VOV4.K’ho - Xã Lộc Bắc, kơnhoàl Bảo Lâm, càr Lâm Đồng geh rơlao 1 rơbô 500 hìu mờ 4 rơbô 858 nă làng bol, tàm hơ̆ làng bol kòn cau geh mờr 73%. Kơnờm mờ broă tam gơl pràn kơl dang tàm broă kơlôi sơnơng mờ broă lơh, ai bơta gơguh jăk khoa họk kỹ thuật ngui tàm broă lơh, bal mờ broă sền gròi, dong kờl, bơcri priă bơh Đảng mờ Dà lơgar bè ală bơta den tàng rài kis lơh sa bơh làng bol kis tàm do neh tam gơl pah ngai. Satềp nam do, lơh jăt nền nòn ală broă rơcang sơndră mờ kòp Kovid-19, mơya làng bol kung gam chờ nam pa, wă rò satềp hờm ram sơl.

Tus tàm xã Lộc Bắc, kơnhoàl Bảo Lâm, càr Lâm Đồng tàm 1 ngai sơnrờp bồ nam pa, tŭ tàm tiah do gam lơh jăt bơta bè ờs pa gơdờp mờ kòp Kovid-19, bol añ neh mùl màl ngoh rơngăc ngan sơl tềng đăp mờ bơta “tam gơl să jan” bơh 1 tiah ƀòn lơgar geh uă làng bol là kòn cau K’ Ho dê lơm do. Ală hìu tìm mờ ja, cang mờ đơr ngai lơi tŭ do neh tam gơl mờ ală hìu bơ̆t bơtàu kơl jăp, gùng lòt geh dă mờ bê tông niam, hìu bơsram, hìu sơnơm geh lơh dờng niam... pà gŏ rài kis bơh làng bol neh hờm ram, geh tơl lơm.

Tềng drăp tơrnờm ñô yờ năc, ồng K’ Làng, kis tàm ƀòn 3, xã Lộc Bắc chờ hờp pà git, nam do, bŭ lah gơrềng bơh kòp Kovid-19, mơya khà priă kơphe kung gam gơguh uă, hìu lơi kung geh 40, 50 tơlăk đong tus 200, 300 tơlăk đong den tàng bơyai lơh chờ nam pa geh tơl rơlao. Geh cồng nha do là kơnờm mờ broă ngui khoa họk kỹ thuật tàm broă tam phan. Ồng K’ Làng yal: “Kung kơnờm bơh Đảng mờ Dà lơgar sền gròi bơcri priă, dong kờl tam kơphe, ce, tam gơl broă lơh sa den tàng rài kis làng bol neh tơnguh bơtàu uă ngan pơn drờm mờ lài. Gùng lòt, hìu bơsram, hìu sơnơm kung neh geh lơh pa dờng mờ niam, broă lòt rê, bơsram sră bơh oh kòn geh ƀuơn niam. Rài kis tơnguh bơtàu den tàng làng bol chờ hờp ngan”.

Lộc Bắc là xã mìng tam phan tam jŏ tơngai, tàm hơ̆ mìng là kơphe mờ bă ù ơnàng rơlao 164 lồ, tiêu 22 lồ mờ git nđờ rơhiang lồ tòm chi sa plai ală bơta. Geh uă ngan bă ù tam phan do ndrờm neh tam gơl mờ ală bơta sơntìl pa, ai broă gơguh jăk khoa họk kỹ thuật tàm broă tam, sền gàr sơnka phan tam, tơmù khà priă bơcri, mơya tơnguh uă cồng nha broă lơh sa tàm dùl bă ù bal. Mìng kờp is tờm kơphe, di lah nam 2017 lơh geh cồng nha 2 tấn 7 tạ tàm 1 lồ den tus nam 2020 geh 3 tấn tàm 1 lồ mờ tus nam 2021 geh 3 tấn 3 tạ tàm 1 lồ. Lơh sa gơguh, priă geh gơguh den tàng rài kis bơh làng bol tàm do neh hờm ram mờ pas gơs rơlao pơn pơn drờm mờ lài. Ồng K’ Pép, Ƀí thư Ci ƀộ ƀòn 5, xã Lộc Bắc chờ hờp pà git, tềng đăp mờ bơta gơrềng bơh kòp Kovid-19, ờ khin kơlôi là rài kis bơh làng bol tàm do ờ gơtìp, wă rò nam pa hờm ram mờ geh tơl bè do: “Bè cồng nha bơh tŭ lơh jăt broă lơh jơnau kờñ dà lơgar bơ̆t bơtàu ƀòn lơgar pa, tus tŭ do rài kis neh tam gơl. Jơh ală hìu sèt neh geh lơh niam, gơmù rơhời hìu rơƀah mờ gơguh rơhời hìu tơl ngui tơl sa pah nam, geh hìu gam blơi rơndeh ôtô pa, oh kòn geh lòt bơsram tus gùng tus dà. Chờ ngan là làng bol neh tam gơk broă tam phan, git tàm broă lơh sa den tàng priă geh gơguh. Kòp tê jê să tus hờ hìu sơnơm kham, sơm kòp, kal ke, glar bòl den gah dong kờl bal, sùm lam sồr bal pơs wàs kloh niam ƀòn lơgar, ờ geh cau gam gơtìp jơgloh, rơƀah tai. Rài kis neh gơguh den tàng làng bol tus bal pràn tàm ală broă lơh ƀòn lơgar lam sồr, tàm hơ̆ geh broă bơ̆t bơtàu ƀòn lơgar pa”.

Ồng K’ Núi, Củ tịc UɃÑZ xã Lộc Bắc đơs, tus lồi nam 2021, xã neh lơh gơs jơh 19 tàm 19 khà broă bơ̆t bơtàu ƀòn lơgar pa. Ờ sŭk ngan là khà broă tơnguh uă priă geh, tơmù rơƀah, mơya xã kung lơh gơs mờ cồng nha geh niam. Bơta kwơ broă lơh sa tàm dùl bă ù tam phan geh rơlao 110 tơlăk đong tàm 1 lồ 1 nam, priă geh tơl nă cau geh mờr 42 tơlăk đong mờ khà hìu rơƀah mìng gam 4,2%. Tus do, xã neh pơn jăt tai lam sồr làng bol ngui khoa họk kỹ thuật tàm broă lơh sa nàng tơnguh uă bơta phan phan geh lơh, tơnguh priă geh. “Lài do, rài kis làng bol tàm xã Lộc Bắc kal ke ngan tài ờ hềt git ngui khoa họk kỹ thuật tàm broă lơh sa. Tàm ală nam pa do, ai khoa họk kỹ thuật tàm broă lơh sa, cồng nha phan tam gơguh, priă geh gơguh uă rơlao den tàng rài kis lơh sa làng bol dê neh rign niam mờ tơnguh bơtàu. Tus do, xã lam sồr làng bol pơn jăt tai ngui khoa họk kỹ thuật uă rơlao bè broă lơh sa suơn sre. Tơngu me là pal gàr geh khà broă bè priă geh (làng bol neh geh 42 tơlăk đong tàm 1 nam), gàr niam rài kis kơl jăp, wèt tus bơ̆t bơtàu ƀòn lơgar pa gơguh uă”.

Bol añ tàm tơngăc Lộc Bắc tàm trồ tiah mrềt niam bơh mho bồ nam tềng gùng dă mờ cài, bàr gah gùng là ală hìu dờng niam pa geh lơh tàm tiah brê bơnơm dê mờ ală suơn kơphe, tờm chi sa plai gam hòn gơs niam, di gơlan cèng geh ală kàl tơnhào uă... Rài kis làng bol kòn cau K’ Ho di gơlan geh tơnguh bơtàu sùm bơh nam pa do.

Cau cih Quang Sáng- Cau mblàng Ndong Brawl