Ală ngai do, hìu bơnhă bi Đinh Công Nhiên bal mờ làng bol tàm ƀòn gam chờ hờp ngan toès kòi tàm ƀlàng sre kòi ƀòn Klah, xã Ia Mơ, kơnhoàl Chư Prông, càr Gia Lai. Bi Đinh Công Nhiên pà gĭt, pơgăp mờ do 02 nam, ală kwang bàng lơh broă sa sươn sre bơh kơnhoàl, bơh xã dê tus tàm ƀòn hòi jà làng bol tam gơl tam kòi sre 2 kàl. Làng bol geh bơto pơlam bơh lơh ù, sih gar, sền gàr tus tŭ toès. Kàl kòi nam do, Đinh Công Nhiên kờp dŭ rơ̆p lơh geh 5 tấn kòi, priă lơh geh rlau 50 tơlak đong. Ồng Đinh Công Nhiên, yal: Lài do tŭ ờ hềt geh rbòng dà den lơh dồ kàl, den cồng nha lơh geh ờ gơtùi geh ndrờm mờ lơh kòi bàr kàl, kòi lơh 2 kàl den geh rlau. Nam do là kàl tai hơ̆ là kàl dơ̆ pe, rlau dồ nhai tai là tơnhàu rao. Bàr pe nam lài tam dồ kàl den geh tŭ ờ tơl phe sa, tŭ do den neh ờ huan đau.

Tus xã tiah nhàr lơgar Ia Mơ tơngai do, nùs nhơm lơh broă, rài kis làng bol tam gơl pa uă ngan. Chờ chờr tŭ tờm kòi sơngyùr kòi mbòr ngan rơcăng toès, bi Siu Toàn ơm tàm ƀòn Klah, xã Ia Mơ pà gĭt, kàl lơh kòi nam do, hìu bơnhă rề ơnàng bă sre bơh 3 sào gơguh tus 8 sào mơkung tam gơl tus tam sơntìl kòi bơkah ngan mờ gơn kơnờm kàl do rơ̆p dong kờl hìu bơnhă lơh geh uă kòi. Bi Siu Toàn, đơs: Lài do ờ hềt geh rbòng dà den hìu bơnhă añ ờ gŏ lơh kòi sre mơya tŭ do, lŏ sre neh geh dà rao, tài geh dà lơgar bơcri priă lơh ală rbòng dà den tàng làng bol tàm do iang nùs ngan tàm lơh broă lơh sa, is ồn să tờm añ kung pal lơh ngan lơh sa nàng geh piang sào ào soh, ròng kòn bơsram tus gùng tus dà mờ kơ̆ kơl jăp rài kis hìu bơnhă.

Tàm ƀlàng sre kòi ƀòn Klah, ồng Nguyễn Tuấn Anh, Phó Củ tịc Ủy ƀan Ñân zân xã Ia Mơ tơrblờt mpha mù tàm sre pơlam làng bol sền gàr kòi sre. Ồng Nguyễn Tuấn Anh pà gĭt, xã tŭ do geh rlau 155 lồ sre lơh kòi, mìng tàm 02 nam do, is ồn ƀòn Klah geh rlau 100 lồ kòi 2 kàl, hìu geh priă jền den gam tam tai kàl dơ̆ pe.Kơnờm tam gơl tus tam kòi sre, xã Ia Mơ neh bơsong geh broă kòi phe, làng bol ờ gŏ kơlôi ngòt jơgloh. Mờ 5 thôn, ƀòn, khà cau jơi bơtiàn dồ êt nă cau geh tus 70%, kòi sre neh dong khi tam gơl bơta gĭt wă tàm lơh broă lơh sa, khà hìu rƀah gơmù rơhời bơh ală nam. Ồng Nguyễn Tuấn Anh, đơs: Rài yau, ƀlàng sre ƀòn Klah dê mìng lơh dồ kàl mờ kơnờm jơh tàm dà mìu yàng dê pà lơm, làng bol kal ke ngan bè bơtàu tơngguh lơh sa mờ ngan là tờm kòi sre. Tŭ mờ rbòng dà neh geh lơh tus tàm ƀlàng sre bơh ƀòn dê den tam gơl bơta mờng kwèng kơlôi sơnơng, broă lơh bơh làng bol jơi bơtiàn dồ êt nă cau dê tàm bơtàu tơngguh lơh sa, tơn jơh jơgloh tơrmù rƀah. Broă do di mờ gùng dà bơh Jơnau sồr sồ 08 bơh Tỉñ ủy dê, bơh hơ̆ kòi lơh geh gơguh tus 9 tấn kòi sùh dồ nam. Làng bol gŏ geh cồng nha hơ̆ sồng gơrề uă tus jơh ală thôn, ƀòn, tam gơl geh gùng dà tam phan mờ ngui bơta jak chài măy mŏk tàm broă lơh sa mờ cồng nha lơh geh mờ kòi lơh geh gơguh tai den làng bol gŏ geh cồng nha.

Nàng chồl tơngguh lơh kòi sre tàm tiah nhàr lơgar, kơnhoàl Chư Prông neh geh uă broă dong kờl. Ồng Đinh Văn Dũng, Ƀí thư Huyện ủy Chư Prông, pà gĭt: Kơnhoàl dong kờl sơntìl, phơng sih nàng pơn jờng làng bol tam gơl  tam sơntìl kòi cồng nha lơh geh uă; pơlam ngui bơta jak chài măy mŏk jak chài nàng tềm pềr mờ gơ ai cồng nha, bơta niam bơkah uă. Ală lơh ngan do neh cèng wơl cồng nha pal pơn jờng ngan. Ồng Đinh Văn Dũng, đơs: Mblàng yal ai ală kâp ủy, ală kâp ală gah in nàng lam lơh làm bă tiah, jăt ngan ngồn tàm bơta lơh sa bơh làng bol dê nàng tam gơl broă lơh pa, ià tê sơñio broă tàm gah lơh kòi sre.

Bal mờ bơta tam gơl să pràn kơldang tàm lơh gơlik kòi sre, làng bol ƀòn Klah, xã Ia Mơ neh sơrlèt mờ bơta kal ke, jơgloh rƀah nàng wă rò dồ rài kis pa hờm ram, wil tơl rlau. Ală ƀlàng sre kòi tơlir niam ngan ờ mìng là anih lơh geh kòi phe kwơmàng ngan mờ gam là bơta pơñiờ să, là cơng tàng pà gŏ ai bơta tồ să bơh làng bol jơi bơtiàn dồ êt nă cau dê tàm tiah nhàr lơgar.