Là dùl tàm ală mpồl lơh broă bal lam lài tàm broă lòt nhơl, broă lơh sa sươn sre- ƀòn brê bơnơm mpồl bơtiàn, Mpồl lơh broă bal broă lơh sa sươn sre mờ lòt nhơl Phú Nông- Buôn Đôn, kơnhoàl Buôn Đôn, càr Dăk Lăk neh lơh ngan tàm tơrbŏ bal ală cau gơgơs mpồl bơtiàn bơtàu tơngguh lòt nhơl tàm bă ù tờm ƀòn he dê tơn.

Mờ bơta pràn, bơta ƀươn bè ù tiah brê bơnơm geh is niam bơnĕ, gam bè ờs bơh yau, bè: ală ƀòn brê bơnơm brê rơha chi che Brê dà lơgar Yok Đôn, tiah tiơng pơnrơ lòt nhơl tàm hiòng dà dờng Srêpôk gơhoài gơjà ngan cau, ală dà dờng, dà croh, tơnau dà, liang dà, brê bơnơm li la, niam chài, phan sa lă jơi bơtiàn dê rơ̆ ru ngan,…mpồl lơh broă bal neh jăt ngui bơta pràn nàng bơtàu tơngguh lòt nhơl. Tus tŭ do, uă broă lơh tơrlòng lài bơh ală cau tàm mpồl lơh broă bal neh geh năc lòt nhơl gĭt. Bulah bè hơ̆, nàng lơh gơs ală phan bơna lòt nhơl jăt broă lơh OCOP, Mpồl lơh broă bal broă lơh sa sươn sre mờ lòt nhơl Phú Nông- Buôn Đôn gam tìp uă kal ke, tàm hơ̆ geh broă rơndăp ù tiah. Ồng Trần Văn Toàn, Kwang ătbồ Mpồl duh broă ătbồ mpồl lơh broă bal, pà gĭt: Kal ke ngan rlau jơh tŭ do là gơkòl tàm ală broă bơcri priă mờ bơtàu tơnguh, tài bơh lơyài rơndăp ù tiah ală tiah bơtàu tơngguh lòt nhơl. Pơnyơu bè tam gơl dồ bơnah ù broă lơh sa sươn sre tam gơl tus ù kă bro phan drơng broă halà bơto pơlam nàng ngui ù broă lơh sa sươn sre uă jơnau kờñ den tàng bè hơ̆ gơ tơn jŏ tơngai den tàng lơyài tơngai tàm ală tŭ bơcri priă mờ bơtàu tơngguh broă lơh tơrlòng lài lòt nhơl ƀòn lơgar.

Jăt Jơnau lơh nền sồ 148 nam 2022 bơh Thủ tướng Cíñ phủ dê, mpồl broă jàu sền swì bơh mpồl phan bơna OCOP lòt nhơl dê geh cih nền cê, loh làng mơya ờ gŏ di là ƀươn nàng lơh. Jăt Phó Giáo sư, Tiến sĩ ồng Trần Văn Ơn, kwang pơlam broă lơh OCOP dà lơgar dê đơs, bơta kal ke ngan rlau jơh là tài bơh phan bơna geh bơta ală gah broă. Tài bè hơ̆, bulah Dăk Lăk gam uă ngan anih nàng bơtàu tơngguh mơya rơ̆p kal ke ngan lơh gơtùi dilah ờ geh bơta pơgồp bal dồ ròt mờ niam bơnĕ đah ală gah broă geh gơrềng. Phó Giáo sư, Tiến sĩ ồng Trần Văn Ơn, đơs: Broă lơh tơl xã dồ phan bơna bơh gah broă lơh sa sươn sre bơtàu tơngguh ƀòn lơgar dê kong kơnòl, mơya phan bơna bơh gơ dê ờ gŏ di mìng là bơh gah broă lơh sa sươn sre bơtàu tơngguh ƀòn lơgar dê lơm mờ gơ geh bal phan bơna lòt nhơl dê tai. Den tàng lơh is dồ nă să den rơ̆p là kal ke ngan. Pah nam gah lòt nhơl kung lơh uă ngan. Dilah bè lơh broă bal niam mờ gơ̆p den phan bơna lòt nhơl tàm do rơ̆p bơtàu tơngguh. Tài bơh tàm bơta geh ngan neh geh uă ngan phan bơna lòt nhơl mờ ngui bơta kwơ ƀòn lơgar tờm tàm Dăk Lăk do, mơya tài bơh bol he sền swì ờ hềt di pal ngan den tàng ờ hềt geh bơta lơh broă bal. Dilah geh bơta lơh bal rơ̆p bơtaù tơnguh tơn.

Ồng Nguyễn Hoài Dương, Kwang ătbồ Sở Broă lơh sa mờ Bơtàu tơngguh Ƀòn lơgar càr Dăk Lăk dê pà gĭt, jơh gùt càr geh pơgăp 17 ƀòn gơtùi ngui geh ală jơnau mùl gŏ is gơ jăt bal mờ bơtàu tơngguh lòt nhơl OCOP. Bulah bè hơ̆, càr ờ hềt lơh geh phan bơna OCOP lòt nhơl, tài bơh bơta lòt nhơl do kung gam gơcèng bơta lơh is, lơh dềt, rah rài, mìng là ngui ală phan bơna neh geh lài, ờ hềt lơh gơlik geh bơta krơi is bè niam chài mờ bơta kwơ gơguh tai phan bơna. Dăk Lăk gam lơh ngan jăt ngui ală gùng dà broă lơh, bơta dong kờl nàng dong bơtàu tơngguh phan bơna OCOP lòt nhơl ndrờm pal mờ bơta pràn, bơta ƀươn càr dê. Ồng Nguyễn Hoài Dương, đơs: Ală anih lơh broă geh gơnoar pal geh uă broă lơh bơto pơlam nàng ală mpồl lơh sa kă bro, mpồl lơh broă bal mờ làng bol tàm ală tiah, ngan là tàm ală tiah geh bơta pràn lòt nhơl gŏ geh ală bơta ƀươn mờ lơh geh ală phan bơna lòt nhơl là phan bơna OCOP nàng ngui geh cồng nha rlau ală bơta pràn bơta ƀươn do.

Broă Dăk Lăk bơtàu tơngguh lòt nhơl gơ jăt bal mờ broă lơh OCOP rơ̆p pơgồp bơnah tơngguh bơngă ală phan bơna lòt nhơl, gơcèng wơl uă bơta ƀươn bè lơh sa, gơguh priă lơh geh ai làng bol in. Bơh hơ̆, dong mpồl bơtiàn gĭt wă rlau tài broă sền gàr, prăp gàr ală bơta kwơ niam chài bơh yau.