VOV4.K’ho- Tàm càr Dăk Nông, tàm broă bơt bơtàu ƀòn lơgar pa, tơrnờm mờ ồi kòn cau là 2 bơta phan pơn rơ ngan bơh cau jơi bơtiàn kòn cau dùl êt nă cau tơl khà phan OCOP. Tàm hơ̆, tơrnờm ờs mờng bơh cau M’nông dê geh bơta bơkah krơi is ngan geh bĕ bơh phan geh is, ờdo ờdă ai pràn kơldăng să jan in. Tơrnờm gam geh cau ngui gròi sền ngan, pơgồp tai bơta chờ hờp ai ală dơ̆ lơh chờ in, ngan là tŭ sơnam pa tus, sa tềp tus.

Tàm tiah ràng tơlik yal tơnggit phan OCOP càr Dăk Nông (tàm ƀòn dờng Gia Nghĩa) geh uă ngan phan, tàm hơ̆  tơrnờm mờ ồi kòn cau bơh hơ̆ geh ơn tàm anih kuơmàng ngan. Mò H’Mai, cau atbồ Mpồl lơh broă bal tơrnờm Dăk Nia tàm xã Dăk Nia, ƀòn dờng Gia Nghĩa pơn iờ să ngan tŭ phan tiơng pơn rơ bơh kòn cau he dê geh ai bơta niam 3 sơmañ tàm khà sap sèng bơh OCOP dà lơgar dê. Jat jơnau đơs bơh Mpồl duh broă sền sơ wì dê, tơrnờm Dăk Nia ờ geh Methanol, gàr ờdo ờdă kloh niam phan sa, tơl khà phan hùc ờdo ờdă jat tơl khà câu Âu. Tơrnờm Dăk Nia gam geh anih lơh broă geh gơnoar dong kờl Mpồl lơh bal crơng gơs logo, mat kă bro mờ cih mat ngui phan ngui bơh bồ tơngoh jak lơh gơlik, pờ gơs gùng dà bơtàu tơnguh pa mờ pơgồp bơnah sền gàr broă ƀĕ tơrnờm bơh jŏ kòn cau dê. Mò H’Mai, cau atbồ mpồl lơh bal tơrnờm Dăk Nia yal bè broă lơh gơlik tơl khà niam bè do: “Broă lài ngan kờñ ƀĕ tơrnờm bơh jŏ, pal rơcang lài ală bơnah phan bè tơnơ̆ do: ràu kloh drăp yăng, ngui dùl bơta nha chi tàm brê nàng gơm, tuh tơn tàm drăp yang nàng rơsung gơ in kloh, tơnơ̆ hơ̆ cèng drăp ìs rañ. Tŭ ìs drăp pal lời gơ in rañ sơ rơh ngan den hơ̆ sồng gơtùi. Piang ƀĕ tơrnờm tŭ jơh trŭ geh tuh pơgap bơh 2 tus 3 jơ, lời piang in ngềt jơh tơn den hơ̆ sồng bơrlŭ mờ kañ, tơnơ̆ hơ̆ den hơ̆ sồng tuh tàm ală drap mờ ƀĕ uă nhai. Jơm kañ den lời pơgap 3 ngai hơ̆ sồng gơtùi dơp bơ nơp drăp yang, dilah dơp mơ den tơrnờm gơlik nhơm dà mờ gơtìp sràt. Tơnơ̆ pơn jat tai ƀĕ bơh 3 tus 4 nhai den hơ̆ sồng gơtùi ñô bơkah. Kañ tơrnờm dilah he ơn uă ir den gơtìp sràt, dilah ơn ờ tơl den tơrnờm gơtìp bơsàp bè dà. Kờp bal 1 kĭ phe geh ơn bơh 2 tus 3 pơnai kañ den tơrnờm ñô bơkah ngan”.

Tơrnờm Dăk Nia geh ai tơl khà 3 sơmañ tàm khà sap sèng bơh OCOP dà lơgar dê

Gơ wèt mờ làng bol ală jơi bơtiàn kòn cau Tây Nguyên đơs bal, cau M’nông tàm càr Dăk Nông đơs is, bơh yô yau, tơrnờm là phan pơ dơng lơh yàng, tơnơ̆ hơ̆ là phan ñô ờ gơtùi ờ geh tàm ală dơ̆ lơh chờ, bơ tòm mat bal hìu bơnhă. Tàm pơdờn bơhiàn ờs mờng hìu bơnhă dê, bi Thị Hà Ri Na, kòn cau M’nông ơm tàm ƀòn Buzara, xã Nghĩa Thắng, kơnhoàl Dăk Rlâp neh ƀĕ tơrnờm tàm nđờ nam do. Gam tàm sơnam ơruh, Thị Hà Ri Na ờ mìng jơh nùs tus bal broă lơh Đoàn, mờ gam jơh nùs tàm broă lơh mpồl cau ùr mờ mpồl cau lơh broă sa tàm ƀòn lơgar dê tai. Jat bi yal, jơnau bơceh ƀĕ tơrnờm ờs mờng ờ mìng sền gàr niam chài, mờ gam lơh gơlik broă lơh tai, gơtùi lơh tờm is bè priă jền tàm hìu bơnhă. Lồi nam 2021 pa do, tơrnờm Thị Hà Ri Na geh rơ wah là phan pơn rơ ngan bơh xã Nghĩa Thắng, kơnhoàl Dăk Rlâp dê: “Bơta krơi is bơh tơrnờm cau M’nông dê lài ngan là nàng sền gàr bơhiàn niam chài bơh jŏ kòn cau M’nông he dê, dơ̆ 2 là nàng lơh gơlik bơta pin dờn ờdo ờdă ai cau ñô in. Kờñ lơh gơlik bơta krơi is añ ngui kañ nha; añ ƀĕ is nàng lơh gơlik bơta bơkah, ƀô thồm. Kañ tơrnờm geh ai bơh chi brê geh is, añ ờ klài kañ kông nghiệp. Broă ƀĕ tơrnờm là kờñ ai gehbroă lơh tàm ƀòn lơgar he dê. Tài he là cau ùr pal git lơh tờm is, kơlôi rơcang is, lơh gơlik is priă jền; tơnguh nùs nhơm sơn đờm mut lơh broă, kă bro gơ wèt tus mờ cau ùr, hơ̆ sồng bơtàu tơnguh lơh sa tàm ƀòn lơgar he dê. Añ kung kơp kờñ tơrnờm kòn cau he dê geh tac tàm ală hìu tac phan ñô sa halà ală anih nhơl chờ, ơm rlô să. Bơh hơ̆ yal tơnggit ală phan he lơh gơlik nàng gơtùi tac geh uă rlau tai”.

Tàm uă nam do, tơrnờm Thị Hà Ri Na neh geh cau ngui tàm ƀòn lơgar rơ wah blơi ñô tàm ală dơ̆ lơh chờ ờs mờng cau M’nông dê, ală dơ̆ bơ tòm mat bal tàm ngai lơh yàng, ngai sa tềp bơh tơl hìu bơnhă dê. Broă ƀĕ tơrnờm Thị Hà Ri Na gam dềt. Pah nam, hìu bơnhă bi mìng ƀĕ rlau 100 drăp, jat 4 bơta dờng dềt krơi is, bơh 5 tus 20 lít, khà priă tac bơh 350 rbô tus 1 tơlak 300 rbô đông.

Bi Thị Hà Ri Na geh jờng rơ mờ tơrnờm ờs mờng kòn cau he dê

Lồi nam 2021 pa do, Ủy ƀan Ñân zân càr Dăk Nông neh lơh sră dờp tai 12 phan tơl khà OCOP dà lơgar. Bè hơ̆ tus tŭ do, càr Dăk Nông neh geh 52 phan OCOP, tàm hơ̆ geh tơrnờm mờ ồi kòn cau. Jat ồng Lê Trọng Yên, Phó Củ tịc Ủy ƀân Ñân zân càr Dăk Nông đơs, phan OCOP geh bơta gơ rề pràn rlau tŭ pơgồp bal mờ gah nhơl chờ- là dùl tàm ală bơta pràn bơh càr dê: “Bol he pal pơgồp bal phan OCOP mờ bơtàu tơnguh nhơl chờ, tàm tơrbŏ bal nhơl chờ mờ lơh sa suơn sre. Bè hơ̆ den tàng bol he pal bơt bơtàu phan OCOP, kuơmàg là pơgồp bal mờ Broă lơh bơt bơtàu ƀòn lơgar pa”.

Geh cau ngui kờñ, gah lơh broă geh gơnoar mờ gơnoar atbồ dong kờl, mpồl lơh bal Tơrnờm Dăk Nia tàm xã Dăk Nia, ƀòn dờng Gia Nghĩa kung bè bi Thị Hà Ri Na ơm tàm xã Nghĩa Thắng, kơnhoàl Dăk Rlâp ndrờm kơp kờñ broă ƀĕ tơrnờm ờs mờng bơtàu tơnguh pràn rlau tai bơh broă lơh OCOP. Do kung là broă lơh gơ rề niam chài phan ñô sa niam ngan bơh ală jơi bơtiàn kòn cau dê, mờ kung chồl pràn bơtàu tơnguh lơh sa tàm càr.

Cau mblàng K’Duẩn