VOV4.K’ho - Làng bol kis tàm kơnhoàl Cư̆ Mgar, càr Dăk Lăk gam ờ sŭk ngan tŭ gùng càr 8, gơl lòt gan tềng xã Cư̆ Kpam pa geh bơcri priă lơh niam wơl, mơya neh gơtìp tơrlah, gơlik geh uă bơtô dờng bơtô dềt tàm gùng, lơh gơtìp ờ niam tus mờ cau lòt tàm gơl gùng do dê. Bal mờ hơ̆, broă ai lơh mờ lơh gùng geh ală bơta kal ke, lơh gơl gùng do sơlơ ngòt rơngơ̆t tus mờ cau lòt tàm gùng dê.

            Măt gùng tŭ do cài neh gơtă, lơh gơs ală bơtô di gơlan gơtìp rềs àr, tàm hơ̆ uă ngan là ŭ trồ mang

Gùng càr 8 gơl lòt gan xã Ea Kpam, kơnhoàl Cư̆ Mgar tàm uă nam do sùm gơtìp tàm bơta tơrlah, ờ niam, lơh broă lòt rê gơtìp kal ke. Nam 2021, gơl gùng do geh Sở Giao thông Vận tải càr Dăk Lăk kĭ lơh rơndăp broă lơh niam wơl. Mờ tus lồi nam den broă lơh wơl gơl gùng do geh lơh gơs. Bơta chờ ờ hềt jŏ, làng bol kis rềp tàm tiah do neh geh nùs nhơm ờ sŭk ngan tài gơl gùng neh gơtìp tơrlah, ờ niam, gơlik geh uă ngan bơtô dềt, bơtô dờng. Dùl nă làng bol kis tàm ƀòn 1, xã Ea Kpam pà git, gơl gùng do gơtìp tơrlah tơn tơnơ̆ mờ tŭ geh lơh gơs mờ di gơlan gơtìp uă ngan rềs àr, tàm hơ̆ uă ngan tŭ trồ mang: “Kal ke ngan, lơh gơs ờ jŏ den lơh tàm tiah lài den tiah tơnơ̆ gơtìp tơrlah, tŭ do geh uă ngan bơtô, lơh wơl tai git nđờ dơ̆ mơya kung gam bè hơ̆ sơl. Trồ mang cau lòt tàm gùng ờ gŏ gùng gơtìp tơrlah den gơtìp rềs àr. Bè tŭ do di lah gơtìp ờ bơtoah gơpừ den mìng chơ̆t ờ gŏ gơtùi kis ờ”.

            Làng bol kis tàm xã Ea Kpam ờ sŭk ngan tŭ gùng pa bơcri priă lơh gơs neh gơtìp  niam

Ồng Nguyễn Hữu Chung, Phó Củ tịc UɃÑZ xã Ea Kpam pà git, gùng càr 8 pa geh bơcri priă lơh neh gơtìp tơrlah, lơh làng bol kis tàm xã do ờ sŭk ngan. Uă dơ̆ gơtìp rềs àr kung gơtìp tàm tŭ trồ mang tŭ làng bol đì rơndeh Honda lòt gơtìp dùh tàm bơtô tàm gùng. Làng bol kung neh uă dơ̆ geh jơnau đơs tus mờ ală kấp geh gơnoar sơl, tàm hơ̆ uă ngan tàm ală dơ̆ pơrjum tìp mờ cau tĕ khà bơh Kwang bàng Quốk hội bal mờ Hội đồng Ñân zân ală kấp. Mơya, tus tŭ do gơl gùng do kung gam ờ hềt geh lơh niam wơl, lơh broă lòt rê bơh làng bol dê di gơlan gơtìp uă ngan rềs àr: “Gùng neh gơtìp ờ niam den lơh gơtìp rềs àr uă ngan bloh. Di lah lài do neh gơtìp tơrlah ndrờm bal, làng bol git gùng neh ờ niam den lòt tàm gùng geh rơcang lài. Tàm bơta do cau lơi neh mờng lòt tàm gùng do den git, di lah geh bơtô dờng den lòt ờ hoan ngòt rơngơ̆t, mơya bơtô dềt do jrô, lơh gơtìp ờ mờng gùng ntoăt tus là ờ gơtùi măi tơn”.

Lơh rơndăp broă lơh niam wơl gùng càr 8, gơl lòt gan kơi sồ 12+300 tus kơi sồ 4+950 jòng rơlao 2 kơi sồ 400 thơ̆k geh Sở Giao thông Vận tải càr Dăk Lăk kĭ lơh tàm nhai 4 nam 2021 mờ kờp jơh khà priă 9 tơmàn đong. Mpồl bơto pơlam lơh là Kông ty TNHH bơcri priă APP Việt Nam, gam mpồl lơh gùng là Kông ty TNHH Nam Sơn.

Gơrềng tus mờ gùng càr 8 gơtìp tơrlah, tàm nggùl nhai 7 pa do, UɃÑZ kơnhoàl Cư̆ Mgar kung neh geh sră nggal pơyoa tus Sở Giao thông Vận tải càr Dăk Lăk nàng hòi jà bơsong ờ uă broă gam gơtìp ờ niam. Jăt UɃÑZ kơnhoàl Cư̆ Mgar đơs, tŭ do măt gùng dă mờ cài neh geh ờ uă tiah gơtìp tơrlah gơs bơtô, gùng gơtìp tơrlah gơlik lŭ. Mờ broă bơcri priă lơh ding trồm tơlik dà ờ ndrờm bal, lơh dà ờ gơtùi gơlik, lìu tàm gùng lòt mờ gơmŭt tàm hìu làng bol lơh gơtìp ƀơ̆ tus tàm tiah kis, ƀuơn ngan gơtìp rềs àr.

Cau mblàng Ndong Brawl