Gơ jàr tŭ jiơ ơm rlô klo ngai, lòt sền bă sươn tam biăp hòn gơs niam ngan mờ gul wơl ală àr plai blơn ồs mbòr ngan plai nàng jàu di ngai pơrgon ai cau blơi in, đảng viên bi Ya Dũng, Kwang ătbồ ƀòn Labouye A, xã Lạc Xuân, kơnhoàl Đơn Dương, càr Lâm Đồng yal, bàr pe ngai do cau lơi kung ờ ru lơm, añ pal lòt tàm sươn klo ngai nàng mho gam bơyai lơh pơrjum thôn bơyai jơnau bơ̆t bơtàu ƀòn lơgar pa gơguh jơnhoa.

Ya Dũng pà gĭt, tài bơh sền gŏ broă tam biăp khuah rbài jăt bơta mờng kwèng bơh yau bơh hìu bơnhă dê mờ làng bol tàm ƀòn dê ờ gŏ cèng wơl cồng nha, priă lơh geh ờ geh sùm den tàng bi lơh nền tam gơl tus tam biăp tăc jăt gùng dà broă lơh sa sươn sre ngui măy mŏk pa. Kơnờm bè hơ̆, 4 sàu ù tam ală bơta biăp sa bơh hìu bơnhă dê neh gơguh priă lơh geh, kờp bal tơl kàl lơh geh priă cồng rlau 100 tơlak đong. Jăt bi Ya Dũng yal, bơh cồng nha do he rơ̆p mblàng yal, hòi jà mờ làng bol dòn iăt, bi Ya Dũng, đơs: Să tờm añ lơh ngan lùp bơsram uă tiah, ờ mìng tàm do mờ gam tàm uă tiah ndai tai. Lùp bơsram sền cau dê tam chi do, sơntìl chi ne. Mờ gơnoar broă là cau ala măt Mpồl duh broă Làng bol den pal lơh ngan lùp bơsram, jòi lùp ală gùng dà pa nàng tam phan, ndrờm bè tŭ do he gam lơh là tam phan jăt gùng dà pa. Tài làng bol nàng bal mờ gơ̆p bơ̆t bơtàu ƀòn lơgar he bơtàu tơngguh ngai sơlơ uă rlau tai.

Ƀòn Labouye A, xã Lạc Xuân, kơnhoàl Đơn Dương, càr Lâm Đồng geh rlau 130 hìu, tàm hơ̆ rlau 70% là làng bol kòn cau K’Ho. Bơh broă lơh tơrlòng lài tam phan geh cồng nha bơh bi Ya Dũng dê, làng bol tàm ƀòn neh lùp bơsram mờ đòm jăt mờ lơh. Tus tŭ do, 100% bă ù tam phan tàm ƀòn ndrờm neh geh tam gơl tus tam biăp, bùm, plai chi ală bơta. Priă lơh geh gơguh tai den tàng uă hìu neh lik klàs bơh rƀah mờ brồ guh bơ̆t bơtàu rài kis pa.

Bi Ya Dũng pà gĭt, tus tŭ do, broă kơlôi broă lơh bơh làng bol ƀòn Labouye A dê neh gơguh jak dồ cơnđoà jòng pơndrờm mờ lài. Làng bol sền bal neh gĭt ngui geh bơta jak chài măy mŏk dê, lam lơh mờng chài ngan tàm rài kis mùl màl, gơ ai phan bơna niam ngan. Tơngai tus, Ya Dũng pơlam làng bol lơh sa jăt sră dan blơi phan, lơh bal lơh sa mờ ală mpồl lơh sa kă bro, mpồl lơh broă bal nàng kờñ geh drà tăc phan bơna kơ̆ kơl jăp. Bi Ya Dũng, đơs: Is ồn să tờm añ, tơngai tus rơ̆p lùp jòi mờ mŭt bal tàm mpồl lơh broă bal nàng kờñ geh sùm drà tăc phan bơna in, tơnơ̆ hơ̆ hòi jà tai uă hìu mŭt bal tàm mpồl lơh broă bal bè añ. Geh mpồl lơh broă bal rao, geh bơta lơh bal lơh sa rao den tơl nă cau rơ̆p bal mờ gơ̆p bơtàu tơngguh kơ̆ kơl jăp rlau.

Jăt đảng viên ồng Cruyang Cơi Long, lài do là Phó Ƀí thư Đảng ủy xã Lạc Xuân, kơnhoàl Đơn Dương, càr Lâm Đồng dê yal, ờ mìng lam lài tàm broă lơh sa lơh gơlik phan bơna, Ya Dũng gam là cau kòn geh bơngă pin dờn bơh ƀòn lơgar dê mờ sùm lam lài tàm broă lơh jăt ală srơh bơh ƀòn lơgar dê lam lơh, ngan là ală srơh dong kờl gơ̆p tơn jơh jơgloh tơrmù rƀah, tàm sơmbăt tê bal bơ̆t bơtàu ƀòn lơgar pa. Ồng Cruyang Cơi Long, đơs: Añ gŏ Ya Dũng là dồ nă đảng viên lơh krơh ngan, sùm lam lài tàm broă lơh jăt mờ hòi jà làng bol lơh jăt ală srơh bơh ƀòn lơgar dê. Is ồn, Ya Dũng gĭt kong ngan kal ke jòi lùp, lùp bơsram mờ ngui măy mŏk pa tàm broă lơh sa, tơnơ̆ hơ̆ hòi jà làng bol tàm thôn lơh jăt bal mờ geh uă cồng nha lơh sa, pơgồp bơnah bal mờ ƀòn lơgar bơ̆t bơtàu ƀòn tờm he dê ngai sơlơ bơtàu tơngguh rlau tai.

Bal mờ cồng nha lơh geh, ală nam do, Ya Dũng dờp geh uă ngan sră jờng rơ bơh Đảng ƀộ, gơnoar ătbồ kơnhoàl, càr dê mơkung neh geh tŭ geh dờp geh sră jờng rơ bơh Mpồl Sồr lơh Tây Nguyên dê tài bơh geh cồng nha jak ngan tàm broă lơh bơ̆t bơtàu thôn, ƀòn, mpồl làng bol ƀòn drà pràn kơldang kơ̆ kơl jăp.