VOV4.K’ho - Dăk Bu So là xã tiah nhàr dà lơgar gơwèt kơnhoàl Tuy Đức, dùl tàm 2 kơnhoàl rơƀah ngan càr Dăk Nông dê geh dờp broă lơh 30a bơh Cíñ phủ. Tŭ do làng bol ală kòn cau kis tàm tiah nhàr dà lơgar do gam dùl nùs bal tơnguh bơtàu lơh sa mpồl bơtiàn, lơh ngan nàng Dăk Bu So gơs xã sơnrờp ngan kơnhoàl dê geh khà ƀòn lơgar pa.

                                                   Ƀòn Bu Ndrung, xã Dăk Bu So

Tàm hìu geh lơh dờng mờ niam, ồng Điểu Gay, kis tàm ƀòn Bu Ndrung, xã Dăk Bu So, kơnhoàl Tuy Đức chờ hờp wă năc. Là cau lam lài tàm broă lơh sa tiah nhàr dà lơgar, ồng yal, tŭ do sơnam neh kra, bơta pràn să jan mờ gam tai nàng lòt lơh broă, den tàng ồng neh tam pà jơh bă suơn kơphe ai ală oh kòn in, tơl nă geh 2 lồ. Tŭ do ồng pơn jăt tai pơgồp bal mờ ală gah, mpồl lơh broă tàm ƀòn nàng lam sồr làng bol bañ lời cau ờ niam bơchồt, ờ tăc ù mờ pal bơsram broă tam kơphe, tiêu nàng geh cồng nha uă, lơh ngan lơh broă sa nàng klàs mờ rơƀah, kal ke. “Mùl màl den rài kis làng bol kòn cau Mnông kis tàm ƀòn Bu Ndrung do gam uă kal ke ngan, làng bol git wă ờ uă, broă tơnguh bơtàu lơh sa kung kal ke. Jăt añ kơlôi, lơh ală oh mi kòn cau Mnông kis tàm ƀòn Bu Ndrung, Bu Boong bol añ do ndrờm geh bal dùl nùs nhơm mơ, bơh kwang bàng jơh ală kấp pal lam sồr làng bol hơ̆ sồng di, mìng is dùl nă añ cau neh kra lam sồr, bơto bơtê den ờ hềt tơl pràn. Lam sồr làng bol den pal pơgồp bal mờ broă lơh, làng bol gŏ geh cồng nha den geh dờn mờ đờm jăt bal”.

                      Xã Dăk Bu So lơh ngan là xã ƀòn lơgar pa sơnrờp ngan kơnhoàl Tuy Đức dê

Jăt bi Điểu Lim, kwang atbồ ƀòn Bu Boong yal, bơta kal ke bơh làng bol là lơh sa suơn sre bè kơphe, tiêu gơrềng uă ngan tàm khà priă tàm drà kă bro. Bŭ lah bè hơ̆, mờ broă bơcri priă bơh dà lơgar bal mờ broă tus bal dùl nùs bơh làng bol, broă lơh phan bơna tàm tiah nhàr dà lơgar do neh lơh gơs, rài kis làng bol kòn cau Mnông kung ngai sơlơ gơguh sơl. “Broă lơh gùng lòt tàm ƀòn, tơn jơh jơgloh tơmù rơƀah ai làng bol in là dùl tàm ală jơnau kờñ bơ̆t bơtàu ƀòn lơgar pa, bơh tŭ hơ̆ tơnguh uă rài kis làng bol geh tơnguh bơtàu rơlao. Nàng lơh geh jơnau kờñ do, làng bol pal tam klăc bal, dong kờl bal tàm rài kis, bơh broă lơh gùng lòt tàm ală ƀòn, tus mờ broă tơnguh bơtàu lơh sa suơn sre, tam tiêu, kơphe, dong kờl ală hìu rơƀah gơtìp kal ke...”.

Bơta geh pơnrơ ngan tàm broă bơ̆t bơtàu ƀòn lơgar pa tàm xã Dăk Bu So là làng bol neh git rơhời tơnguh geh bơta pràn bè bơta niam chài rơgơi kòn cau dê nàng pờ gùng lơh sa, drơng cau năc nhơl chờ. Mò Phạm Thị Dung, kwang atbồ ƀòn Bu Ndrung pà git, ƀòn neh crơng gơs geh mpồl lơh broă ờs mờng, ờ mìng bơsong broă lơh tŭ ru mờ gam ai tai priă geh làng bol in. “Tàm ală nam do, bol añ kung gam geh sùm mpồl dròng cing mồng, mờ crơng gơs geh mpồl lơh broă nàng ƀĕ tơrnờm, ai geh broă lơh ală oh mi cau ùr tàm ƀòn in, hơ̆ sồng ală cau kra den tàñ phan, ală cau ùr den tàñ ồi yau. Kung lơh ngan nàng prăp gàr mờ tơnguh geh ală bơta niam chài rơgơi ờs mờng mờ broă lơh ờs mờng làng bol kòn cau Mnông dê”.

Ồng Ngô Văn Thương, at ing gơnoar Củ tịc UɃÑZ xã Dăk Bu So pà git, tus tŭ do, xã neh geh 16 tàm 19 khà broă ƀòn lơgar pa. Rài kis làng bol ngai sơlơ gơguh, priă tàm nam 2021 geh 40 tơlăk đong tàm 1 nă cau. Chồl pràn broă lơh jăt ală broă kờñ dà lơgar dê, tơrgùm ai lài ală ƀòn làng bol kòn cau, dong kờl làng bol tơnguh uă cồng nha lơh sa là gùng dà broă lơh nàng xã Dăk Bu So lơh ngan là xã sơnrờp ngan tàm tiah nhàr dà lơgar Tuy Đức do dê geh khà broă ƀòn lơgar pa tàm 3 nam tus. “Xã geh 2 ƀòn mờ 1 thôn gơwèt kal ke. Tàm broă tơmù rơƀah den bal mờ broă lam sồr làng bol, priă geh bơh dà lơgar, bơh ală broă lơh ai geh den kung ai lài nàng ală ƀòn do in, nàng dong kờl làng bol tơnguh bơtàu lơh sa. Lài ngan là bơto kỹ thuật tàm broă tam phan, dơ̆ bàr là bơcri priă lơh ală broă, dơ̆ pe là bơcri priă lơh ală broă lơh sa nàng lơh geh uă, tơnguh uă bồ tơngoh git wă geh kơnòl bal mờ rơhời tơnguh uă rài kis làng bol, tàm hơ̆ uă ngan tàm ală ƀòn tờm tàm broă tơmù rơƀah kơnhoàl dê”.

Pin là mờ broă bơcri priă geh tơrgùm bal bơh dà lơgar dê, broă lơh ngan sơrlèt mờ kal ke bơh làng bol ală kòn cau, xã Dăk Bu So geh gờñ geh 19 khà broă bơ̆t bơtàu ƀòn lơgar pa, là xã sơnrờp ngan kơnhoàl Tuy Đức dê geh khà ƀòn lơgar pa.

Cau mblàng Ndong Brawl