Gia Bắc là xã tiah sar lơgar ngài bơh kơnhoàl Di Linh, càr Lâm Đồng dê bal mờ 95% làng bol ơm kis là làng bol kòn cau K’Ho. Bal mờ bơta sền gròi bơcri priă bơh Đảng mờ Dà lơgar dê bè tơl ală bơta, bơta lơh ngan brồ guh bơh să tờm tơl nă làng bol tàm ală ƀòn lơgar dê là bơta pal geh lài ngan nàng bơtàu tơngguh lơh sa mờ rài kis. Gĭt wă loh geh bơta hơ̆, bal mờ ală đảng viên ndai tàm xã, bơh ngai pa mŭt tàm mpồl Đảng tơn, bi K’Bơn, kwang bàng kơnòm să bơh xã Gia Bắc, kơnhoàl Di Linh, càr Lâm Đồng dê neh lơh ngan jơh nùs jơh pràn he dê tàm mblàng yal, hòi jà làng bol lơh jăt ală srơh bơh xã dê lam lơh. K’Bơn pà gĭt nàng làng bol in gĭt mờ lơh jăt, tơl nă kwang bàng đảng viên pal là cau lam lài lơh krơh lòt lài tàm lơh jăt tơl broă lơh. Bi K’Bơn, đơs: Tŭ gơgơs là dồ nă đảng viên, añ geh tŭ niam wă wờng loh rlau bè ală jơnau sồr, gùng dà bơh Đảng dê, broă dong kờl, adăt boh lam bơh Dà lơgar dê. Kơnờm bơh hơ̆, añ gơtùi lơh niam broă lơh geh Đảng ủy, gơnoar ătbồ dê jàu. Bơh hơ̆, dong kờl làng bol geh uă rlau tàm bơtàu tơngguh lơh sa, bơ̆t bơtàu ƀòn lơgar pa lơh geh cồng nha rlau.

Bơh broă sền gròi broă lơh bơ̆t bơtàu Đảng, bơ̆t bơtàu anih lơh broă cíñ trị pràn kơnhăp, tus tŭ do Đảng ƀộ xã Gia Bắc neh tơmŭt geh 96 nă đảng viên, uă ngan là đảng viên jơi bơtiàn dồ êt nă cau, pơrjum tàm 9 ci ƀộ. Jăt ồng K’Thanh, Ƀí thư Ci ƀộ ƀòn Ka Sá, xã Gia Bắc, kơnhoàl Di Linh dê yal, đảng viên là pal lơh krơh tàm tŭ lơh jăt ală jơnau sồr, gùng dà, broă lơh bơh Đảng dê, mờ adăt boh lam bơh Dà lơgar dê. Tài bè hơ̆, bơdìh mờ sùm bơsram, tàp bơsram, bơsram tai ală jơnau gĭt wă geh kwơ nàng bơto yal wơl mờ làng bol ƀòn lơgar in, ală đảng viên tàm ci ƀộ ndrờm tus bal jơh nùs hòi jà làng bol tam gơl, rơndăp tăp sèng chi tam, tơngguh tai lơh broă lơh sa, dong kờl gơ̆p bơtàu tơngguh lơh sa, lòt tàm ồp tê, tam pà bal sơntìl chi tam phan ròng, pà ù lơh gùng lòt rê, bơ̆t bơtàu ƀòn lơgar pa….Kơnờm bơh hơ̆, rài kis lơh sa làng bol dê tàm ƀòn Ka Sá đơs bal, xã Gia Bắc đơs is mhar ngan tơn jơh jơgloh tơrmù rƀah, brồ guh gơgơs là xã lơh geh tơl broă jàu bơ̆t bơtàu ƀòn lơgar pa. Ồng K’Thanh, Ƀí thư Ci ƀộ ƀòn Ka Sá, đơs: Lơh jăt Ală jơnau neh lơh nền sồ 04 bơh Huyện ủy kơnhoàl, bơh Dà lơgar dê bè “bơ̆t bơtàu ƀòn lơgar pa”, làng bol tàm ƀòn lơgar lơh jăt jơh nùs ngan, pà ù nàng pờ ơnàng gùng lòt. Mờ gơnoar broă là Ƀí thư Ci ƀộ ƀòn, să tờm añ sùm mblàng yal, hòi jà cau hìu bơnhă, làng bol, gơ̆p să tàm ƀòn bơtàu tơngguh lơh sa, bơtàu tơngguh rài kis, lơh tam gơl muh măt thôn, ƀòn dê.

Ờ mìng geh kwang bàng đảng viên tàm ală ƀòn lơgar lơm, ală đảng viên là kwang đơng lam bồ Anih duh broă Làng bol ală xã, ƀòn drà dềt bơh kơnhoàl Di Linh dê kung lơh jăt niam sơl gơnoar broă lam lài, lơh krơh bơh ală broă lơh loh làng mờ geh kwơ ngan. Gơ wèt mờ bi K’Ly, là dồ nă đảng viên ăt gơnoar broă Phó Củ tịc Anih duh broă Làng bol xã Tân Thượng, kơnhoàl Di Linh dê ờ mìng lơh niam broă lơh kơnòl broă geh jàu, bi kung khin cha jòi gùng dà bơtàu tơngguh lơh sa pa bal mờ broă lơh tơrlòng lài tam ƀăng tơi. Bi K’Ly pà gĭt, kờñ tam gơl bồ tơnggoh kơlôi sơnơng tam phan bơh làng bol dê kờñ pal tơnggŏ bơh broă lơh geh kwơ ngan ngồn. Bi K’Ly, đơs tai: Nàng lơh sa làng bol dê bơtàu tơngguh kơ̆ kơl jăp, jŏ jòng, bơdìh mờ tam tờm kơphê, xã hòi jà làng bol tam tàm bơrlŭ bal, tam gơl bă ù tam phan neh kra jŏ sơnam tam gơl wơl tam ală bơta chi sa plai geh priă jền lơh sa uă bè ƀơ, sầu riêng, macca…Să tờm añ neh lòt lài tàm tam tờm ƀăng tơi nàng làng bol in lùp bơsram mờ lơh jăt. Tŭ do, tờm ƀăng tơi drà tăc geh sùm, giă tăc bơh 70 rbô tus 100 rbô đong dồ kĭ, uă cau kă phan lòt jòi tus tơn tàm hìu tàm sươn nàng blơi jơh mơya ờ gŏ geh phan nàng tăc.

Tŭ do, jơh gùt kơnhoàl Di Linh, càr Lâm Đồng geh rlau 4 rbô 400 nă đảng viên, tàm hơ̆ geh mờr 900 nă đảng viên là làng bol jơi bơtiàn dồ êt nă cau. Ngan mpồl đảng viên do là ală cau lam lài lơh krơh, sùm lam lài tàm tơl broă lơh, pơgồp bơnah tam gơl bơta mờng kơlôi bơta mờng lơh tàm ală mpồl bơtiàn làng bol jơi bơtiàn dồ êt nă cau, tă pơgồp jơh nùs tàm bơta bơtàu tơngguh lơh sa- mpồl bơtiàn tàm ƀòn lơgar tờm kơh bơnơm Di Linh.