Geh mat tàm Tiah pôs đồng tam lơh H9 càr Dăk Lăk tŭ do, cau lơi kung sền gŏ bơta “tam gơl uă ngan” ù tiah kăc màng: Ală hìu lơh dờng niam tàm bơrlŭ bal mờ hìu rơng bơh yau; ală suơn tam prìt sơngkò dờng ơning ơnàng geh glòm gùt dar bơh ală ƀlàng sre sih kòi tơlir niam; ndơ̆p tàm mhual là ală bă brê dờng bơh yau, gơwèt brê dà lơgar Chư Yang Sin dê, geh sền gàr kơ̆ ngan. Ồng Y Thu Niê (kòn cau M’nông, ơm tàm bon Dăk Tuôr, xã Cư Pui, kơnhoàl Krông Bông) đơs, lài do hìu bơnhă ồng dê gơwèt hìu bơnhă rƀah ngan rlau jơh bơh ƀòn dê, mơya tŭ do neh geh mpồl kơnrồ 10 nơm mờ tam geh 5 sào plai prìt sơngkò.

Priă lơh geh bơh ròng phan, tam phan pah nam pơgap 100 tơlak đong mờ neh lik klàs rƀah. Ồng Y Thu Niê, đơs:“Hìu bơnhă añ ròng kơnrồ, sur, kung tam prìt sơngkò sơl. Hìu añ lik klàs rƀah neh 2 nam rao. Geh priă añ ròng oh kòn bơsram sră, lơh hìu dờng niam, blơi tivi, rơndeh măi drơng rài kis hìu bơnhă añ dê lơm”.

Neh tus bal tam lơh tŭ gam là klau pơnu pa tào dờng, tŭ do neh gơs cau kra ƀòn bơh ƀòn Chàm A, xã Cư Drăm, kơnhoàl Krông Bông dê, ồng Y Lăng Êban chờ hờp ngan tềng đăp ală bơta tam gơl bơh ƀòn he dê. Ồng pà gĭt, ală nam pa do, geh bơta bơcri priă bơh Đảng, Dà lơgar, phan bơna bơt bơtàu tàm tiah sar lơgar ngài do neh hời rơ hời geh lơh tơl. Gùng che ồs đèng mờ dà ngui sa pah ngai neh geh lơh tus tơl hìu bơnhă, hìu pơrjum mpồl bơtiàn dê neh geh lơh dờng niam... là cơng tàng ai ală bơta tam gơl tàm ù tiah ƀòn lơgar kăc màng dê. Ồng Y Lăng Êban, đơs:“Tŭ do ƀòn Chàm A geh gùng bê tông, hìu sơnơm, hìu bơsram mờ hìu niam chài rao. Oh kòn kòn sau lòt bơsram ƀuơn ngan. Làng bol geh dong kờl kơnrồ, sur ròng nàng bơtàu tơnguh lơh sa. Làng bol dồ nùs jat Đảng, Dà lơgar mờ jơh nùs lơh sa bơtàu tơnguh lơh sa tơn jơh jơgloh tơrmù rƀah”.

Bơh tiah là ală xã tiah 3 is ồn kal ke bơh càr Dăk Lăk dê, gùng lòt rê kal ke ngan, mơya kơnờm bơta dong kờl bơh Đảng mờ Dà lơgar, tŭ do 100% ƀòn tàm tiah tam lơh H9 neh geh lơh gùng bê tông. Ală xã lơh geh rlau bơh 14 tàm 19 broă jàu bơt bơtàu ƀòn lơgar pa. Tàm hơ̆, ală broă jàu kờñ geh priă bơcri dờng bè gùng lòt, bơtơ̆t rbòng dà, hìu sơnơm, hìu bơsram... neh lơh sir lơm.

Ồng Hồ Duy Nam – Kwang atbồ Mpồl atbồ rơndăp broă lơh bơcri priă bơt bơtàu kơnhoàl Krông Bông pà gĭt, tơngai bơh nam 2021 – 2025, bơdìh mờ 4 xã tiah H9, 3 xã bơh kơnhoàl dê geh dong kờl tơl làm. Kờp jơh, neh geh 127 tơmàn đong bơh Broă lơh tơrmù rƀah 1719 bơh Cíñ phủ dê geh bơcri ai 7 xã in. Tŭ do Mpồl gam lam lơh kràñ cê jơh nùs lơh 22 broă lơh bơt bơtàu gùng lòt, hìu ơm, hìu bơsram mờ rbòng dà nàng dong kờl làng bol. Ồng Hồ Duy Nam, đơs:“Mpồl Atbồ rơndăp broă lơh pơgồp bal mờ ală cau tờm lơh rơndăp broă lơh lơh mhar tŭ tơngai mut lơh, sền gròi bơta niam broă lơh dê nàng gàr tơl bơta niam ai ngui gờñ ngan rlau jơh, mut ngui broă lơh bơt bơtàu geh cồng nha. Bơh hơ̆, lơh geh ală bơta kă bro, jun pơndiang phan bơna bơtàu tơnguh lơh sa ai làng bol jơi bơtiàn dồ ết nă cau tàm ală xã kal ke do in”.

Tiah pôs đồng tam lơh H9 càr Dăk Lăk ơm uă ngan tàm ù tiah ală xã Hoà Phong, Cư Pui, Cư Drăm và Yang Mao. 4 xã geh 41 rơbô 500 nă cau, mờ rlau 80% làng bol kòn cau Rơđê, M’nông, Thái, Mông, Dao, Tày, Nùng... ơm kis. Jat ồng Nguyễn Ngọc Pháp - Phó Củ tịc Anih duh broă làng bol kơnhoàl Krông Bông, tàm rài tam lơh dră mờ bol Mỹ dong klàs dà lơgar, bulah rài kis kal ke bòl glar, mơya làng bol sùm tam klăc bal tam lơh sền gàr ƀòn lơgar, ròng, mpồn kwang bàng cau ling kăc màng. Ală nam do, bal mờ tàm bơrlŭ bal mờ ală broă lơh dong kờl bơh càr mờ dà lơgar dê, kơnhoàl neh lơh ală broă rơndăp lơh bè broă lơh tơrmù rƀah mờ lơh geh ală cồng nha niam ngan.

Phan bơna bơt bơtàu ală xã dê ngai sơlơ geh lơh tơl, rài kis làng bol dê sơlơ bơtàu tơnguh, khà hìu bơnhă rƀah gơ mù jat nam. Ồng Nguyễn Ngọc Pháp, pà gĭt: “Pah nam kes priă kơnhoàl lời 1% tă ngui sùm tam gơl rơndăp tăp sèng phan tam, phan ròng tàm ù tiah ală xã Cư Pui, Cư Drăm, Yang Mao mờ Hoà Phong in. Pơn jờng làng bol tơrgùm ròng uă  kơn rồ, sur mờ bơto pơlam gùng dà tiah tam uă plai prìt sơngkò. Is ồn, lơh broă rơndăp lơh bơtàu tơnguh jơnau neh lơh nền niam chài tàm ală xã tiah pôs đồng kăc màng”.

Gơwèt mờ broă làng bol pơn jat tai pơnđơl pràn lơh ngan lơh broă sa nàng lik klàs rƀah; Đảng ƀộ, gơnoar atbồ kràñ cê jơh nùs tàm broă pơlam gùng dà bơtàu tơnguh lơh sa- mpồl bơtiàn, Tiah pôs đồng tam lơh H9 đơs is mờ ală xã kal ke tàm kơnhoàl Krông Bông đơs bal pơn jat bơtàu tơnguh. Kơnòl broă ai Tiah pôs đồng tam lơh H9 bơh càr dê gơgơs là tiah pôs đồng kăc màng bè bơto bơtê bơhiàn kăc màng, pơgồp bal mờ bơtàu tơnguh lòt nhơl niam chài mpồl bơtiàn rơ̆p lơh sir tàm tơngai tus.