VOV4.K’ho - Kơnờm mờ broă geh dờp ală bơta niam bơh ù tiah bơnơm ồs dê, kòi geh lơh tàm tiah ngài Krông Nô, càr Dăk Nông geh bơta bơkah krơi is ngan. Mờ jơnau pơlam, dong kờl bơh dà lơgar, làng bol lơh broă sa kis tàm do neh pơgồp bal lơh geh phe sa bơkah krơi is tàm do dê, cèng geh priă tàm rài kis ring niam bơh broă lơh kòi sre dê.

                                   Ƀlàng sre Buôn Choah mìng lơh kòi ngui kông nghệ kao

Ƀlàng ìs kòi bơh Hợp ták xã lơh sa suơn sre Buôn Choah, kơnhoàl Krông Nô rơmit crư tàm tiah măt tơngai sòl. Di pơgăp jơ̆t nă cau ùr gam pơrlơ̆ kòi. Lŏ Triệu Thị Lan, kòn cau Tày, kis tàm ƀòn Cao Sơn, xã Buôn Choah, kơnhoàl Krông Nô pà git, bơh tŭ mŭt tàm Hợp ták xã lơh broă, lơh kòi jăt khà VietGap, làng bol lơh broă sa ờ hoan glar bòl mờ geh priă uă rơlao: “Bơh broă lơ-òr ù, sih, ƀồm sơnơm, tơnhào... ndrờm geh lơh mờ măi jơh, đơs ngan là broă lơh bơh làng bol tŭ do neh ờ glar bòl rơlao. He mìng sền gròi, cih tàm pang sră sền nđờ ngai sih den ƀồm sơnơm, sih phơng... lơh ờ hoan kal ke rơlao mờ cồng nha geh uă rơlao”.

Ồng Phạm Xuân Lai, Phó Kwang atbồ Hợp ták xã lơh sa suơn sre Buôn Choah pà git, mpồl lơh sa do pơgồp bal mờ làng bol lơh broă sa lơh rơlao 440 lồ kòi sre 2 kàl, ngui sơntìl ST24, ST25. Kàl do cồng nha kòi geh 10 tấn tàm 1 lồ, gơmù di mơ jăt mờ kàl lài. Mờ khà priă tăc kòi ris geh rơlao 8 rơbô đong tàm 1 kĭ, khà priă phe rơlao 20 rơbô đong tàm 1 kĭ, làng bol lơh broă sa geh priă cồng di pơgăp 50 tơlăk đong tàm 1 lồ. Tài hìu prăp ờ dờng bal mờ bơta pràn ờ geh, Hợp ták xã mìng prăp ờ uă kòi nàng măi gơs phe, geh sùm 3 anih tăc tàm kơnhoàl Krông Nô, ƀòn dờng Gia Nghĩa, càr Dăk Nông mờ ƀòn dờng Buôn Ma Thuột, càr Dăk Lăk: “Lơh jăt khà VietGap geh tơl niam phan kă bro, geh jòi anih tờm lơh gơs, den khà priă phan kă bro gơguh uă. Bè bi neh gŏ den, kòi ris do mờ tŭ do tăc geh 8 rơbô đong, 8 rơbô 200 đong tàm 1 kĭ. Rơndeh ôtô den tơl mƀlàng bơh 2 tus 3 nơm neh mŭt kơ̆p lài nàng blơi”.

                                                     Tơwès kòi tàm kơnhoàl Krông Nô

Ƀlàng sre Buôn Choah tềng jơng bơnơm ồs Nâm Blang, tềng gah dà dờng Krông Nô, gơwèt tiah Kông viên địa cất gùt plai ù UNESCO Dăk Nông dê. Tàm do geh rơlao 700 lồ sre ndrờm geh lơh mờ sơntìl ST24, ST25, do là ală sơntìl kòi phe gơwèt phe bơkah ngan dunia dê. Bơh să tờm ồng Hồ Quang Cua, cau lơh geh sơntìl kòi ST24, ST25 tŭ tus tàm do kung pal dờp kòi phe geh lơh tàm Buôn Choah bơkah rơlao mờ ală tiah ndai. Jăt mò Trần Thị Thanh Vân, Củ tịc Mpồl làng bol lơh broă sa xã Buôn Choah yal, ƀlàng sre geh mƀùr bơh dà dờng Krông Nô, bal mờ bơta geh lài bơh lŭ bơnơm ồs neh dong kờl lơh kòi phe Buôn Choah bơkah krơi is ngan. Mò Trần Thị Thanh Vân yal: “Ờ geh tiah lơi geh ù tiah niam bè tàm tiah do, den tŭ do bol añ geh lơh niam broă lơh, lơh niam phan kă bro den geh uă ngan mpồl lơh sa kă bro jòi tus, kờñ blơi kòi kung kờñ geh anih lơh gơs. Jơnau kơ̆p kờñ bol añ dê là bơ̆t bơtàu geh khà măt kă bro, den hơ̆ sồng lơh geh prăp gàr mờ ờ lời gơtìp tiah ndai bơrlŭ bal phe mờ Buôn Choah dê. Mờ bol añ kung lơh ngan là lơh jăt ală kơrnoăt bơta niam, tŭ do VietGap den tus do tai geh uă rơlao tai, lơh kòi hữu kơ, nàng tơnguh bơta kwơ”.

Ồng Doãn Gia Lộc, Kwang atbồ phòng Nông nghiệp mờ Phát triển Nông thôn kơnhoàl Krông Nô pà git, kòi phe Buôn Choah neh geh sră dờp phan OCOP 4 sơrmañ càr dê. Bal mờ khà măt kă bro phe Buôn Choah neh geh, kơnhoàl gam bơ̆t bơtàu khà măt phan kă bro mpồl bal Phe Krông Nô, nàng jòi geh anih lơh gơs mờ sră dờp phan geh lơh krơi is geh ai mờr 500 lồ sre lơh kòi tềng jơng bơnơm ồs tàm kơnhoàl do dê. Tài bă ù geh ờ uă, kơnhoàl gam wèt gùng dà broă lơh phe bơkah mờ sơntìl kòi ST24, ST25, lơh jăt khà VietGap, wèt tus lơh phe hữu kơ, mờ hòi jà bơcri priă lơh gơs niam, tơnguh uă bơta kwơ gar phe tàm ù tiah bơnơm ồs. “Bè đah kơnhoàl kung bè ală anih lơh broă tờm den pal pơgồp bal nền nòn mờ ală hợp ták xã nàng ai geh, atbồ phan geh lơh niam ngan. Dơ̆ bàr là pal geh kơ cế broă lơh nàng gàr jơh phan geh lơh bơh sơnrờp drơng tàm broă lơh niam tàm kơnhoàl do dê. Ờ mìng là tăc phe bè ờs, mờ tơnơ̆ mờ hơ̆ gơtùi lơh gơs niam rơlao, bè lơh ƀañ phở bơh phe ST25, ƀañ phe ST25..., den phan geh lơh geh gơguh bơta kwơ uă, ờ di pal là bơh 20 tus 25 rơbô đong tàm 1 kĭ phe tai, mờ tŭ hơ̆ lơh gơs niam ai geh priă tàm 1 kĭ phe tus 50 rơbô đong”.

Krông Nô là tiah gơwèt “Jơnau yal yau dà mờ ồs” tàm Kông viên điạ cất gùt plai ù UNESCO Dăk Nông dê. Dờp bal ală bơta krơ is geh bơh ù tiah bal mờ trồ tiah dê, pơgồp bal mờ broă lơh sa suơn sre niam ờ do ờ dă, kòi tàm tiah bơnơm ồs Krông Nô gam cèng wơl ală kàl tơnhào hờm ram ai làng bol lơh broă sa in.

Cau mblàng Ndong Brawl