơtìp mờ bơta ƀơ̆, mờ khà broă bè tiah kis tàm broă bơ̆t bơtàu ƀòn lơgar pa tơnguh uă bơh xã dê kung gơtìp kal ke nàng lơh gơs. “Xã Quảng Tiến neh uă dơ̆ lơh sră dan mờ UɃÑZ kơnhoàl nàng dan ntrờn ƀlàng tuh siồ siă tus tàm tiah di pal, mờ kơnhoàl kung neh dờp ai geh tiah ndai nàng ntrờn, mơya tus tŭ do ờ hềt gơtùi ntrờn sơl. Tềng đăp măt, xã pơn jăt tai dan mờ UɃÑZ kơnhoàl đơng lam Kông ty tiah kis niam ƀòn drà kơnhoàl Cư̆ Mgar tơrgùm, lơh kloh siồ siă niam nàng gàr niam tiah kis ai làng bol in”.

                                      Siồ siă tuh tàm gùng lòt lơh ƀơ̆ tus tàm tiah kis

Ồng Lê Nam Cao, Củ tịc UɃÑZ kơnhoàl Cư̆ Mgar pà git, broă ƀlàng tuh siồ siă Dăk Ánh tàm xã Quảng Tiến uă nam lơh gơtìp ƀơ̆ tàm tiah kis, lơh aniai uă ngan tus mờ rài kis làng bol, kơnhoàl neh git jơnau do. Mờ neh dờp jơnau dan bơh UɃÑZ xã Quảng Tiến bè broă ntrờn ƀlàng tuh siồ siă lik bơdìh ƀòn ơm kis, tus tàm tiah di pal. Kơnhoàl neh ai tiah pa ơnàng rơlao 10 lồ, tàm xã Ea Mdroh nàng ntrờn. Mơya, tàm rơndăp broă ngui priă di mơ tơngai bơh kơnhoàl dê den ờ hềt geh ai, broă lơh ờ hềt geh lơh sơl. “Tàm rơndăp broă di mơ tơngai bơh tŭ do tus nam 2025 den ờ hềt geh ai priă bơcri nàng ntrờn ƀlàng tuh siồ siă pa. Den tàng broă lơh tŭ do den ai broă cò ù, chu, bồr tơ̆p nàng tơmù bơta ƀơ̆; pah nhai den sồr kông ty pơs wàs kloh niam tiah kis lơh kloh jăt gah nàng gàr niam gùng lòt bal mờ ƀòn lơgar, tiah kis. Kơnhoàl kung neh geh gùng dà ai mpồl bơtiàn lơh bal nàng hòi jà bơcri priă, mờ neh hòi jà geh, mơya gah broă do kal ke tài ờ cèng geh bơta kwơ lơi, ờ geh mpồl lơh sa kă bro lơi khin bơcri priă. Tŭ do mìng kơ̆p priă bơcri bơh Dà lơgar mơ”.

Ờ hềt git tus tàm tŭ lơi hơ̆ sồng geh priă nàng ntrờn ƀlàng tuh siồ siă Dăk Ánh tàm xã Quảng Tiến, kơnhoàl Cư̆ Mgar tus tàm tiah pa nàng gàr kloh niam tiah kis. Nàng tơmù bơta ƀơ̆, mpồl lơh broă atbồ pal geh ală gùng dà broă lơh niam tàm broă tuh, tơrgùm siồ siă; lơh kloh siồ siă; mờ chồl pràn broă lam sồr làng bol tuh siồ siă di tàm tiah geh ai.

Cau cih Tuấn Anh- Cau mblàng Ndong Brawl