Hìu bơnhă bi Đinh Thị Phước, deh nam 1996, ơm tàm ƀòn Đăk Kjông, xã Lơ Ku, kơnhoàl Kbang, càr Gia Lai lài do là hìu rƀah tài ờ tơl ù lơh sa mờ pa cah hìu lik ơm kis. Bàr nă ùr bơklau bi geh 2 nă kòn dềt, kis kơnờm jơh lơm tàm 5 sàu ù mè bèp dê pà mờ lòt apah. Rài kis ờ tơl ngui tơl sa lơh hìu bơnhă tìp uă kal ke.

Gĭt gŏ rài kis hìu bơnhă bi dê, Ci ƀộ ƀòn Đăk Kjông neh jàu đảng viên să tờm tơn bơto pơlam, pơndờm pơnđiang bi Phước tus bal dờp apah sền gàr 12 lồ brê; pơlam bi sền gàr brê di bơta chài. Bơh ndo, bi geh priă jền sùm 36 tơlak đong dồ nam bơh nam 2014 tus tŭ do. Tềng hơđơm mƀur chi brê, tŭ tờm chi gam dềt, bi tam tai ală bơta khuah rbài nàng tơngguh tai priă lơh geh. Kơnờm tơryăng tơryồng lơh sa, tus tŭ do ùr bơklau bi Phước neh blơi geh tai 2 lồ ù, digơlan lồi nam do klàs bơh rƀah. Bi Phước chờ hờp ngan yal: Hìu bơnhă añ là hìu rƀah, ưn ngài kwang bàng neh sền gròi dong kờl. Añ rơ̆p lơh ngan lơh sa, tềm pềr nàng geh priă blơi ù lơh hìu mờ bơtàu tơngguh lơh sa hìu bơnhă. Rài kis hìu bơnhă añ dê tŭ do pơndrờm mờ lài den neh niam rlau uă ngan rao.

Ƀòn Đăk Kjông, xã Lơ Ku, kơnhoàl Kbang, càr Gia Lai geh 84 hìu làng bol bal mờ 426 nă làng bol. Tàm do, 95% làng bol là cau Bahnar. Lài do, ƀòn ơm tàm tiah dơlam tơnau dà lơh đèng dà An Khê- Ka Nak. Nam 2009, ƀòn ntrờn tus tiah jơnhoa rlau, ngài mờ tiah yau 14 kơi sồ. Mờ bă ù 8 sàu ù mìr, 1 sàu 7 ù sre lơh kòi 2 kàl geh pà ai tơl hìu in, bơh sơnrờp rài kis làng bol dê tìp uă kal ke. Mơya kơnờm bơta đơng lam, sồr lơh jơh nùs jơh tồr ngan bơh Ci ƀộ thôn, mpồl làng bol thôn, làng bol ƀòn lơgar rơhời lơh sir hìu pa kơ̆ kơl jăp mờ pơgồp bal pràn bal mờ dà lơgar lơh gùng ƀê tông mờ hìu mpồl bơtiàn. Làng bol lơh is pơnggàr, mpồng ƀòn mờ bal mờ gơ̆p sền gàr gùng ƀòn tơlir, sàng goh, niam.

Ờ mìng bè hơ̆ lơm, làng bol tàm ƀòn Đăk Kjông gam geh dong kờl càn priă lơh sa, geh pà kơnrồ mờ uă broă lơh broă sa ndai nàng tơngguh tai priă lơh geh. Tơnơ̆ uă nam lơh ngan, digơlan tus nhai 11 nam 2024, ƀòn Đăk Kjông rơ̆p geh tơl jơnau sồr ƀòn lơgar pa, lơh tềl bơta tam gơl să he kwơmàng bơh jơh gùt mpồl bơtiàn dê. Ồng Đinh Bới, Ƀí thư Ci ƀộ ƀòn Đăk Kjông, xã Lơ Ku, kơnhoàl Kbang, càr Gia Lai, pà gĭt: Añ là Ƀí thư Ci ƀộ, den tàng jàu đảng viên in dong kờl hìu rƀah, hìu kal ke. Añ kung neh mblàng yal ală hìu rƀah in pal lơh ngan lơh sa, jòi tai priă jền ai hìu bơnhă in nàng rài kis kơ̆ kơl jăp, hờm ram rlau, mhar lik klàs bơh bơta rƀah. Jơh nùs bơtàu tơngguh lơh sa ai hìu bơnhă in.

Ală nam do, broă bơ̆t bơtàu ƀòn lơgar pa tàm tiah làng bol jơi bơtiàn dồ êt nă cau jăt nùs nhơm Jơnau sồr sồ 12 ngai 13 nhai 02 nam 2018 bơh Mpồl Lơh kơnòl broă sùm Tỉñ ủy càr Gia Lai dê, pah nam Đảng ủy xã Lơ Ku, kơnhoàl Kbang ndrờm lơh jơnau lơh nền tàm pơrjum, broă rơndăp lơh lam lơh jăt loh làng ală broă jàu, jơnau sồr kơnhoàl dê jàu. Đảng ủy jàu kwang bàng, kông cưk mờ ală mpồl cau drơng kơnòl tơl thôn, ƀòn, is ồn là pơlam ală hìu rƀah cih măt dan lik klàs ƀah. Làng bol geh dong kờl bè bơta chài tam phan, ròng phan mờ ală bơta chài pal geh tàm lơh sa.

Xã Lơ Ku, kơnhoàl Kbang, càr Gia Lai kung pơgồp bal uă broă lơh dà lơgar bè bơtàu tơngguh lơh sa- mpồl bơtiàn tiah jơi bơtiàn dồ êt nă cau mờ broă lơh tơrmù rƀah kơnhăp, ai pà chi sơntìl, phơng sih, phan ròng mờ măy mŏk ai làng bol in lam lơh ală broă lơh tơrlòng lài. Đảng viên geh jàu tus tơn ƀòn nàng pơrjum bal mờ ci ƀộ, mblàng yal, dong kờl ală hìu rƀah. Bulah gam uă bơta lòng, broă lơh tơrmù rƀah tàm tiah do neh geh ală cồng nha niam ngan, rơhời dong kờl làng bol kòn cau Bahnar bơtàu tơngguh uă rài kis mờ bơtàu tơngguh kơ̆ kơl jăp. Tàm ală nam rềp ndo, khà hìu rƀah bơh ƀòn Đăk Kjông dê gơmù uă ngan bơh 38,46% nam 2021 gơmù mìng gam 5,8% tàm nam 2023. Ồng Trần Xuân Nam, Phó Ƀí thư Đảng ủy, Củ tịc Anih duh broă Làng bol xã Lơ Ku, kơnhoàl Kbang, càr Gia Lai pà gĭt: Kwang bàng, đảng viên geh jàu tus den pah nhai geh kơnòl yal Đảng ủy in bè broă lơh, jăt sền dong kờl ală hìu rƀah, bal mờ ală oh mi ƀí thư ci ƀộ tàm ƀòn hơ̆ tàm broă lơh mblàng yal hòi jà, dong kờl làng bol brồ guh lik klàs rƀah kơ̆ kơl jăp; lơh jăt ală dơ̆ hòi jà tam gơl bơta mờng sơnơng, bơta mờng lơh tàm tiah làng bol jơi bơtiàn dồ êt nă cau. Bulah cồng nha tơrmù rƀah bơh xã dê ờ hềt lơh geh di bè bơta kơ̆p kờñ mơya mờ bơh sền swì den neh geh bơta bơtàu tơngguh gơ niam đau rlau lơh geh jơnau sồr tơrmù rƀah tàm ù tiah xã dê.

Bal mờ bơta sồr lơh jơh nùs jơh tồr mờ lòt bal bơh Đảng ủy mờ Gơnoar ătbồ xã dê, làng bol kòn cau Bahnar tàm ƀòn Đăk Kjông, xã Lơ Ku, kơnhoàl Kbang, càr Gia Lai neh kơ̆ kơl jăp rài kis, tơrmù rƀah mhar nàng bơ̆t bơtàu ƀòn lơgar pa niam bơnĕ, jak chài. Gùng lòt do pà gŏ nùs nhơm tam klăc bơh cau Bahnar dê mờ gơnoar broă kwơmàng bơh Đảng dê tàm broă lòt bal mờ bơtàu tơngguh rài kis ai làng bol tiah làng bol jơi bơtiàn dồ êt nă cau in.