Piang prùng, biăp blơn bơtăng, iar buh, puăc bung ding gle mùl neh gơlơh mờng kwèng ngan mờ làng bol kòn cau Rơđê tàm xã Cư Huê, kơnhoàl Ea Kar kung bè uă ƀòn lơgar ndai tàm càr Dăk Lăk…Mìng bơh tŭ ală phan sa do bơh mpàng tê bơh đảng viên H’Bút Bi Mlô dê ơm tàm ƀòn M’oa, xã Cư Huê trŭ gơm, ală phan sa ờs mờng bơh yau do hơ̆ sồng mpờl gŏ bơta pràn, gơgơs là bơta phan sa, gơ ai priă jền bơh kă bro tus dồ tơmàn đong pah nam.

Bi H’Bút Bi Mlô pà gĭt, bi neh geh tŭ là cau lơh broă tàm cơldŭ lơh broă tàm 10 nam den tàng gĭt wă uă ngan jơnau kờñ sa phan sa, tìp măt lơh kwèng, lơh pơrài bồ tơnggoh bơh cau lơh broă, kwang đơng lam bồ ală anih lơh broă, mpồl lơh sa kă bro tàm kơnhoàl dê. Hìu bơnhă geh 2 nơm hìu jòng ờs mờng bơh yau bơh hìu bơnhă dê bal mờ jơng gùng hìu tơlir niam ngan, bi khin cha lơh hìu tăc phan ñô sa mìng tăc ală phan sa kòn cau Rơđê dê mờ tăc phan lời kir niam chài kòn cau Rơđê dê ờs mờng bơh yau. Sơrlèt kal ke tàm 2 nam bơtờp kòp Kovid-19 lơh bơtờp uă, hìu tăc phan ñô sa bơh bi H’Bút Bi Mlô dê neh gơgơs là anih geh pơnrơ, gơhòi gơ jà bơh 200 tus 300 nă năc lòt sa phan sa pah ngai. Bi H’Bút Bi yal: Mờ gơnoar broă là dồ nă đảng viên, añ gam pơrjum tàm ci ƀộ ƀòn, añ gơboh ngan niam chài kòn cau Rơđê añ dê, añ tăc kơphê, hơ̆ sồng phan ñô sa ai năc in mờ yal tơnggĭt bơhiàn niam chài krơi is kòn cau Rơđê añ dê. Tŭ dà lơgar lam lơh srơh pà ù lơh gùng, hìu bơnhă añ kung jơh nùs sơl pà 1 thơk nggùl bơkang gơ dŏ jòng rlau 40 thơk nàng làng bol he in lòt rê ƀươn ƀoài rlau.

Dilah bè đảng viên H’Bút Bi ngui niam geh bơta pràn tơryăng tơryồng ngăc ngar khin lơh nàng bơtàu tơngguh lơh sa, den ồng Y Quá Mlô là cau pơnrơ bơh sơnam dờng bồ tơnggoh sơlơ gĭt wă jrô. Nam do, 68 sơnam, là đảng viên jŏ sơnam tàm Ci ƀộ ƀòn Tơng Kroa, sùm tàm ală nam gam pơnu să, ồng lơh broă sa priă nhai dà lơgar tàm xã Cư Huê. Tus tŭ rê rlô lơh broă, ồng Y Quá hơ̆ sồng sơnđờm mŭt lơh broă tàm gah broă lơh sa sươn sre. 8 nam lơh broă sươn mìr, ồng neh bơ̆t bơtàu geh anih lơh sa sươn dờng tơrgùm bal mờ 2 rbô tờm kơphê, 400 jrong tiêu, rlau 1 sàu ñhơ̆t ròng kơnrồ mờ be. Tŭ do, pah nam bơh ròng phan, tam phan ồng lơh geh priă jền bàr pe rơhiang tơlak đong. Geh priă lơh sa, ồng sùm crăp rơcăng dong kờl làng bol kal ke tàm ƀòn bè priă, bơta chài sơngka sền gàr chi tam; tă pơgồp ală bơnah priă bơ̆t bơtàu ƀòn lơgar pa. Bơdìh hơ̆ tai, ồng gam pà gĭt nđờ rơhiang thơk vuông ù lơh gùng lòt rê. Ồng Y Quá Mlô pà gĭt, lơh khăt broă lơi, ồng kung sùm kah he là dồ nă đảng viên. Ồng Y Qúa Mlô, đơs: Añ là đảng viên neh rê rlô lơh broă, añ kung gam lơh ngan jơh pràn nàng lơh broă, hìu bơnhă añ tam kơphê, tiêu, ròng 10 nơm kơnrồ mờ 20 nơm be. Tàm srơh lơh bơtơ̆t tơnau dơng dà tuh phan tam in, hìu bơnhă añ pà 2 lồ nggùl ù nàng lơh bơtơ̆t Ea Bư nàng ai dà tuh phan tam in. Lơh jăt srơh bơ̆t bơtàu ƀòn lơgar pa, hìu bơnhă añ kung pà 500 thơk vuông ù nàng lơh gùng.

Jơh gùt kơnhoàl Ea Kar tŭ do geh 7 rbô nă đảng viên, tàm hơ̆ 1 rbô 250 nă đảng viên là làng bol jơi bơtiàn dồ êt nă cau, geh tus pơgăp 18%. Jăt Huyện ủy kơnhoàl Ea Kar yal, uă ngan đảng viên tàm đảng bộ neh tơnggŏ geh gơnoar broă lam bồ lơh krơh tàm lơh broă lơh sa bơtàu tơngguh lơh sa, tus bal wil tơl ală srơh tă pơgồp, dong kờl, pà ù bơ̆t bơtàu ƀòn lơgar pa tàm ƀòn lơgar. Ală đảng viên bè Y Quá Mlô, mờ H’Bút Bi Mlô ndrờm là ală đảng pơnrơ ngan, lơh gơlik bơta pràn lơh gơrề pràn kơldang srơh bơtàu tơngguh lơh sa, tă pơgồp bơ̆t bơtàu ƀòn lơgar pa tàm ƀòn lơgar.

Ồng Y Nhuân Byă, Ƀí thư Huyện ủy kơnhoàl Ea Kar pà gĭt, broă lơh tơmŭt đảng tàm tiah làng bol jơi bơtiàn dồ êt nă cau sùm geh jơh gùt Đảng ƀộ sền gròi. Tơngai tus rơ̆p ngai sơlơ geh uă rlau tai ală krơh đảng viên pơnrơ gơguh jak, lơh krơh nàng làng bol ală ƀòn lơgar in pin dờn lơh pràn lơh sa kă bro, bơtàu tơngguh uă rài kis. Ồng Y Nhuân Byă, đơs: Bè tơmŭt đảng tàm làng bol jơi bơtiàn dồ êt nă cau den geh bol hi sền gròi ngan, do là broă lơh geh mpồl đảng viên ai ală rơnàng tàm pơn jăt tai in. Ală đảng viên tàm xã Cư Huê tiah làng bol jơi bơtiàn dồ êt nă cau den là ală krơh pơnrơ ngan nàng làng bol mờ đảng viên ndai in lùp bơsram đòm jăt. Tàm ală pơrjum bơh Huyện ủy kơnhoàl dê, bol hi ndrờm yal tơnggĭt nàng lơh gơlik bơta pràn lơh gơrề uă tàm ală đảng ƀộ.

Broă sền gròi tơmŭt đảng tàm tiah làng bol ală ci ƀộ đảng tàm kơnhoàl Ea Kar tàm tơngai do neh mờ gam pơgồp bơnah tơngguh uă cồng nha mpồl đảng kâp hơđơm kơnhăp pràn. Bal mờ broă, broă lơh jăt niam gơnoar broă lam lài, lơh krơh bơh đảng viên dê tàm srơh tàm pơrlòng lơh sa kă bro jak, tă pơgồp, dong kờl, pà ù lơh gùng lòt rê kung neh pơgồp bơnah bơ̆t bơtàu ƀòn lơgar ngai sơlơ pas sơm niam bơnĕ, jak chài, lơh sùm, ngui niam mờ prăp gàr ală bơta kwơ niam chài jơi bơtiàn, bơ̆t bơtàu kơ̆ kơl jăp rlau tai bơta tam klăc dờng jơh gùt jơi bơtiàn.