Bi H’Dốk Êban ơm tàm ƀòn Ea Mấp, ƀòn drà dềt Ea Pôk, kơnhoàl Cư M’Gar, càr Dăk Lăk pa tơnhàu jơh kòi kàl mìu. Gĭt nđờ jơ̆t ƀào kòi geh dăp jơnhoa tềng kơlik hìu. Bi H’Dốk pà gĭt, hìu bơnhă bi mờ làng bol tàm ƀòn tŭ do neh ờ gam kơlôi rơcăng tai bơta phan sa. Bơta chài tam kòi geh uă rlau, cồng nha kòi lơh geh bơh 4 tus 6 tấn tàm dồ lồ, hơ pơrgon uă hìu ờ mìng tơl kòi sa mờ gam tăc dồ bơnah nàng geh tai priă jền. Jăt bi H’Dốk yal, geh bơta tam gơl do là kơnờm ală mpồl lơh oh mi bal, là Mpồl Tuyên giáo Tỉñ ủy càr Dăk Lăk mờ Kông ty Bơcri priă bal niam chài càr dê neh bal mờ kwang bàng bơto pơlam broă lơh sa sươn sre kơ̆ nùs ià tê sơñio broă. Bi H’Dốk đơs: Kơnờm geh bơta bơto pơlam he kung lơh jăt sơl, kòi thồm tàm 2 cuồng (khuông) den geh 2 ƀàu, ai kòi bơtờp sơntìl pa den tàm 2 cuồng hơ̆ den geh 4 ƀào, kòi thồm den geh kòi cồng nha lơh geh uă, geh kòi den ờ lơh geh cồng nha, kòi bơtờp sơntìl pa den sơntìl kas priă rlau. Tŭ pa sih gar den ơn phơng sunfat, tus tŭ kòi dờng ơn tai 2 dơ̆ phơng NPK là di.

Ồng Y Tha Mlô, Ƀí thư Ci ƀộ ƀòn Ea Mấp pà gĭt, jơh gùt ƀòn tŭ do geh 535 hìu mờ mìng gam 24 hìu rƀah. Khà hìu rƀah kung gam gơmù mhar tài bơh bàr pe nam do làng bol sùm lơh geh kòi uă mờ tăc geh giă tai. Bal mờ tam gơl muh măt ƀòn lơgar, broă lơh tơmŭt đảng tàm ƀòn kung geh uă tam gơl pràn sơl. Bơh chờm ờ geh dồ nă đảng viên lơi tàm nam 2004, tus tŭ do, ƀòn neh geh 1 ci ƀộ mờ 17 nă đảng viên. Ală cồng nha niam ngan hơ̆ geh bơta tă pơgồp dờng ngan bơh ală anih lơh broă cíñ trị tàm kâp hơđơm dê bal jơnau lời wơl mpờl gŏ loh làng ngan bơh broă lơh hòi jà làng bol dê mờ is ồn là broă lơh lơh oh mi bal đah ală anih lơh broă, mpồl lơh broă mờ ƀòn lơgar. Ồng Y Tha Mlô, yal: Tàm ală nam ală oh mi tàm mpồl lơh oh mi bal rê tus den ală oh mi cribơyai dong ală anih lơh broă ƀòn dê geh ală gùng lòt pa. Ngan là bè bơtàu tơngguh lơh sa, bulah mpồl lơh oh mi bal priă jền ờ geh, mìng là nùs nhơm mờ bơto pơlam bơh khi dê, tơnơ̆ hơ̆ ƀòn, thôn hơ̆ sồng kwang bàng gĭt geh hơ̆ sồng mblàng yal hòi jà làng bol lơh jăt ală gùng dà hơ̆ bè bơtàu tơngguh lơh sa- mpồl bơtiàn hơ̆ sồng sền gàr niam dà lơgar, lơngăp lơngai tàm ù tiah ƀòn dê.

Jăt ồng Huỳnh Chiến Thắng, Kwang bàng Tỉñ ủy càr, Phó Kwang ătbồ Mpồl Tuyên giáo Tỉñ ủy càr Dăk Lăk yal, là mpồl lơh oh mi bal mờ ƀòn Ea Mấp, cồng nha lơh geh tàm broă tam gơl bơta gĭt wă tam phan bơh làng bol dê hơ̆ ngan là mpồl lơh oh mi pal rềp mờ làng bol mờ wă wờng làng bol. Den tàng bè hơ̆, tơnơ̆ tŭ lơh oh mi bal, mpồl neh tơnggơs mpồl sồr lơh, lòt lùp sền bơta geh ngan tàm ƀòn lơgar nàng geh broă lơh, broă rơndăp lơh dong kờl dipal. Gơ wèt mờ ală hìu kal ke ờ geh ù lơh sa den mpồl rơ̆p hòi jà tă pơgồp priă jền nàng dong kờl phan ròng, kòn sơntìl, tàm tơn tìp mờ mpồl lơh sa kă bro yal tơnggĭt broă lơh. Ală hìu làng bol geh ù lơh sa mơya cồng nha lơh geh ờ hềt uă, mpồl jà kwang bàng bơto pơlam broă lơh sa sươn sre tus bơto pơlam. Pah nhai, mpồl ndrờm ai đảng viên tus pơrjum bal mờ ci ƀộ ƀòn nàng di tŭ gĭt geh jơnau kơlôi sơnơng, bơta kơ̆p kờñ bơh làng bol dê mờ tă bơsong ală bơta kòl yan bơh làng bol dê. Ồng Huỳnh Chiến Thắng, đơs: Lơh jăt gùng dà bơ̆t bơtàu Ci ƀộ 4 niam bơh Tỉñ ủy Mpồl Tuyên giáo càr dê bol hi kung lam lơh broă lơh pơgồp bal mờ Ci ƀộ ƀòn lơgar dê pah nhai bol hi ai đảng viên mŭt pơrjum bal nàng dong kờl ci ƀộ broă lơh ală jơnau lơh nền tàm pơrjum kung bè bơsong ală broă tàm ƀòn lơgar. Bơh hơ̆ kung gĭt geh broă gơlik geh nàng bơ̆t bơtàu tàm ƀòn niam rlau.

20 nam do, càr neh geh 1 rbô 780 anih lơh broă, mpồl lơh broă, mpồl lơh sa kă bro lơh oh mi bal mờ 556 ƀòn làng bol jơi bơtiàn dồ êt nă cau. Jăt Tỉñ ủy càr Dăk Lăk dê yal, cồng nha broă lơh lơh oh mi bal tàm tơngai do neh đơs nền do là dồ gùng dà dipal ngan, di nùs làng bol, geh bơta kwơ cíñ trị, mpồl bơtiàn, niam chài kòn bơnus jrô ơnàng. Nàng tơngguh uă tơl làm cồng nha mờ bơta kwơ bơh broă lơh do dê, Dăk Lăk rơ̆p pơn jăt tai tam gơl pa bè jơh bal tơnggume mờ broă lơh dipal mờ jơnau kờñ, bơta kơ̆p kờñ bơh làng bol dê. Ồng Nguyễn Đình Trung, Kwang bàng Đảng Dà lơgar, Ƀí thư Tỉñ ủy càr Dăk Lăk đơs là, lơh oh mi bal ờ mìng là jơnau đah ală anih lơh broă, mpồl lơh sa kă bro dê bal mờ ală làng bol ală ƀòn lơgar lơm mờ pal geh bal bơta lơh bal bơh ală kâp ủy, gơnoar ătbồ tàm tiah hơ̆ dê tai. Ồng Nguyễn Đình Trung, đơs: Ală anih lơh broă, mpồl lơh oh mi bal kờñ pal tơngguh rlau tai bơta tàm gơrềng bal mờ kâp ủy, gơnoar ătbồ tàm tiah hơ̆ nàng di tŭ gĭt geh broă gơlik geh bè bồ tơnggoh, rài kis làng bol ƀòn lơh oh mi bal dê, bơh hơ̆ ai geh ală broă lơh dong kờl, tàm dong ngan ngồn, dipal mờ bơta geh ngan mờ jơnau sồr kơnòl broă tàm bơta pa. Mơkung rơcăng lài tàm lùp bè ală kal ke, bơta kòl yan tàm ală tŭ lam lơh jăt broă lơh lơh oh mi bal.

Lơh oh mi bal geh sền bè dồ dơ̆ lơh bơyô đềt mềr, tam klăc bal mpồl bơtiàn, gơgơs dồ bơta niam tàm rài kis nùs nhơm bơh mpồl bơtiàn ală jơi bơtiàn Việt Nam dê. 20 nam do, bơta niam hơ̆ neh geh jăt ngui tàm dồ gùng dà dờng bơh Tỉñ ủy càr Dăk Lăk dê, geh lơh loh làng bơh ală broă lơh lơh oh mi bal đah ală anih lơh broă, mpồl lơh broă mờ tơl thôn, ƀòn làng bol jơi bơtiàn dồ êt nă cau, bơh hơ̆ lơh mpờl gŏ loh làng tai nùs nhơm tam klăc bal jơh gùt jơi bơtiàn; pơgồp bơnah gàr kơ̆ lơngăp lơngai cíñ trị, rơndăp tăp sèng niam lơngăp lơngai jơh gùt mpồl bơtiàn, bơtàu tơngguh rài kis, phan bơna mờ nùs nhơm bơh làng bol tiah jơi bơtiàn dồ êt nă cau dê.