VOV4.K’ho- Broă lơh tơl xã dùl bơta phan (sơnđan là broă lơh OCOP) tàm càr Dăk lăk gam geh broă tơnguh bơtàu pràn kơl dang. Ngai sơlơ geh uă phan OCOP geh khà dờp bơh 3 tus 4 sơrmañ. Bơta do pờ geh bơta niam tơnguh bơtàu phan geh lơh bơh broă lơh sa suơn sre càr dê, tơnguh bơtàu lơh sa tàm tiah ƀòn lơgar jăt broă lơh gơguh bơta kwơ bơh phan geh lơh bơh broă lơh sa suơn sre dê.

Là mpồl geh phan măk ka gar geh sră cơng tàng phan OCOP 4 sơrmañ kấp càr, Kông ty Kổ phần Damaca Nguyên Phương tàm xã Phú Lộc, kơnhoàl Krông Năng gam lơh ngan tam gơl phan lơh broă, kông nghệ, tơnguh bơta niam, khà măt phan geh lơh tus bal nàng sền phan OCOP kấp dà lơgar.

                         Anih lơh măk ca bơh Kông ty Kổ phần Damaca Nguyên Phương dê

Ồng Phạm Đình Nhân, Kwang atbồ Cơl dŭ Maketing Kông ty kổ phần Damaca Nguyên Phương pà git: bơh tŭ phan geh dờp tàm ală siêu thị, broă tam pà phan geh ƀuơn rơlao. Khà phan tăc geh ngai sơlơ gơguh. Mìng is tàm nam 2021, bŭ lah gơrềng bơh kòp Kovid-19, mơya kông ty neh tăc geh tàm drà kă bro di pơgăp 70 tấn gar măk ka. “Tơnơ̆ mờ tŭ geh khà măt dờp phan OCOP 4 sơrmañ, kông ty geh tơnguh sùm bơta phan phan geh lơh, khà măt kơl dung pal tam gơl niam di pal mờ jơnau kờñ bơh phan OCOP dê. Bơdìh hơ̆ tai, bol añ gam lơh hìu lơh broă gơguh niam broă lơh nàng tus bal mờ phan OCOP 5 sơrmañ kấp dà lơgar wèt tus ală mpồl phan tăc tàm lơgar mờ lơgar bơdìh”.

Gŏ loh làng ngan cồng nha broă broă lơh tơl xã dùl bơta phan ờ geh cau lơi bơdìh mờ làng bol – ală cau tờm tus bal broă lơh do. Cơng tàng loh làng ngan là phe kloh HTB bơh hợp ták xã broă lơh drơng ala tơrgùm bal lơh sa suơn sre Thăng Bình, xã Cư̆ Kty, kơnhoàl Krông Bông. Bơh tŭ geh dờp là phan OCOP 3 sơrmañ, khà priă phe neh gơguh uă rơlao 2 dơ̆ pơn drờm mờ lài, khà kă bro kung gơguh bơh 200 tấn tus 400 tấn tàm 1 nam, cèng geh bơta kwơ bè uă bơta ai hợp ták xã kung bè ală cau tus bal in. Ồng Võ Văn Sơn, Kwang atbồ Hợp ták xã broă lơh drơng ala tơrgùm bal lơh sa suơn sre Thăng Bình pà git: “Lài do phan bơh bol añ dê ờ hềt geh drà kă bro sền niam, tŭ do neh geh dờp phan OCOP den loh làng khà kwơ phan geh lơh geh uă bơh tàm khà priă, bơh tàm bơngă phan geh lơh bơh làng bol lơh broă sa dê, geh bơta niam nàng tăc geh uă phan rơlao, ring niam rơlao uă ngan. Drà kă bro tàm càr, càr ndai geh bal lơgar bơdìh”.

        Cau tàm mpồl Hợp ták xã broă lơh drơng ala tơrgùm bal Thăng Bình còp sre lài mờ tŭ tơwès kòi

Jăt Sở Nông nghiệp mờ Phát triển Nông thôn càr Dăk Lăk yal, tus tŭ do, gùt càr neh geh 72 bơta phan geh dờp phan OCOP kấp càr. Tàm hơ̆ geh 8 bơta phan geh 4 sơrmañ, mìng là kơphe, ka kao, măk ka. Ală bơta phan do gam pơn jăt tai bơcri priă lơh niam wơl, wèt tus khà 5 sơrmañ kấp dà lơgar, tơnguh uă bơta niam tus bal tàm drà kă bro dunia. Ồng Dương Tín Đức, Kwang atbồ cơl dŭ lơh broă đơng lam broă lơh Ƀòn lơgar pa càr Dăk Lăk pà git: “Bol añ geh lơh ngan mờ broă dong kờl bơh dà lơgar geh tơnguh niam wơl ală bơta phan bơh 3 tus 4 sơrmañ, bơh 4 tus 5 sơrmañ nàng geh ală khà kờñ niam ngan den tŭ hơ̆ geh tơrbŏ bal ală bơta phan tàm ală tiah, tàm hơ̆ uă ngan là broă hòi jà kă bro. Di lah phan 3 sơrmañ den ală siêu thị, ală anih kă bro phan geh dờp, 4 sơrmañ geh tăc tàm gùt lơgar mờ 5 sơrmañ geh tăc tàm 45 lơgar tus bal broă lơh phan OCOP do”.

Mờ bơta geh, bơta kwơ bè ală phan geh lơh bơh broă lơh sa suơn sre, lơh mờ să, càr Dăk Lăk gam lơh ngan lơh geh cồng nha broă lơh OCOP nàng tơnguh bơtàu lơh sa tàm tiah ƀòn lơgar, bơ̆t bơtàu broă lơh sa suơn sre, lơh geh cồng nha jơnau kờñ bơ̆t bơtàu ƀòn lơgar pa, tơnguh uă rài kis làng bol in.

Cau cih Hương Lý-Cau mblàng Ndong Brawl