Là dùl tàm ală xã mìng lơh broă sa sươn sre bơh kơnhoàl Krông Ana, càr Dăk Lăk dê, xã Bình Hoà tìp uă kal ke nàng lơh jăt broă lơh bơ̆t bơtàu ƀòn lơgar pa, ngan là broă jàu bè gùng lòt ƀòn lơgar. Mờ bơta jơh nùs lơh ngan bơh Đảng ủy, gơnoar ătbồ xã mờ bơta dồ nùs bal bơh làng bol dê, xã Bình Hoà neh geh dờp lơh geh tơl broă jàu bơ̆t bơtàu ƀòn lơgar pa tàm nam 2017. Tus tŭ do, xã gam pơn jăt tai lơh sir, tơngguh uă ală broă jàu wèt tus xã lơh geh tơl ală broă jàu ƀòn lơgar pa gơguh jơnhoa. Mò Nguyễn Thị Hiền Trinh, Củ tịc Anih duh broă Mặt trận Dà lơgar Việt Nam xã Bình Hoà, pà gĭt: Tŭ lơh broă lơh bơ̆t bơtàu ƀòn lơgar pa den pah nam đah hòi jà làng bol, mặt trận ndrờm bơyai lơh lam lơh tàm thôn mờ jơnau kờñ mblàng yal nàng làng bol in sền gŏ geh bơta kwơmàng bơh broă lơh jăt broă lơh dê bè lơi, den uă ngan làng bol ring bal dồ nùs bal, tă pơgồp priă jền tă pơgồp ngai lơh broă, phan bơna…Tus tŭ do den tus 99% ală gơl gùng lòt rê tàm ƀòn lơgar neh geh lơh mờ ƀê tông lơm.

Gơ wèt mờ xã Ea Sol, kơnhoàl Ea H’leo, càr Dăk Lăk dê mŭt tàm broă lơh bơ̆t bơtàu ƀòn lơgar pa bơh nam 2011, tàm ù tiah xã dờng ơning ơnàng, làng bol ơm kis yah rơha, priă lơh geh kờp bal dồ nă cau dồ êt, phan bơna gùng lòt ờ hềt bơtàu tơngguh, tàm tŭ priă ai bơh kes priă bơcri ờ huan geh uă. Đảng ƀộ, gơnoar ătbồ xã Ea Sol gĭt nền ai lài bơtàu tơngguh rài kis, priă lơh geh bơh làng bol dê, bơh hơ̆ ngui niam bơta pràn nàng bơ̆t bơtàu ƀòn lơgar pa. Ală kâp ủy Đảng, gơnoar ătbồ, ală mpồl cau lơh pràn mblàng yal, hòi jà làng bol jăt ngui gơguh jak kơlôi sơnơng jak chài măy mŏk dê tàm tam gơl rơndăp tăp sèng chi tam, phan ròng, gơ ai cồng nha lơh sa uă rlau. Ồng Hoàng Trở, Củ tịc Mpồl Cau lơh broă sa xã Ea Sol, pà gĭt, tus lồi nam 2023, xã neh geh dờp là xã ƀòn lơgar pa. Ồng Hoàng Trở, đơs: Tam gơl rơndăp tăp sèng chi tam, ai ală bơta chi geh priă jền lơh sa uă nàng hòi jà làng bol cau lơh broă sa tơrgùm tam bè sầu riêng, macca, jràng hương ci…nàng cèng wơl cồng nha lơh sa uă rlau.

Bơh uă broă lơh bơceh lơh, ngăc ngar, dipal mờ bơta geh ngan bơh tơl tiah dê, ngan là sùm lơh jăt niam gơnoar broă đơng lam, lơh krơh bơh mpồl đảng kâp hơđơm mờ đảng viên dê, tus tŭ do, jơh gùt càr Dăk Lăk geh 78 tàm 151 xã ƀòn lơgar pa, 5 xã ƀòn lơgar pa gơguh jơnhoa, 1 mpồl lơh broă kâp kơnhoàl hơ̆ là ƀòn dờng Buôn Ma Thuột lơh sir kơnòl broă bơ̆t bơtàu ƀòn lơgar pa. Jơnau kờñ tus jơh nam 2025, càr Dăk Lăk geh 100 xã, 4 mpồl lơh broă kâp kơnhoàl lơh geh tơl broă jàu bơ̆t bơtàu ƀòn lơgar pa.

Nàng lơh geh jơnau kờñ do, ồng Nguyễn Đình Trung, Kwang bàng Đảng Dà lơgar, Ƀí thư Tỉñ ủy càr Dăk Lăk pà gĭt, càr pơn jăt tai tơngguh uă rlau tai bơta gĭt wă, gơnoar broă, kơnòl broă bơh kâp ủy, gơnoar ătbồ ală kâp mờ jơh ală anih lơh broă cíñ trị dê tàm broă lơh bơ̆t bơtàu ƀòn lơgar pa. Ồng Nguyễn Đình Trung, đơs: Càr neh geh broă rơndăp lơh loh làng, xã lơi siơ̆u broă jàu lơi den càr lơh broă loh làng mờ tơl xã nàng bơh hơ̆ geh dồ tŭ tơngai broă rơndăp lơh nàng lơh ală broă jàu hơ̆ lơh geh broă rơndăp lơh neh jàu. Jơnau kờñ dŭt ndơl tàm bơtàu tơngguh lơh sa- mpồl bơtiàn kung là kờñ ƀòn lơgar geh niam rlau tai, rài kis làng bol dê tàm tiah ƀòn lơgar geh bơtàu tơngguh uă rlau tai, ală anih lơh broă cíñ trị kâp hơđơm pràn kơldang kơ̆ kơl jăp rlau.

Lơh jăt niam gơnoar broă đơng lam bơh kâp ủy dê, ngăc ngar đơng lam bơh gơnoar ătbồ dê mờ bơta tus bal bơh jơh ală mpồl bơtiàn dê tàm srơh tàm pơrlòng “Dăk Lăk tơrgùm bal pràn bơ̆t bơtàu ƀòn lơgar pa”, ală tiah ƀòn lơgar tàm càr Dăk Lăk gam ngai sơlơ tam gơl pa, cèng wơl rài kis hờm ram ai làng bol in.