VOV4.K’ho - Tơnơ̆ mờ tơngai jŏ jòng pal ơm ing lơh broă tài gơrềng bơh kòp kovid-19, tŭ do ală mpồl lơh sa kă bro tàm càr Dăk Lăk neh pờ mpồng nàng rơhời brồ guh wơl lơh broă. Bal mờ broă lơh niam wơl ală phan neh geh tŭ do, uă mpồl lơh sa gam jòi gùng dà tơnguh bơtàu tai ală phan pa nàng hòi jà nhơl chờ tàm càr do.

                Tàm tơngai ơm ờ lơh broă, ală mpồl lơh nhơl chờ gam lơh niam wơl ală phan nhơl chờ 

Tơnơ̆ mờ mờr 8 nhai pal ơm ing lơh broă tài gơrềng bơh kòp gơtờp, bơh satềp tus tŭ do, tiah nhơl chờ sinh thái mpồl bơtiàn Ko Tam tàm ƀòn dờng Buôn Ma Thuột, càr Dăk Lăk neh pờ mpồng wơl nàng drơng cau năc. Lài mờ hơ̆, bŭ lah neh ơm ờ wă năc tàm 8 nhai, mơya mpồl lơh sa do kung gam pal tơm priă nhai ai 20 nă cau lơh broă sền gàr bơkào mờ tờm chi, sền gàr phan bơna, lơh niam mờ lơh niam wơl ală homestay in. Bơh tŭ pờ mpồng wă năc wơl, bal mờ ală broă lơh neh geh lài, mpồl lơh sa kă bro do lơh jăt mờ uă bơta pha pa, lơh jăt ală khà broă nhơl chờ lơh broă mờ drơng broă jăt mờ broă kờñ bơh cau năc dê. Mờ lơh jăt niam ală broă gàr niam ờ do ờ dă tàm bơta kòp gơtờp. Mò Nguyễn Thị Ngọc Anh, Củ tịc mpồl atbồ Kông ty Kổ phần nhơl chờ sinh thái mpồl bơtiàn Ko Tam pà git: “Ko Tam den geh uă broă lơh bơsram mờng chài ròng phan, tam phan, kơphe, ròng ka, re dà hơ̆ sồng đơs bal là uă bơta phan nàng bơsram. Bơsram broă mờng chài nam do bol añ ờ ai ñô tơrnờm, mìng dròng cing mờ tamya jăt mpồl, ờ tơrgùm. Ală broă bơsram bơh bol añ dê jăt mờ jơnau kờñ cau năc dê, pal bơsram broă lơi den bol añ geh ai lơh broă hơ̆, mơya pal geh tơngai ai lài, yal lài mờ ai lài di lah ờ bol añ ờ geh ai lềng làng”.

        Ngui bơta pràn geh is, bơta chài rơgơi nàng tơnguh bơtàu nhơl chờ jăt mờ jơnau kờñ bơh cau năc dê

Kung wèt tus mờ ală bơta phan pa sơl nàng hòi jà cau năc, Kông ty TNHH bơcri priă nhơl chờ mờ kă bro Dam San tàm ƀòn dờng Buôn Ma Thuột den rơwah ală broă nhơl chờ tơlir nàng tơnguh bơtàu. Ồng Lê Hoàng Cơ, Kwang atbồ Kông ty pà git, bơh tàm ală bơta geh is mờ bơta krơi is bè ù tiah, mpồl lơh sa gam bơ̆t bơtàu mờ wèt tus broă nhơl chờ tam phan, nhơl chờ ơm rơlô să mờ trồ tiah àng niam, geh lơh broă mờ sền gàr bơta pràn kơl dang să jan ndang. Mờ kông ty geh pơgồp bal mờ ală mpồl lơh sa bơh càr Dăk Nông, Khánh Hoà nàng pơgồp bal ală dơ̆ nhơl chờ pơgồp bal bè tus sền sre kòi, um ù bŏ, ơm rơlô să. Ồng Lê Hoàng Cơ đơs: “Mpồl lơh sa kă bro wèt tus mờ broă nhơl chờ tơnguh bơtàu tơlir mờ kwơ màng là tơnguh bơtàu nhơl chờ tam phan mờ wèt tus broă ai cau năc in tus tàm do là cau năc ơm rơlô să. Tŭ do phan nàng dong kờl geh uă ngan, bè ală suơn dờng tàm do geh uă mờ tàm tŭ do di ngan là tŭ mờ geh ƀuơn ngan tàm kàl bơ̆t bơtàu mờ hòi jà geh phan kơphe, he geh ai cau năc tus mờ ală suơn kơphe nàng sền nền nòn rơlao mờ kơphe mờ kung là tiah geh trồ tiah niam nàng gơtùi ơm rơlô să mờ geh bơta niam ngan. Dam San gam pơgồp bal mờ càr Dăk Nông tài Dam San gam wèt tus ƀòn Ƀuôn Choah, kơnhoàl Krông Nô là tiah lơh sre tàm ù tiah bazan den geh broă krơi is rơlao mờ tàm tiah ring mờ uă tiah ndai”.

                             Càr Dăk Lăk geh uă ù tiah niam nàng tơnguh bơtàu nhơl chờ

Jăt khà kờp bơh Sở Văn hoá-Thể thao mờ Zu lịc càr Dăk Lăk yal, tàm dơ̆ satềp pa do neh geh di pơgăp 144 rơbô nă cau năc tus tàm càr Dăk Lăk nàng sền, nhơl mờ lơh broă bơsram tàm 21 tiah nhơl chờ, gơguh uă rơlao nggùl dơ̆ pơn drờm mờ tŭ do nam lài. Jăt mò Nguyễn Thụy Phương Hiếu, Phó kwang atbồ Sở Văn hoá -Thể thao mờ Zu lịc càr Dăk Lăk  đơs, do là bơta tơngŏ chờ hờp ngan tài rơlao 2 nam do, gah nhơl chờ neh gơtìp gơrềng ờ niam ngan, lơh khà priă geh bal mờ broă lơh gơtìp uă ngan kal ke.

Nhơl chờ tam phan là gùng dà tơnguh bơtàu geh uă mpồl lơh nhơl chờ càr Dăk Lăk rơwah nàng hòi jà cau năc tus

Kung jăt mò Hiếu đơs, tŭ do, gah nhơl chờ gam rơhời geh ală broă lơh nàng brồ guh, nàng tơnguh broă pơgồp bal, lơh broă bal mờ ală tiah ndai pơgồp bal tơnguh bơtàu nhơl chờ mờ lơh pa is ală bơta phan nhơl chờ bơh càr dê nàng hòi jà cau năc. Bal mờ broă sền gròi broă gàr niam ờ do ờ dă tàm broă rơcang sơndră mờ kòp gơtờp tàm ală tiah nhơl chờ, gah nhơl chờ gam lơh ngan pơgồp bal, hòi jà tăc ală bơta phan nhơl chờ niam geh lơh bơh ală bơta pràn càr dê. “Bơyai lơh sền gròi, bơ̆t bơtàu ală bơta phan nhơl chờ pa, pơdar bal tàm 4 kơnhoàl mờ lik tus tơn tàm tiah nhàr dà lơgar ai ală mpồl lơh sa kă bro in. Tàm tơngai do den geh rơcang lài bal mờ ală tiah ndai bơ̆t bơtàu ală phan nhơl chờ pa. Pa do ngan tai den bol añ geh sền, bơ̆t bơtàu phan nhơl chờ tàm ƀòn dờng Buôn Ma Thuột gơrềng tus mờ phan kơphe, lơh sa suơn sre mờ mpồl bơtiàn. Den jăt mờ bơta pràn bơh tơl tiah dê, nàng tàm tơngai nhơl chờ den jăt mờ bơta pràn bơh kòp gơtờp den geh bơyai lơh nàng ală mpồl lơh sa kă bro rơcang geh ală phan nhơl chờ pa kung bè lơh pa phan nhơl chờ bơh ală mpồl lơh sa kă bro tàm mpồl lơh sa kă bro”.

Tơnơ̆ mờ tơngai sền gròi mờ bơ̆t bơtàu, geh ờ uă bơta phan bè dơ̆ nhơl chờ “Famtrip Caraval – Tây Nguyên ndu gơnrơh”, Broă lơh đơs crih tamya “Jơnau kơ̆p kờñ Dam San”, ală broă lơh chài rơgơi-đơs crih tamya-tàp pràn să jan geh bơta dờng gùt lơgar geh bơyai lơh tàm càr Dăk Lăk kơ̆p kờñ geh là dùl tàm ală bơta ai tơngŏ mờ bơta pràn nàng brồ guh mờ tơnguh bơtàu nhơl chờ tàm càr. Kwơ màng, mờ broă pờ mpồng nhơl chờ dunia gam geh lơh jăt tŭ do, càr Dăk Lăk kơ̆p kờñ broă nhơl chờ geh rơhời brồ guh wơl mờ gơtùi lơh geh cồng nha ală bơta geh, bơta pràn neh geh lài, wèt tus tơngu me wă rơlao 900 rơbô nă cau năc tus tàm càr Dăk Lăk tàm nam do.

Cau cih H’ Xíu-Cau mblàng Ndong Brawl