VOV4.K’ho- Ƀan Thường vụ Tỉñ ủy Dăk Lăk pa bơyai lơh Pơrjum tơn jơh 10 nam lơh jăt Kơrnoăt sồ 03 mờ lam lơh jăt Kơrnoăt sồ 08 bơh Tỉñ ủy dê bè bơ̆t bơtàu ƀòn lơgar pa. Bơh 10 nam mờ bơta lơh bal bơh jơh ală anih lơh broă cíñ trị dê bơh càr tus xã, kwơmàng là bơta dùl nùs bal bơh làng bol tàm càr dê, Dăk Lăk neh lơh geh uă cồng nha kwơmàng tàm bơ̆t bơtàu ƀòn lơgar pa.

Kwang đơng lam bồ càr Dăk Lăk còp cơldŭ ràng tơlik phan bơna pơnrơ is bơh càr dê

Dăk Lăk lơh ngan tus nam 2025 geh rlau 65% khà xã geh tơl khà ƀòn lơgar pa; geh 4 tàm 15 anih kâp kơnhoàl geh tơl khà ƀòn lơgar pa, tàm hơ̆, geh bơh 1 tus 2 anih kâp kơnhoàl geh tơl khà ƀòn lơgar pa gơguh jơnhoa; priă lơh geh kờp bal dùl nă cau bơh làng bol ƀòn lơgar dê gơguh 1,3 dơ̆ pơndrờm mờ nam 2020; geh 200 phan bơna OCOP geh pà sră cơng tàng geh bơh 3 sơrmañ rlau hơđang. Nàng lơh geh jơnau kờñ do, Tỉñ ủy Dăk Lăk sồr ală kâp ủy đảng sền swì bơtàu tơnguh lơh broă sa sươn sre, ƀòn lơgar, cau lơh broă sa là kơnòl broă lài ngan bơh ală anih lơh broă cíñ trị dê mờ kơnòl bơh jơh gùt mpồl bơtiàn dê; tơnguh rlau tai bơta gĭt wă, tam gơl pa bồ tơngoh kơlôi sơnơng tàm bơtàu tơnguh lơh broă sa sươn sre, ƀòn lơgar, cau lơh broă sa tàm bơ̆t bơtàu ƀòn lơgar pa.

Cau mblàng Lơ Mu K’Yến