VOV4.K’ho - Tàm broă bơ̆t bơtàu ƀòn lơgar pa, broă bơyai lơh sa pơgồp bal mờ tăc phan geh lơh bơh broă lơh sa suơn sre ai làng bol in là pal geh. Mơya, broă geh tơnhào uă, gơmù priă tăc, kal ke tàm broă tăc kung gam gơlik geh mờ uă bơta phan tam. Tàm kơnhoàl Krông Bông, càr Dăk Lăk geh di pơgăp 1 rơbô lồ ù tam prìt sơkò mờ gam mŭt tàm kàl tơnhào uă, tàm tŭ khà priă tăc gơmù mhar ngan. Priă bơcri tàm broă lơh gơguh uă mờ plai prìt sơkò tăc ờ geh priă, gam lơh cau tam gơtìp tàm dùl kàl ờ geh priă. Geh bơta do là tài làng bol tam sơntìl prìt sơkò ờ di pal nàng tăc mờ lơgar bơdìh.

Hìu nhă ồng Y Then Mkang, kis tàm ƀòn Cư̆ Drăm, xã Cư̆ Drăm, kơnhoàl Krông Bông tam 2 lồ prìt sơkò gam tàm tơngai dum uă. Ồng Y Then pà git, di lah plai prìt sơkò tăc geh priă, tàm 1 poh là ồng geh tơnhào jơh. Mơya, tus tŭ do, cau tus lùp nàng blơi ờ uă ngan mờ cau mìng blơi mờ khà priă nggùl mờ khà tŭ bồ kàl. Ồng Y Then ờ sŭk mờ đơs, di lah tăc mơ den hìu nhă gơtìp hoàc huơr. Gam di lah kơ̆p jŏ ir den plai prìt sơkò gơtìp ồm, hoàc huơr sơlơ uă rơlao: “Nam do bồ kàl lơh sa den tăc geh bơh 16 tus 17 rơbô đong tàm 1 nai plai dờng bơh 2 tus 3 kĭ, gam gơwèt mờ plai dềt den bơh 9 tus 10 rơbô đong tàm 1 nai plai dềt; mơya tŭ do plai dờng mìng gam bơh 8 tus 9 rơbô đong tàm 1 nai, plai dềt den bơh 2 tus 3 rơbô đong tàm 1 nai mơ; gơmù nggùl pơn drờm mờ bồ kàl. Gơmù khà priă bè hơ̆, mơya kung gam kal ke tàm broă tăc, ờ geh cau tus blơi. Plai prìt sơkò dum uă, sơbì tơn tàm suơn ờ gơtùi tăc”.

Kung ndrờm bè hơ̆ sơl, kàl prìt sơkò nam do, hìu nhă ồng Y Lập Êban, kis tàm ƀòn Chàm B, xã Cư̆ Drăm, kơnhoàl Krông Bông tam 1 lồ nggùl. Jăt ồng Y Lập đơs, nam do khà priă phơng sih, sơnơm sền gàr phan tam ndrờm gơguh uă ngan, khà priă ngai lơh broă, tơnhào kung gơguh sơl, bơh 200 rơbô đong tàm 1 nă tus 300 rơbô đong tàm 1 nă. Den tàng, broă plai prìt sơkò gơmù khà priă uă ngan lơh hìu nhă sơlơ gơtìp hoàc huơr uă rơlao. “Nam lài, hìu añ tăc geh mờr 100 tơlăk đong bơh 1 lồ nggùl ù tam prìt sơkò, mơya nam do kung tàm bă ù hơ̆ sơl mìng geh di pơgăp bơh 30 tus 50 tơlăk đong mơ, đơs ngan là làng bol gơtìp hoàc huơr uă”.

  Gah lơh sa suơn sre lam sồr, dong kờl cau tam rơhời tam gơl mờ sơntìl Win, Md2 nàng tăc mờ lơgar bơdìh

Jăt khà kờp bơh Phòng Nông nghiệp mờ Phát triển Nông thôn kơnhoàl Krông Bông yal, gùt kơnhoàl tŭ do geh mờr 1 rơbô lồ ù tam prìt sơkò, tơrgùm uă ngan tàm xã Cư̆ Drăm, Yang Mao mờ Cư̆ Pui. Prìt sơkò tàm do mìng là prìt sơkò sơntìl Cayen, khà geh pah nam kờp dŭ geh 40 rơbô tấn plai.

Jăt ồng Võ Tấn Trực, Kwang atbồ Phòng Nông nghiệp mờ Phát triển Nông thô kơnhoàl Krông Bông đơs, sơntìl Cayen bŭ lah geh cồng nha uă, mơya ờ gơdờp mờ broă nàng tăc mờ lơgar bơdìh. Den tàng, uă nam do, cau tam prìt sơkò tàm kơnhoàl Krông Bông sùm pal gơtìp mờ broă tăc mờ ring niam, geh nam tăc geh, geh nam ờ gơtùi tăc. Bơta ờ niam ndai tai bơh sơntìl plai prìt sơkò do là dum mhar ir; mờng tơnhào ndrờm bal tàm tơngai bơh 2 tus 3 poh, lơh gơtìp broă geh uă rơlao mờ broă kờñ, den tàng cau blơi rồn bơklơn khà priă. Gah lơh sa suơn sre gam lam sồr, dong kờl cau tam rơhời tam gơl tam ală sơntìl prìt sơkò ndai bè: Win ha là Md2, ală bơta sơntìl do di gơlan geh tăc mờ lơgar bơdìh mờ tơngai tơnhào geh jŏ bơh 2 tus 3 nhai. Kơnhoàl Krông Bông kung gam hòi jà mpồl lơh sa kă bro tus bơcri priă lơh hìu măi lơh plai prìt sơkò nàng bơsong jơh broă tăc. Ồng Võ Tấn Trực pà git: “Bol añ gam ai gùng dà nàng làng bol in rơhời tam gơl sơntìl prìt sơkò bè lơi di pal mờ broă tăc bal mờ ală jơnau kờñ bơh cau blơi dê nàng di pal mờ broă tăc mờ lơgar bơdìh, sơntìl bol añ kơ̆p kờñ làng bol geh tam gơl là sơntìl Win ha là Md2. Tŭ do làng bol neh geh lam sồr, bơto sồr den làng bol kung gam rơhời tam gơl mờ ală sơntìl prìt sơkò do. Ală sơntìl do plai dềt rơlao mơya tăc geh niam, gơtùi tăc mờ lơgar bơdìh, gơtùi lơh gơs phan sa tàm sơlong. Bè ală bă ù gam tai, gah lơh sa suơn sre neh crơng gơs broă dong kờl làng bol, bơto sồr khoa họk kỹ thuật, dong kờl làng bol tam prìt sơkò niam ờ do ờ dă nàng drơng tàm drà kă bro tàm lơgar”.

Ală nam do, prìt sơkò geh uă kàl tơnhào geh mờ tăc geh priă, cèng geh uă priă ai làng bol tàm ală xã rơƀah tàm tiah ngài in bè: Cư̆ Drăm, Cư̆ Pui mờ Yang Mao kơnhoàl Krông Bông in. di lah geh bơto sồr tam mờ lơh geh sơntìl prìt sơkò geh tơl bơta niam nàng tăc mờ lơgar bơdìh ha là geh hìu măi lơh nàng geh tăc niam, prìt sơkò gơtùi gơs dùl tàm ală phan tam geh broă lơh sa pràn, di pal mờ ală tiah geh uă dòr bơnơm ñhoa, broă lơh sa gam uă kal ke bè kơnhoàl Krông Bông dê.

Cau cih Tuấn Long-Cau mblàng Ndong Brawl