Pa măy rơndeh lơ òr pơndiang phan ngui lơh sươn sre bơh mìr rê hờ hìu, ồng Lương Văn Hợp ơm tàm ƀòn O Pếch, xã Ia Pếch, kơnhoàl Ia Grai chờ hờp ngan pà gĭt, gơl gùng rlau 10 kơi sồ tàm tơrbŏ song tơn bal mờ xã Ia Tô gam lơh gơs. Gùng lơh mhar bè hơ̆, dồ bơnah là kơnờm bơh 47 hìu làng bol pà is ù, tă sơr broă bơ̆t bơtàu, dŭi sơrbì chi tam nàng pờ ơnàng gùng. Ồng Lương Văn Hợp, chờ hờp yal: Añ neh pà 60 tờm kơphê, phà tơn kơphê, lơh tơrlah tơn tơrñang lòt nàng lơh dồ nơm gùng ai làng bol in jun pơndiang phan kă bro mờ lòt rê ƀươn ƀoài, ai oh kòn kòn sau tơnơ̆ do in tai. Đơs bal là añ gŏ geh kwơ uă ngan.

Jăt gơl gùng do mìng là chi tam jŏ nam lơm, geh kwơ bè kơphê, chi sa plai. Ồng Nguyễn Trọng Túc ơm tàm ƀòn O Pếch, xã Ia Pếch pà gĭt, tŭ geh hòi jà pà ù, ồng mờ làng bol kơlôi sơnơng ngan tài bơh roh tĕ dồ bơnah priă lơh geh. Mơya geh mblàng yal, hòi jà broă lơh gùng tài bơta kwơ jŏ jòng bơh làng bol 2 xã dê, dong lòt rê, jun pơndiang phan lơh geh bơh sươn sre ƀươn ƀoài, hìu bơnhă ồng dồ nùs bal sơl. Ồng Túc, đơs: Hìu bơnhă añ kung pà đah ơnàng là 1 thơk nggùl, đah jòng là 100 thơk ù. Tàm ù do den geh dồ sèng tờm ƀời lời mờ 60 tờm kơphê. Rềp ù hìu bơnhă dê geh hìu bơnhă ồng Nghiêm kung pà dồ sèng pơnăt Thái sơl gam geh plai. Làng bol geh dồ nơm gùng lòt rê gơlơh niam ngan.

Tàm xã Ia Khai, kơnhoàl Ia Grai, gùng pleh tàm tơrbŏ tus xã Ia Krái kung gam geh sơrbac mhar lơh sơl, tàm hơ̆ làng bol pà ù lơh ơnàng gùng. Mò Nguyễn Mai Lương, Củ tịc Ủy ƀan Ñân zân xã Ia Khai pà gĭt, bơh nam 2003 tus tŭ do, geh rlau 100 hìu làng bol pà ù nàng lơh mờr 20 kơi sồ gùng lòt ală thôn, ală xã, gùng lòt tus tiah lơh sa. Mò Nguyễn Mai Lương, đơs: Uă hìu bơnhă ờ hềt gĭt wă jơh den gam kơlôi sơnơng. Lơh jăt broă lơh mblàng yal, hòi jà, Đảng ủy, Ủy ƀan Ñân zân xã neh pơrjum, jà kra ƀòn, Ƀí thư Ci ƀộ, bàr pe nă cau geh bơngă pin dờn nàng lơh dồ mpồl mblàng yal mờ ală hìu do. Ngai do khi ờ hềt wă wờng, den ngai hìng bol hi tus tai.

Tàm kơnhoàl rƀah nhàr lơgar Ia Grai tŭ lam lơh ală rơndăp broă lơh gùng lòt, gơnoar ătbồ tìp uă kal ke bè priă jền tơm priă ai ù lơh gùng. Den tàng bè hơ̆, jơh ală anih lơh broă cíñ trị neh hòi jà, mblàng yal, hòi jà bơta tàm sơm băt tê bal bơh làng bol dê. Bơh nam 2022 tus tŭ do, neh geh gĭt nđờ rbô hìu làng bol pà gĭt nđờ jơ̆t rbô thơk vuông ù lơh mờr 60 kơi sồ gùng tàm ală xã: Ia Pếch, Ia Yok, Ia O, Ia Krái.

Ồng Nguyễn Văn Hà lơh broă tàm Mpồl Hòi jà làng bol bơh Huyện ủy kơnhoàl Ia Grai dê pà gĭt, nhai 10 nam 2023, Mpồl duh broă Đảng ƀộ kơnhoàl Ia Grai neh ai lơh jăt Jơnau lơh nền sồ 15 bè tơngguh tai bơta đơng lam bơh kâp ủy dê gơ wèt mờ broă lơh mblàng yal, hòi jà pà ù nàng lơh gùng lòt tàm kơnhoàl tus nam 2030. Bơh tŭ geh Jơnau lơh nền, ală kâp ủy Đảng, gơnoar ătbồ, mpồl cau ală tiah ndrờm lơh mpồl đơng lam bè hòi jà làng bol pà ù lơh gùng, jơnau kờñ tus nam 2030 rề ơnàng tai rlau 600 kơi sồ gùng. Ồng Nguyễn Văn Hà, pà gĭt: Pơnđơl tus nam 2025, jơh gùt kơnhoàl rơ̆p hòi jà làng bol pà ù lơh ơnàng gùng kơnhoàl, gùng xã gùng kòn tiah drà. Jơnau kờñ bal bơh Jơnau lơh nền sồ 15 dê là lơh tam gơl pràn kơldang ai jơh ală bè gùng lòt ƀòn lơgar in tàm ù tiah kơnhoàl dê tus nam 2030 lơh geh jơnau kờñ lòt rê bơh làng bol dê, lơh geh bơnàng jă nàng pơnđơl tus nam 2030, kơnhoàl Ia Grai lơh geh tơl jơnau sồr ƀòn lơgar pa.

Gùng dà bè hòi jà làng bol pà ù lơh gùng tàm kơnhoàl Ia Grai neh geh cih tàm jơnau lơh nền, lam lơh tus ƀòn lơgar mờ dờp geh bơta dồ nùs bal bơh làng bol dê. Do là bơnàng jă nàng kơnhoàl tơngguh pràn lơh gơs phan bơna gùng lòt, lơh geh bơta pràn uă bè lơh sa- mpồl bơtiàn tàm tiah nhàr lơgar càr Gia Lai.