Tơnơ̆ rlau 2 nam lơh jat Jơnau lơh nền sồ 749 bơh Thủ tướng Cíñ phủ dê, tus tŭ do, 60% sră nggal kâp xã bơh càr Kon Tum dê neh geh bơsong tàm internet, lơh geh jơnau kờñ ai tơlik tus nam 2025. Bơdìh hơ̆ tai, rlau 16 rbô 800 lồ chi tam, 142 suơn dờng geh ngui ală gơguh jak bơta jak chài mờ măi mok, rlau 116 rbô 600 hìu bơnhă lơh sa suơn sre tus bal kă bro tàm ală anih tac bro điện tử; broă lơh thôn 3, xã Tân Lập, kơnhoàl Kon Rẫy geh tơl ală bơta là thôn ngac ngar,… Bulah bè hơ̆, jat ồng Đặng Trần Huân, Phó Kwang atbồ Sở Broă lơh sa mờ Bơtàu tơnguh Ƀòn lơgar càr Kon Tum đơs, càr kung gam pal kong mờ uă bơta lòng tŭ lam lơh tam gơl sồ tàm bơt bơtàu ƀòn lơgar pa: “Broă git wă bè tam gơl sồ tàm bơt bơtàu ƀòn lơgar pa là ờ ndrờm bal. Bơta chài mờ jơnau git wă bơh kông chức lam lơh kơnòl broă tam gơl sồ gam ờ hềt niam. Phan bơna mờ măi mok yal tơnggit jơnau tàm bàr, pe xã ờ hềt di mờ jơnau sồr, kơnòl broă tam gơl sồ”.

Mờ 68% khà kờp làng bol càr dê ơm kis tàm tiah ƀòn lơgar mờ 73% cau lơh broă tàm gah broă lơh sa suơn sre brê bơnơm, càr Kon Tum đal git tam gơl sồ là broă lơh kuơmàng nàng bơtàu tơnguh lơh sa suơn sre, ƀòn lơgar jat gùng dà tam gơl pa, dong làng bol lơh broă sa lơh broă mờ priă tă ờ uă mơya lơh geh priă cồng uă ngan rlau jơh.

Jat ồng Đặng Thanh Long, Củ tịc Mpồl tam klac ală Mpồl Jak chài mờ bơta chài măi mok càr Kon Tum pà git, tài broă lơh sa - mpồl bơtiàn gam kal ke, broa wtam gơl sồ tàm gah broă lơh suơn sre mờ tiah ƀòn lơgar bơh càr dê lài ngan pal sơrlèt gan ală kòl yan, hơ̆ là broă ngui măi mok ờ uă, ờ huan geh măi mok, ală broă lơh tam phan, lơh sa kung gam geh lơh jat tàm mờng chài bơh làng bol lơh broă sa dê… Đơs tus broă lơh lơh geh tam gơl sồ tàm broă lơh sa suơn sre wèt tus bơtàu tơnguh ƀòn lơgar ngac ngar, ồng Đặng Thanh Long pà git: “Lài ngan hơ̆ là bè broă lơh yal tơnggit jơnau, mblàng yal nàng gơtùi gŏ loh gơnoar broă, bơta kuơ mờ bơta kơn jơ̆ bơh tam gơl sồ dê tàm bơtàu tơnguh broă lơh sa suơn sre, do là dùl bơta pal geh. Tơnguh bơta niam cau lơh broă kờp bal mờ ală cau tờm lơh sa, geh ală hìu bơnhă lơh broă sa, mpồl lơh bal, mpồl lơh broă bal, mpồl lơh sa kă bro mờ să tờm mpồl kwang bàng – ală cau tus bal tàm broă lam lơh tam gơl sồ tàm lơh sa suơn sre. Bơt bơtàu bơnàng jă, pang mạng xã hội sồ mờ yal jơnau sồ. Bơta lòt bal mờ lơh broă bal bơh jơh gùt anih lơh broă cíñ trị, ală kâp ủy Đảng, gơnoar atbồ, ală mpồl lơh sa kă bro dê tàm broă lơh sa”.

Tus tŭ do, càr Kon Tum neh geh 48 tàm 86 xã tơl khà ƀòn lơgar pa, tàm hơ̆ geh 7 xã ƀòn lơgar pa gơguh jơnhua mờ 2 xã ƀòn lơgar pa lơh lài. Bal mờ hơ̆, càr kung nẻh geh 21 thôn tơl khà ƀòn làng bol ơm kis ƀòn lơgar pa lơh lài, 65 tàm 498 thôn, ƀòn làng bol jơi bơtiàn dồ êt nă cau tơl khà ƀòn lơgar pa. Do là dùl tàm ală bơnàng jă kuơmàng nàng càr lam lơh ală broă lơh pa, bơceh lơh mờ dipal nàng kờñ lơh geh tam gơl sồ tàm broă lơh sa mờ bơtàu tơnguh ƀòn lơgar ngac ngar.